ފަލަސްޠީނުގެ 17 އަހަރުން ދަށުގެ ޤައުމީ ފުޓުބޯޅަ ޓީމާ ރައީސް ބައްދަލުކުރައްވައިފި

Read Time:3 Minute, 17 Second

(ފޮޓޯ ކްރެޑިިޓްސް: ޕީއެސްްއެމް ނިއުސް)

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ހޮޓެލް ޖެންގައި ފަލަސްޠީނުގެ 17 އަހަރުން ދަށުގެ ޤައުމީ ފުޓްބޯޅަ ޓީމާ ބައްދަލުކުރައްވައިފިއެވެ. މި ބައްދަލުކުރެއްވުމުގައި ރައީސް ވަނީ ރާއްޖޭގައި ކުރި ކޭމްޕުގެ ތަޖުރިބާ އޮޅުއްފިލުއްވާފައެވެ. އެމަނިކުފާނުގެ އަނބިކަނބަލުން ސާޖިދާ މުޙައްމަދު، ކުޅިވަރާބެހޭ ވަޒީރު ޢަބްދުﷲ ރާފިޢު، އަދި ފުޓްބޯޅަ އެސޯސިއޭޝަންގެ ރައީސް އަޙްމަދު ޠާރިޤުވެސް ބައިވެރިވެވަޑައިގެންނެވިއެވެ.

ހަނގުރާމައިގެ ސަބަބުން ފުޓްބޯޅަ ކުޅޭނެ މާޙައުލެއް ނެތުމުގެ ސަބަބުން، ރާއްޖެއިން ފަލަސްޠީނު ޓީމަށް ކޭމްޕުކުރުމުގެ ފުރުޞަތު ދެއްވާ، ހޫނު މަރުޙަބާއެއް ކީ ކަމީ ހަނދާނުން ފޮހެވޭނެ ކަމެއް ނޫން ކަމަށް ޓީމުން ބުންޏެވެ. ޓީމުގެ މެނޭޖަރު މުޙައްމަދު ޖުމާ ސުލައިމާން ވިދާޅުވީ، އެއަރޕޯޓުން ފެނުނު އަމިއްލަ ޤައުމުގެ ދިދަތަކުގެ މަންޒަރަކީ ބުނެދޭން ނޭނގޭ ކަހަލަ އިޙުސާސްތަކެއް ކަމަށާއި، އެކި ޤައުމުތަކުގައި ދިރިއުޅޭ ކުދިން ގޮވައިގެން ރާއްޖެ އައިސް ކޭމްޕް ކުރެވުމަކީ ލިބުނު ވަރަށް ބޮޑު އުފަލެއް ކަމަށެވެ. ދިވެހިންގެ ގާތްކަމާއި މެހެމާންދާރީގެ ސަބަބުން އަދިވެސް ފުރުޞަތެއް ލިބިއްޖެނަމަ ރާއްޖެ އަންނަން ބޭނުންވާކަމަށް ޓީމުން ހާމަކުރިއެވެ.

ރާއްޖޭގައި ހޭދަކުރި މުއްދަތުގައި ފަލަސްޠީނު ޓީމުން ވަނީ 17 އަހަރުގެ ދަށުގެ ދިވެހި ގައުމީ ޓީމާއެކު ދެ އެކުވެރިކަމުގެ މެޗު ކުޅެފައެވެ. ފުޓްބޯޅަ އެސޯސިއޭޝަނުން މި މެޗުތަކަށް ސްވެނިއަރ ޓިކެޓް ވިއްކާފައިވަނީ ފަލަސްޠީނުގެ ފުޓްބޯޅައަށް އެހީތެރިވުމުގެ ގޮތުންނެވެ. ދިހަ ދުވަހުގެ ކޭމްޕެއް ނިންމުމަށްފަހު، މި ޓީމު ދެން ދާނީ މިމަހުގެ 22 އިން 30 އަށް އިންޑިއާގައި ބާއްވާ 17 އަހަރުން ދަށުގެ އޭޝިއަން ކަޕުގެ ކޮލިފައިންގައި ވާދަކުރުމަށެވެ.