އެޕްސްޓީންގެ “އެކުވެރި ރައީސަކީ” ވަހީދުކަން ހާމަވެއްޖެ

Read Time:3 Minute, 57 Second

ރާއްޖޭގެ ކުރީގެ ރައީސް ޑރ. މުހައްމަދު ވަހީދު، ކުޑަކުދިންނަށް ޖިންސީ ގޯނާކޮށް ބްލެކްމެއިލްކުރި ޖެފްރީ އެޕްސްޓީންއާ ގާތް ގުޅުމެއް ބާއްވާފައިވާކަން، އެމެރިކާގެ ކޮންގްރެސް އިން އާއްމުކުރި 20،000 ފައިލްއިން ވަނީ ހާމަވެފައެވެ. މީގެ ކުރިން ހެކަރުން ލީކުކޮށްލާފައިވާ އީމެއިލްތަކުގައި ޝާމިލުވާ ރާއްޖޭގެ ރައީސަކީ ވަހީދުކަން މިހާރު ކަށަވަރުވެފައިވާއިރު، އެމަނިކުފާނު ވަނީ އެޕްސްޓީންއަކީ ބޮޑެތި ކަންކަމުގައި އިރުޝާދު ހޯއްދަވާ ގާތް މީހެއްގެ ގޮތުގައި ގެންގުޅުއްވާފައެވެ. އީމެއިލް މުއާމަލާތްތަކުން އެނގޭ ގޮތުގައި ވަހީދު، އެޕްސްޓީންގެ އިރުޝާދު ހޯއްދެވި ކަންތައްތަކުގެ ތެރޭގައި ރާއްޖޭގެ މާލީ ކަންކަމާއި 2013 ވަނަ އަހަރުގެ ރިޔާސީ އިންތިހާބުގެ ކެމްޕެއިން ސްޓްރެޓެޖީ ހިމެނެއެވެ. 2012 ވަނަ އަހަރު އދ.ގެ އާއްމު މަޖިލީހުގެ ޖަލްސާއަށް ނިއު ޔޯކަށް ކުރެއްވި ދަތުރުފުޅުގައި ވަހީދު ވަނީ އެޕްސްޓީންއާ ސީދާ ބައްދަލުކުރައްވާފައެވެ.

މާލީ ކަންކަމުގެ ތެރެއިން، ފިނޭންސް މިނިސްޓަރު އަބްދުﷲ ޖިހާދު ހުށަހެޅުއްވި 4 ބިލިއަން ޑޮލަރުގެ ޝައްކު އުފެދޭ ޕްރޮޕޯސަލަކާ މެދު ވަހީދު ވަނީ އެޕްސްޓީންގެ އިރުޝާދު ހޯއްދަވާފައެވެ. މި ޕްރޮޕޯސަލަކީ “ސްކޭމެއް” ކަމަށް އެޕްސްޓީން ވަގުތުން ދެނެގަނެ، ކުރިއަށްދާނަމަ ސްކޭމަރުން އަމަލުކުރާނެ ގޮތް ވެސް ކިޔައިދީފައިވެއެވެ. މިކަމަށް ވަހީދު ދެއްވި ޖަވާބުގައި ވަނީ “ތިޔައީ އަޅުގަނޑު ސަލާމަތްކޮށްދޭ މީހާ” ކަމަށް ވިދާޅުވެ، އެޕްސްޓީންގެ އިރުޝާދު ފުރިހަމައަށް ގަބޫލުކުރައްވާކަން ހާމަކުރައްވާފައެވެ.

ސިޔާސީ ގޮތުން ވެސް 2013 ރިޔާސީ އިންތިހާބުގެ ކެމްޕެއިނަށް އެހީތެރިކަން ދޭން އެޕްސްޓީން ވަނީ، ވަހީދުގެ ކެމްޕެއިން ޓީމު އިންތިޒާމުކުރުވަން ސްވިޑަންގެ ޑިޕްލޮމެޓަކު ގެންނަން ހުށަހަޅާފައެވެ. ޖެފްރީ އެޕްސްޓީންއަކީ އެތައް ކުދިންނަށް ޖިންސީ އަނިޔާދީ ބްލެކްމެއިލްކޮށް، 2005 އަދި 2019 ވަނަ އަހަރު ހައްޔަރުކުރެވިފައިވާ މުއްސަނދި ފައިނޭންސަރެކެވެ. އޭނާ 2019 ވަނަ އަހަރު ޖަލުގައި މަރުވެފައި އޮއްވައި ފެނުނުއިރު، އޭނާގެ ޖަރީމާތަކަށް އެހީވިކަމުގެ ކުށުގައި އޭނާގެ ކުރީގެ ލޯބިވެރިޔާ ގިލައިން މެކްސްވެލް ވަނީ 20 އަހަރަށް ޖަލަށްލާފައެވެ.