Read Time:3 Minute, 32 Second
އިނގިރޭސި ޕްރިމިއާ ލީގުގައި ރޭ އެންމެ ފަހުގެ ޗެމްޕިއަން ލިވަޕޫލް އާއި ދެކޮޅަށް މެންޗެސްޓަރ ސިޓީ ކުޅުނު މެޗު 3-0 ގެ ނަތީޖާއަކުން ލިވަޕޫލް ބަލިކޮށް ސިޓީ ތާވަލުގެ ދެވަނަ މަގާމް ހޯދައިފި އެވެ. މި މެޗުން މޮޅުވުމާއިއެކު ސިޓީ އަށް ވަނީ ލީގުގައި މިހާތަނަށް ކުޅެފައިވާ 11 މެޗުން ލިބިފައިވާ 22 ޕޮއިންޓާއެކު ވަނީ ތާވަލުގެ ދެވަނަ މަގާމް ލިބިފަ އެވެ. އެއްވަނައިގައި އޮތް އާސެނަލް އަށް ލިބިފައިވަނީ 26 ޕޮއިންޓެވެ. އަދި ލިވަޕޫލް އަށް 11 މެޗުން ލިބިފައިވާ 18 ޕޮއިންޓާއެކު އެ ޓީމު އޮތީ ތާވަލުގެ 8 ވަނައިގަ އެވެ. މެންޗެސްޓަރ ސިޓީ ގެ އިއްތިހާދު ސްޓޭޑިއަމްގައި ކުޅުނު މި މެޗުގެ 13 ވަނަ މިނިޓުގައި ސިޓީ އަށް ވަނީ ލީޑު ނަގާނެ ރަގަޅު ފުރުސަތެއް ލިބިފަ އެވެ. އެގޮތުން އޭރިޔާ ތެރެއިން ޖެރެމީ ޑޮކޫ އަށް ލިވަޕޫލްގެ ގޯލުކީޕަރު ޖިއޮޖީ މަމަރްޑާޝްވިލީ ކުރި ފައުލަކާއި ގުޅިގެން އެ ޓީމަށް ލިބުނު ޕެނަލްޓީ އާލިން ހާލަންޑް ފޮނުވާލި ނަމަވެސް ކީޕަރު ވަނީ އެ ޕެނަލްޓީ މަތަކޮށްފަ އެވެ.
މި މެޗުގައި ސިޓީ އިން ލީޑު ނަގާފައިވަނީ މެޗުގެ 29 ވަނަ މިނިޓުގައި އަތިމަތިން މެތިއަސް ނޫނެޒް ހުރަސް ކުރި ބޯޅަ ބޮލުން ޖަހާ ގޯލުގެ ތެރެއަށް ފޮނުވާލައިގެން އާލިން ހާލަންޑް އެވެ. މިއީ އޭނާ މި ސީޒަނުގައި ޖެހި 28 ވަނަ ލަނޑެވެ. ސިޓީ އިން ލަނޑެއް ޖަހާ ލީޑު ނެގިތާ ގިނައިރުތަކެއް ނުވަނީސް ލިވަޕޫލްގެ ވެންޑައިކް ވަނީ ލަނޑެއް ޖަހާފަ އެވެ. ނަމަވެސް ވީޑިއޯ ބެލުމަށްފަހު ރެފްރީ ވަނީ އެއީ އޮފްސައިޑް ލަނޑެއް ކަމަށް ނިންމާފަ އެވެ. މެންޗެސްޓަރ ސިޓީ އިން މި މެޗުގައި ލީޑު ފުޅާ ކޮށްފައިވަނީ މެޗުގެ ފުރަތަމަ ހާފުގެ އިތުރު ވަގުތުގައި ނިކޯ ގޮންޒަލޭޒް ކާމިޔާބުކޮށްދިން ލަނޑުންނެވެ.
އަދި މެޗުގެ 63 ވަނަ މިނިޓުގައި ޖެރެމީ ޑޮކޫ ވަނީ އިތުރު ލަނޑެއް ޖަހާ މެޗުގެ ނަތީޖާ 3-0 އަށް ބަދަލުކޮށްފަ އެވެ. މި ނަތީޖާ ސިޓީގެ ކޯޗު ޕެޕް ގަޑިއޯލާއަށް ހާއްސަ ވެގެންދަނީ މިއީ އޭނާ ކޯޗެއްގެ ގޮތުގައި ކްލަބަކަށް އިރުޝާދު ދިން 1000 ވަނަ މެޗެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0