ސަންޑަލޭންޑް އިން އާސެނަލް ހިފަހައްޓައިފި

Read Time:3 Minute, 11 Second

އިނގިރޭސި ޕްރިމިއާ ލީގުގައި ރޭ އާސެނަލް އާއި ދެކޮޅަށް ސަންޑަލޭންޑް ކުޅުނު މެޗު 2-2 ގެ ނަތީޖާއަކުން އެއްވަރުވެއްޖެ އެވެ. ޕްރިމިއާ ލީގުގެ އިތުރުން ޗެމްޕިއަންސް ލީގާއިއެކު އެންމެ ފަހުން ކުޅުނު 10 މެޗުންވެސް މޮޅުވެފައިވާ އާސެނަލްގެ އެރެކޯޑަށް މި ނަތީޖާ އާއިއެކުވަނީ ނިމުން އައިސްފަ އެވެ. އަދި ބައިކޮޅަށް ލަނޑެއް ނުވަދެ އަށް މެޗު ކުޅުމަށްފަހު އެ ރެކޯޑަށްވެސް ވަނީ ނިމުން އައިސްފަ އެވެ. ސަންޑަލޭންޑްގެ ސްޓޭޑިއަމް އޮފް ލައިޓްގައި ސާޅީސް ހަ ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގެ 36 ވަނަ މިނިޓުގައި ސަންޑަލޭންޑްގެ ޑޭން ބަލާޑް ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ.

އާސެނަލް އިން މި މެޗުގެ ނަތީޖާ އެއްވަރުކޮށްފައިވަނީ ދެވަނަ ހާފުގެ ކުޅުން ފެށުނުތާ 9 ވަނަ މިނިޓުގައި މިކޭލް މެރީނޯ ދިން ޕާހަކުން ބުކަޔޯ ސަކާ ކާމިޔާބުކޮށްދިން ލަނޑުންނެވެ. އަދި މެޗުގެ 74 ވަނަ މިނިޓުގައި ލިއަންދްރޯ ޓްރޮސާޑް ކާމިޔާބުކޮށްދިން ލަނޑާއެކު އާސެނަލް އިން ވަނީ މި މެޗުގައި ފުރަތަމަ ފަހަރަށް ކުރި ހޯދާފަ އެވެ. މި ލަނޑަށްފަހު ސަންޑަލޭންޑް އިން ލަނޑު ޖަހާ މެޗުގެ ނަތީޖާ އެއްވަރު ކުރުމަށް ރަގަޅު ދެ ފުރުސަތެއް ލިބުނު ނަމަވެސް އާސެނަލްގެ ގޯލުކީޕަރު ޑޭވިޑް ރާޔާ ވަނީ އެ ދެ ހަމަލާވެސް މަތަކޮށްފަ އެވެ. ސަންޑަލޭންޑް އިން މެޗުގެ ނަތީޖާ އެއްވަރުކޮށްފައިވަނީ މެޗުގެ ފުރިހަމަ ވަގުތު ހަމަވެ އިތުރު ވަގުތުގެ ކުޅުމުގައި ބްރަޔަން ބްރޮބޭ ކާމިޔާބުކޮށްދިން ލަނޑުންނެވެ.

މި ނަތީޖާ އާއިއެކު އާސެނަލް އަށް ވަނީ ލީގުގައި މިހާތަނަށް ކުޅުނު 11 މެޗުން 26 ޕޮއިންޓާއެކު ތާވަލުގެ އެއްވަނަ މަގާމް ލިބިފަ އެވެ. ސަންޑާލެންޑަށް 11 މެޗުން ލިބިފައިވާ 19 ޕޮއިންޓާއެކު އެ ޓީމު އޮތީ ތާވަލުގެ ހަތަރުވަނައިގަ އެވެ.