ދެކުނުގެ އަތޮޅުތަކުން ޑްރަގްގު 12 ނެޓްވޯކެއް ދެނެގެންފި

Read Time:5 Minute, 0 Second

ރައީސް ޑރ. މުޙައްމަދު މުޢިއްޒު މިއަދު ވަނީ މޯލްޑިވްސް ކަރެކްޝަނަލް ސަރވިސްގެ މައި އިދާރާގެ އާ އިމާރާތް ހުޅުމާލޭ ޖަލުގެ ގޯތިތެރޭގައި ރަސްމީކޮށް ހުޅުއްވައިދެއްވާފައެވެ. މި ރަސްމިއްޔާތަށް އެމަނިކުފާނު ވަޑައިގަތުމުން މަރުޙަބާ ދެންނެވީ ހޯމް މިނިސްޓަރު ޢަލީ ޢިހްސާނާއި ކޮމިޝަނަރު އޮފް ޕްރިޒަންސް ހުސައިން ޒަރީރެވެ. އަދި ޝަރަފުގެ ގާޑެއް އަރުވާފައިވެއެވެ. މިއީ ކަރެކްޝަނަލް ސަރވިސްގެ އަމިއްލަ ބިމެއްގައި ބިނާކުރެވުނު ފުރަތަމަ ހެޑްކުއާޓާސް އިމާރާތެވެ. ދެ ފަންގިފިލާގެ މައްޗަށް އެކުލެވޭ 12,000 އަކަފޫޓުގެ މި އިމާރާތުގެ މަސައްކަތް ސޯޅަ މަސްދުވަހުގެ ތެރޭގައި ނިންމާލެވިފައިވެއެވެ. މި އިމާރާތުގައި އެމް.ސީ.އެސް ހެޑްކުއާޓާސްގެ 15 ސެކްޝަން އަދި ޑިވިޝަނާއި ކޮމާންޑް ހިމެނޭހެން، 170 އަށް ވުރެ ގިނަ އޮފިސަރުންނާއި މުވައްޒަފުން މަސައްކަތްކުރާނެއެވެ.

ފުވައްމުލަކުގައި ޖެނުއަރީ 14، 2024 ގައި ފެށި “ވެށި ރައްކަލް” ޑްރަގާ ދެކޮޅު އޮޕަރޭޝަން މުޅި ދެކުނުގެ ގއ، ގދ، އަދި އައްޑު އަތޮޅަށް ފުޅާކުރެވިފައިވާ ކަމަށް، ސައުތު ޕޮލިސް ކޮމާންޑަރު، އެސިސްޓެންޓް ކޮމިޝަނަރު އޮފް ޕޮލިސް މުޙައްމަދު ޝަމީމް މިއަދު ވިދާޅުވެއްޖެއެވެ. މި ސަރަހައްދުން 12 ޑްރަގު ނެޓްވޯކެއް ދެނެގަނެވިފައިވާއިރު، ފުވައްމުލަކުގައި މި އޮޕަރޭޝަނާ ގުޅިގެން 58 މީހަކު ހައްޔަރުކޮށް، 75 މައްސަލައެއް ތަހުގީގުކުރެވި، އޭގެ ތެރެއިން 65 މައްސަލައެއް ދައުވާ ކޮށްދިނުމަށް ޕީޖީ އޮފީހަށް ފޮނުވާފައިވެއެވެ. މި ތަހުގީގުތަކުން ނެޓްވޯކުތަކުގެ އިސް ދެ މީހަކު ކަމަށް ތުހުމަތުކުރެވޭ ފުވައްމުލަކު ދޫޑިގަން، ކަރަންކާވިލާ އަޙްމަދު ނިއުޝާދާއި، ދޫޑިގަން، ޒަމާނީވިލާ، ޙަސަން އާޒިމް ހިމެނެއެވެ. މި އޮޕަރޭޝަންގެ ނަތީޖާއެއްގެ ގޮތުން މަގުމަތީގައި މަސްތުވާތަކެތި ވިއްކާކަމުގެ ޝަކުވާތައް ވަރަށް ބޮޑަށް މަދުވެފައިވާ ކަމަށް ފުވައްމުލަކު ސިޓީގެ ކޮމާންޑަރު، އިންސްޕެކްޓަރ އޮފް ޕޮލިސް މޫސާ ލަޠީފު ވިދާޅުވިއެވެ.

މި ސަރަހައްދުގެ ޕޮލިސް ސްޓޭޝަންތަކަށް މި އަހަރު 5،000 އެއްހާ މައްސަލަ ރިޕޯޓުކޮށްފައިވާއިރު، އައްޑޫ އިން އެކަނި 2,701 މައްސަލަ ރިޕޯޓުކޮށްފައިވެއެވެ. އޭގެ ތެރެއިން ގިނައީ ވައްކަމުގެ މައްސަލަތަކެވެ. އައްޑޫ ސިޓީގެ ކޮމާންޑަރު، ސުޕްރިޓެންޑެންޓް އޮފް ޕޮލިސް މުޙައްމަދު މަސްޢޫދު ފާހަގަކުރެއްވީ މަސްތުވާތަކެތީގެ މައްސަލަތަކާއި ވައްކަމުގެ މައްސަލަތަކުގައި ވެސް އުޅެނީ ތަކުރާރުކޮށް ކުށްކުރާ އެއް ބައެއް ކަމަށާއި، އެހެންކަމުން މިފަދަ ކުށްތައް ހުއްޓުވުމަށް މީހުން ހޭލުންތެރިކުރުވުންފަދަ ގިނަ މަސައްކަތްތައް ކުރަމުންދާ ކަމަށެވެ. ޝަމީމް ވިދާޅުވީ އަލަށް ވައްކަމަށް ވަންނަ މީހުން މަދުނަމަވެސް ތަކުރާރުކޮށް ކުށްކުރާ މީހުންގެ ސަބަބުން މިކަމަށް އެކަށީގެންވާ ހައްލެއް ނުހޯދޭ ކަމަށެވެ.