ގޫގުލްގެ އިންވެސްޓްމަންޓާއެކު ރާއްޖެ ބައިނަލްއަޤްވާމީ ކަނެކްޓިވިޓީ ހަބަކަށް!

Read Time:3 Minute, 32 Second

ގޫގުލްއިން ރާއްޖޭގެ އައްޑޫ ސިޓީގެ ހިތަދޫގައި ބައިނަލްއަޤްވާމީ ސަބްމެރިން ކޭބަލް ލޭންޑިން ސްޓޭޝަނެއް ޤާއިމުކުރުމަށް ނިންމައިފި އެވެ. މި މަޝްރޫޢަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެމެރިކާގެ ނިއުޔޯކަށް ކުރެއްވި ދަތުރުފުޅުގައި ގޫގުލްގެ އިސްވެރިންނާ ބޭއްވެވި މަޝްވަރާތަކަށްފަހު ކުރިއަށްގެންދަން ނިންމި ކަމެކެވެ.

އިކޮނޮމިކް މިނިސްޓްރީން ފާހަގަކުރާ ގޮތުގައި، މިއީ ދުނިޔޭގައި ކުރިއަރަމުން އަންނަ ޓެކްނޮލޮޖީ ދާއިރާގައި ރާއްޖޭގެ ދައުރު ފުޅާކުރުމަށް އެޅުނު ވަރަށް މުހިންމު ފިޔަވަޅެކެވެ. ހިތަދޫގައި ޤާއިމުކުރެވޭ މި ފެސިލިޓީގެ ސަބަބުން ރާއްޖެއަކީ އޭޝިއާ، އޯޝޭނިއާ، އެފްރިކާ، މެދުއިރުމަތި އަދި ޔޫރަޕް ގުޅުވައިދޭ އިތުބާރު ހުރި ޑިރިޒަލް ގޭޓްވޭއަކަށް ވެގެންދާނެއެވެ. މިކަމުގެ ސަބަބުން އިންޑިއާ ކަނޑުގައި ޤާއިމުވެގެންދާ ޑިރިޒަލް ކަނެކްޓިވިޓީ ކޮރިޑޯގައި ރާއްޖެ މައި ހަބެއްގެ ގޮތުގައި ޤާއިމުވުމަށް ފުރުސަތު ލިބިގެންދާނެއެވެ. މާލެއާއި ކުޅުދުއްފުށީގެ އިތުރުން ހިތަދޫގައި މި ޕޮއިންޓް ޤާއިމުވުމުން، ރާއްޖޭގެ އިގްތިސާދީ ތަރައްގީއަށް މަގުފަހިވެ، ސަރަހައްދީ މުވާސަލާތީ މަރުކަޒެއްގެ ގޮތުގައި ދިވެހިރާއްޖެ ވެގެންދާނެއެވެ.

ގޫގުލްގެ މި އިންވެސްޓްމަންޓަކީ ދުނިޔޭގެ މަޝްހޫރު ބޮޑެތި އިންވެސްޓަރުން ރާއްޖޭގައި އިންވެސްޓްކުރުމަށް ޝައުގުވެރިވާ މިންވަރު ހާމަކޮށްދީ، ކްލައުޑް ސާވިސަސް، ފިންޓެކް، ޑިޖިޓަލް ކޮންޓެންޓް އަދި ޓެކްނޮލޮޖީ ސްޓާޓް-އަޕްސް ފަދަ ދާއިރާތައް ތަރައްގީކުރުމަށް އޮތް ފުރުސަތު އިތުރުކުރާނެ ކަމެކެވެ. މީގެ ސަބަބުން ދިވެހި ރައްޔިތުންނަށް އިންޓަނެޓްގެ ޚިދުމަތްތައް އަގުހެޔޮވެ، ސްޕީޑު ރަނގަޅުވެ، ޤައުމީ އިޤްތިޞާދަށް ޑިޖިޓަލް ދާއިރާއިން އާ ދޮރުތަކެއް ހުޅުވިގެންދާނެއެވެ. ސަރުކާރުން މި މަޝްރޫޢު ކާމިޔާބުކަމާއެކު ތަންފީޒުކުރުމަށް ފުރިހަމަ އެހީތެރިކަން ދޭނެކަމުގެ ޔަގީންކަން ވެސް ވަނީ ދީފައެވެ.