Read Time:3 Minute, 21 Second
ސްޕެނިޝް ލަލީގާގައި ރޭ ސެލްޓަވީގޯ އާއި ދެކޮޅަށް ބާސެލޯނާ ކުޅުނު މެޗު 4-2 ގެ ނަތީޖާއަކުން ބާސެލޯނާ މޮޅުވެއްޖެ އެވެ. ރަށުން ބޭރުގައި ބާސެލޯނާ ކުޅުނު މި މެޗުގެ 10 ވަނަ މިނިޓުގައި ބާސެލޯނާ އަށް ލިބުނު ޕެނަލްޓީ އަކުން ރޮބަޓް ލެވަންޑޯސްކީ ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ. ނަމަވެސް އޭގެ މިނިޓެއް ފަހުން ސެލްޓަވީގޯ ގެ ސާޖިއޯ ކަރޭރާ ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ. ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެން ގޮސްފައިވާ މި މެޗުގައި ބާސެލޯނާ އިން ދެވަނަ ފަހަރަށް ކުރި ހޯދާފައިވަނީ މެޗުގެ 37 ވަނަ މިނިޓުގައި މާކަސް ރަޝްފޯޑް ދިން ޕާހަކުން ލެވަންޑޯސްކީ އެވެ.
ބާސެލޯނާ އިން ދެވަނަ ފަހަރަށް ލީޑު ނެގުމުންވެސް އޭގެ ހަ މިނިޓު ފަހުން ސެލްޓަވީގޯ އިން ވަނީ މެޗުގެ ނަތީޖާ އެއްވަރުކޮށްފަ އެވެ. މި ލަނޑު އެ ޓީމަށް ކާމިޔާބުކޮށްދީފައިވަނީ ބޯހާ އިގްލޭސިއަސް އެވެ. މި މެޗުގައި ބާސެލޯނާ އިން ތިންވަނަ ފަހަރަށް ކުރި ހޯދާފައިވަނީ ފުރަތަމަ ހާފުގެ އިތުރު ވަގުތުގެ ކުޅުމުގައި ލަމީން ޔަމާލް ކާމިޔާބުކޮށްދިން ލަނޑުންނެވެ. އަދި މެޗުގެ 73 ވަނަ މިނިޓުގައި ރަޝްފޯޑް ދިން އިތުރު ޕާހަކުން ލެވަންޑޯސްކީ ވަނީ އިތުރު ލަނޑެއް ޖަހާ މެޗުގެ ނަތީޖާ 4-2 އަށް ބަދަލުކޮށްފަ އެވެ. މި މެޗުގެ އިތުރު ވަގުތުގެ ކުޅުމުގައި ރެފްރީ ވަނީ ބާސެލޯނާގެ ފްރެންކީ ޑިޔޮންގް އަށް ދެވަނަ ރީނދޫ ކާޑަކާއެކު ރަތް ކާޑު ދައްކާ ދަނޑުން ފޮނުވާލާފަ އެވެ.
މި ނަތީޖާ އާއިއެކު ބާސެލޯނާ އަށް ވަނީ ލީގުގައި މިހާތަނަށް ކުޅުނު 12 މެޗުން 28 ޕޮއިންޓާއެކު ތާވަލުގެ އެއްވަނައިގައި އޮތް ރެއާލް މެޑްރިޑާއި ދެމެދުވާ ފަރަގު ތިން ޕޮއިންޓަށް ކުޑަކޮށްފަ އެވެ. ލަލީގާގައި ރޭ ރަޔޯ ވަޔެކާނޯ އާއި ދެކޮޅަށް ރެއާލް މެޑްރިޑް ކުޅުނު މެޗު ނިމިފައިވަނީ އެއްވެސް ޓީމަކަށް ލަނޑެއް ނުޖެހި ދެ ޓީމު އެއްވަރުވެގެންނެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0