Read Time:4 Minute, 20 Second
ނަސްރުގެ ދުވަހާ ގުޅިގެން ބޭއްވި އަސްކަރީ ހުށަހެޅުމެއްގައި ވާހަކަފުޅުދައްކަވަމުން ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހިމް ޙިލްމީ ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަކީ އަސްކަރިއްޔާގެ ޤާބިލްކަން އިތުރުކުރައްވައި، ސިފައިންގެ ޤުރުބާނީގެ އަގުވަޒަންކުރައްވާ ލީޑަރެއް ކަމަށެވެ. އަދި 1988 ވަނަ އަހަރު ނޮވެމްބަރު މަހުގެ 3 ވަނަ ދުވަހު ރާއްޖެއަށް ދިން އުދުވާނީ ހަމަލާއިން ޤައުމު ސަލާމަތްކުރުމަށް ސިފައިންވި މަތިވެރި ޤުރުބާނީގެ ހަނދާންތައް އައުކުރައްވައި، އެއީ ދުވަހަކުވެސް ފަނޑުނުވާނެ ދީނީ އަދި ޤައުމީ ޚިދުމަތެއް ކަމަށް ވިދާޅުވިއެވެ.
ޗީފް އޮފް ޑިފެންސް ފޯސް ފާހަގަކުރެއްވީ ރައީސް މުޢިއްޒު ވަނީ ނަސްރުގެ ދުވަސް މީގެކުރިން ފާހަގަކުރަމުން އައި އާދައިގެ ގޮތް ބަދަލުކުރައްވައި، ޤައުމުގައި އެންމެ ކުލަގަދަކޮށް ފާހަގަކުރެވޭ ދުވަހަކަށް ހައްދަވާފައިވާކަމެވެ. އެމަނިކުފާނަކީ ސިފައިންގެ މަތިވެރި ޚިދުމަތާއި، ނޮވެމްބަރު 3 ގައި ޤައުމުގެ މިނިވަންކަން ދިފާޢުކުރުމަށް ޝަހީދުވި ފަރާތްތަކުގެ އަގުވަޒަންކުރައްވާ ލީޑަރެއް ކަމުގައިވެސް ޗީފް އޮފް ޑިފެންސް ފޯސް ވިދާޅުވިއެވެ. މިނިވަންކަން ދިފާއުކުރެވޭނެ ޤާބިލްކަން އަސްކަރިއްޔާއަށް ހޯއްދަވައިދެއްވައި، ފާއިތުވި މާޒީގައި ސިފައިންވި ޤުރުބާނީގެ އަގުވަޒަންކުރައްވާތީ ސިފައިންނާއި އެންމެހާ ދިވެހިންގެ ނަމުގައި ރައީސުލްޖުމްހޫރިއްޔާއަށް ޝުކުރު ދެންނެވިއެވެ.
ނޮވެމްބަރު 3 ގެ ހާދިސާއިން ލިބޭ މުހިންމު ފިލާވަޅަކީ މިނިވަންކަން ދިފާޢުކުރުމަށް އަބަދުވެސް ތައްޔާރަށް އޮންނަ އަސްކަރީ ގޮތުން ޤާބިލް ފައުޖެއް އޮތުމުގެ މުހިންމުކަން ކަމަށާއި، ރައީސުލްޖުމްހޫރިއްޔާ ގެންދަވަނީ އަސްކަރިއްޔާއަށް މީގެކުރިން ގެނެސްފައިނުވާފަދަ ތަރައްޤީއާއި ކުރިއެރުން ގެނެސްދެއްވަމުން ކަމަށް ޗީފް އޮފް ޑިފެންސް ފޯސް ވިދާޅުވިއެވެ. އެމަނިކުފާނު މި މަސައްކަތް ކުރައްވަނީ ރާއްޖެއަކީ މިނިވަން އަދި އަމިއްލަ ބާރުވެރި ޤައުމެއްގެ ގޮތުގައި ބޭއްވުމުގެ މަތިވެރި މަޤްޞަދުގައި ކަމަށްވެސް އެމަނިކުފާނު ފާހަގަކުރެއްވިއެވެ.
ނަސްރުގެ ދުވަހުގެ އަސްކަރީ ހުށަހެޅުމުގައި ދިވެހި އަސްކަރިއްޔާއަށް އެންމެފަހުން ގެނެސްފައިވާ ޑްރޯން، މަނަވަރު އަދި އަރމަޑް ވެހިކަލްފަދަ ޒަމާނީ އަސްކަރީ އުޅަނދުތައް ވަޔާއި، ކަނޑާއި، އެއްގަމުގައި ދައްކާލާފައިވެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0