މެސީ އެނބުރި ބާސެލޯނާއަށް އައުމަކީ އަސްލެއްނެތް ކަމެއް: ލަޕޯޓާ

Read Time:4 Minute, 3 Second

ބާސެލޯނާގެ ކުރީގެ ކެޕްޓަން ލިއޮނެލް މެސީ އެނބުރި އެ ޓީމަށް އައުމަކީ އަސްލެއް ނެތް ކަމެއް ކަމަށް އެ ޓީމުގެ ރައީސް ޖޯން ލަޕޯޓާ ބުނެފި އެވެ. އޭނާ މިހެން ބުނެފައިވަނީ މި ހަފްތާގެ ތެރޭގައި އެއްވެސް ފަރާތަކަށް އެންގުމެއް ނެތި ބާސެލޯނާގެ ނޫކޭމްޕް ސްޓޭޑިއަމްއަށް މެސީ ދަންވަރުގެ ވަގުތެއްގައި ގޮސް ނަގާފައިވާ ފޮޓޯ ތަކެއް އޭނާގެ އިންސްޓަގްރާމް އެކައުންޓުގައި އާންމު ކުރުމާއި ގުޅިގެންނެވެ. ނޫކޭމްޕް އަލުން މަރާމާތު ކުރުމުގެ މަސައްކަތް ކުރަމުންދަނިކޮށް މެސީ އެތަނުގައި ނެގި ފޮޓޯ އާއިއެކު ބުނެފައިވާ ގޮތުގައި އެއީ އޭނާއަށް އަށް ވަރަށް ހާއްސަ ތަނެކެވެ. “ރޭގެ ވަގުތެއްގައި އަހަރެން އެންމެ ބޮޑަށް ހަނދާންވާ އެއް ތަނަށް އަހަރެން ދިޔައިން. އެއީ އަހަރެންގެ ހަޔާތުގައި އަހަންނަށް އެންމެ ބޮޑު އުފާވެރިކަމެއް ގެނުވި ތަން އަދި އަހަރެންނަކީ ދުނިޔޭގެ އެންމެ އުފަލުގައި ހުރި މިހާގެ އިހުސާސް ސަޕޯޓަރުންގެ ފަރާތުން ލިބުނު ތަންވެސްމެ. އަހަރެން އުންމީދު ކުރަނީ އަދި ކޮނެމެވެސް ދުވަހަކުން އެތަނަށް އެނބުރި އައުން.” މީގެ ތިން ދުވަސް ކުރިން މެސީގެ އިންސްޓަގްރާމްގައި ކޮށްފައިވާ ޕޯސްޓުގައި ބުނެފައިވެ އެވެ.

އަށް ފަހަރު މަތިން ބެލޮންޑިއޯ އެވޯޑް ހޯދާފައިވާ މެސީ ބާސެލޯނާ ދޫކޮށް 2021 ވަނަ އަހަރު ވަނީ ފްރާންސްގެ ޕީއެސްޖީ އަށް ބަދަލުވެފަ އެވެ. އަދި އޭގެ ފަހުން އޭނާ ވަނީ 2023 ވަނަ އަހަރު އެމެރިކާގެ މޭޖަރ ލީގުގެ ކްލަބް އިންޓަރ މަޔާމީ އަށް ބަދަލުވެފަ އެވެ. ލާޕޯޓާ ބުނެފައިވަނީ ހަގީގަތެއް ނެތް އަދި އަސްލެއް ނެތް ވާހަކަތަކެއް ދެއްކުމަކީ އޭނާ ކުރަން ބޭނުންވާ ކަމެއް ނޫން ކަމަށެވެ. “އަސްލެއް ނެތް ވާހަކަ ދެއްކުމަކީ އަހަރެން ކުރަން ބޭނުންވާ ކަމެއް ނޫން. ނަމަވެސް އަހަރެންވެސް ގަބޫލުކުރަން މެސީގެ ހަނދާނުގައި ހާއްސަ މެޗެއް ކުޅެން ވާނެ ކަމަށް. އަދި ނޫކޭމްޕް އަލުން ހުޅުވުމަށްފަހު އެފަދަ މެޗެއް ކުޅެވިގެންދާނެ.” ލަޕޯޓާ ބުންޏެވެ.

މެސީ ވަނީ ބާސެލޯނާގައި ހޭދަކުރި ދިގު މުއްދަތުގައި އެ ޓީމަށް ކުޅެދިން 778 މެޗުގައި 672 ލަނޑު އެ ޓީމަށް ކާމިޔާބުކޮށްދީފަ އެވެ. އަދި ބާސެލޯނާއަށް ލަލީގާގެ ޗެމްޕިއަންކަން 10 ފަހަރު އަދި ޔޫއެފާ ޗެމްޕިއަންސް ލީގު ހަތަރު ފަހަރު ހޯދައިދިނުމުގައި މެސީ ވަނީ މުހިންމު ދައުރެއް އަދާކޮށްފަ އެވެ.