ލިވަޕޫލް ހަލާކުކޮށްލީ ވާޓްޒް: ވެންގާ

Read Time:4 Minute, 51 Second

އިނގިރޭސި ޗެމްޕިއަން ލިވަޕޫލަށް މި ސީޒަނުގައި ކުރިއަށް ނުދެވިގެން އުޅޭ މައިގަނޑު މައްސަލަ އަކީ ޖަރުމަނުގެ މިޑްފީލްޑަރު ފްލޯރައިން ވާޓްޒްގެ ސަބަބުން ކަމަށް ތަޖުރިބާކާރު ކޯޗު އާސެން ވެންގާ ބުނެފިއެވެ. މެދުނުކެނޑި 22 އަހަރު އާސެނަލް އަށް ކޯޗުކޮށްދިނުމަށް ފަހު މިހާރު ދުނިޔޭގެ ފުޓްބޯޅަ ޖަމިއްޔާ ފީފާގެ ފީފާ ޗީފް އޮފް ގްލޯބަލް ފުޓްބޯލް ޑިިވެލޮޕްމަންޓް މަގާމުގައި މަސައްކަތް ކުރަމުން އަންނަ ކޯޗު ބުނީ ވާޓްޒް ގެނައުމުން ލިވަޕޫލްގެ މެދުތެރެ “ހަލާކު” ވެއްޖެ ކަމަށެވެ. ވާޓްސް ލިވަޕޫލަށް ގެނައީ ޖަރުމަނުގެ ބަޔާ ލެވަކޫސެން އަށް 116 މިލިއަންޔޫރޯ ދީފަ އެވެ. ވެންގާ ބުނީ ލިވަޕޫލްގައި ވާޓްޒް ލައްވައި ކުޅުވާނެ މަގާމެއް ނެތް ކަމަށެވެ.

“އޭނާ ހޯދަން އުޅުނީ ލިވަޕޫލް އާއި ބަޔާން މިއުނިކުން. އޭނާ ބުނީ ކުޅެން ބޭނުންވަނީ ލިވަޕޫލަށް ކަމަށް. ލިވަޕޫލަށް އަންނަން ޖެހޭނީ ނަންބަރު 10ގެ ޕޮޒިޝަނަށް ކުޅެވޭނަމަ. އޭނާގެ އަސްލު ޕޮޒިޝަނަކީ އަރިމަތި. އެކަމަކު ލިވަޕޫލްގައި އޭނާ ބޭނުން ކުރުމުންވާ ގޮތަކީ އެ ޓީމުގެ މިޑްފީލްޑް ހަލާކުވަނީ. އެ މީހުންގެ މެދުތެރޭގައި އެބަތިބި ގްރަވަންބަޗާއި މެކްއަލިސްޓާއި ޒޮބޮސްލާއީ. މި އެންމެން ތިއްބާ ވާޓްސް މެދުތެރެއަށް ލުމުން ޒޮބޮސްލާއީ ގެއްލެނީ. މީގެ ސަބަބުން މެދުތެރެ އޮންނަނީ ހާއަޅާފައި،” ވެންގާ ބުންޏެވެ.

ވިދިވިދިގެން ފަސް މެޗުން ބަލިވެ، ލިވަޕޫލް އަޑިގަނޑަށް ވެއްޓުނު ފަހުން ލިވަޕޫލް މޮޅުވީ އެސްޓަން ވިލާ އަތުންނާއި ޗެމްޕިއަންސް ލީގުގައި ރެއާލް މެޑްރިޑް އަތުންނެވެ. އޭގެ ފަހުން މެންޗެސްޓާ ސިޓީ އަތުން އަނެއްކާ ވެސް ވަނީ ބަލިވެފަ އެވެ.

(ފޮޓޯ ކްރެޑިޓްސް: ރޮއިޓާރސް)

“އެ މީހުން އެސްޓަން ވިލާ މެޗުގައި ކުރި ކަމަކީ މީގެ ކުރިން ވެސް އެ މީހުން އާއްމުކޮށް ބޭނުންކުރާ މިޑްފީލްޑް ބޭނުން ކުރީ. އޭގެ ސަބަބުން ޒޮބޮސްލާއީ ފެނި މެދުތެރެ ވެސް ވަރުގަދަކޮށް އޮތީ. ރެއާލް މެޗުގައި ވާޓްޒް ބޭނުން ކުރީ އަރިމަތިން. އަހަރެންނަށް ޔަގީން ކޯޗު ބުނާނެކަން ލިވަޕޫލްގައި ކުޅެން ބޭނުންވާނަމަ އޭނާ އަރިމައްޗަށް ކުޅެން،” ވެންގާ ބުންޏެވެ. ލިވަޕޫލްގެ ކޯޗު އާނޭ ސްލޮޓް ވާޓްޒް ގެނައީ އޭނާ އަށް ފްރީ ރޯލެއް ދޭނެ ކަމަށް ވައުދުވެގެންނެވެ. މިވާހަކަ ދެއްކީ ކުޅުންތެރިޔާގެ ބައްޕަ ދިން އިންޓަވިއުއެއްގަ އެވެ. ނަމަވެސް 450 މިލިއަން ޔޫރޯ ހޭދަކޮށްގެން ޓީމަށް ގެނައި ކުޅުންތެރިންނަށް ރަނގަޅު ކުޅުމެއް ނުދެއްކޭތީވެ ޓީމު ވަނީ އަޑިއަޅާލައިފަ އެވެ. މިކަމާ ގުޅިގެން ކުރީގެ ކުޅުންތެރިން އެންމެ ބޮޑަށް ފާޑުކިޔަމުންދަނީ ވެސް ކޯޗު ސްލޮޓަށެވެ.

ގިނަ ކުޅުންތެރިން ބުނަނީ ލިވަޕޫލް ޓީމުގައި ތަރިން ގިނަވުމުން ހުރިހާ ކުޅުންތެރިން ހިތްހަމަ ޖައްސައިގެން އުޅެން ސްލޮޓަށް ދަތިވެއްޖެ ކަމަށެވެ.