ހާލަންޑް އެހުރީ މެސީ އާއި ރޮނާލްޑޯގެ ފެންވަރުގައި: ގާޑިއޯލާ

Read Time:3 Minute, 48 Second

މެންޗެސްޓާ ސިޓީގެ ފޯވަޑް އާލިން ހާލަންޑް މިހާރު އެ ހުރީ ދުނިޔޭގެ އެންމެ މޮޅު ދެ ކުޅުންތެރިންގެ ފެންވަރުގައި ކަމަށް އޭނާގެ ކޯޗު ޕެޕް ގާޑިއޯލާ ބުނެފި އެވެ. ދުނިޔޭގެ އެންމެ މޮޅު ދެ ކުޅުންތެރިންނަކީ އާޖެންޓީނާގެ ކެޕްޓަން ލަޔޮނަލް މެސީ އާއި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އެވެ. މެސީ ބާސެލޯނާގައި އަދި ރޮނާލްޑޯ މެންޗެސްޓާ ޔުނައިޓެޑާއި ރެއާލް މެޑްރިޑުގައި ދެއްކި މޮޅު ކުޅުމަކީ ދުނިޔޭގެ އަޖައިބެއް ކަމަށް ގިނަ ބަޔަލު ދެކެ އެވެ. ގާޑިއޯލާ ބުނީ ޕްރެމިއާ ލީގުގައި މިހާތަނަށް ކުޅުނު މެޗުތަކުން 11 ގޯލާއެކު ހާލަންޑް ގޯލު ލިސްޓުގެ ކުރީގައިވަނީ މެސީ އާއި ރޮނާލްޑޯ އެ ދެ ކުޅުންތެރިންގެ އެންމެ ޕާކް ދުވަސްވަރު ގޯލު ފަދައިން ކަމަށެވެ.

“107 މެޗުން އޭނާ މިވަނީ 98 ގޯލު ޖަހާފައި. އޭނާގެ ނަންބަރުތަކަށް ބަލާއިރު ހުރިހާ ގޮތަކުން ވެސް ތަފާތު. ގަބޫލު ކުރަން ވެސް ދަތި އޭނާގެ ތަފާސް ހިސާބު މިހާ ކުރީގައި އުޅުމުން،” ގާޑިއޯލާ ބުންޏެވެ. ބާސެލޯނާގައި މެސީ އަށް ކޯޗުކޮށްދިން ގާޑިއޯލާ ބުނީ މެސީ އާއި ރޮނާލްޑޯގެ ތަފާތަކީ ކޮންމެ މެޗެއްގައި ވެސް އެކެއް ނޫނީ ދެ ގޯލު ޖެހުން ކަމަށާއި މިހާރު ހާލަންޑް ވެސް އެކަން ކުރަން ފަށައިފި އެވެ. “އެ ދެ ކުޅުންތެރިން ތަފާތަކީ އެ ދެ މީހުން 15 ވަރަކަށް އަހަރު އެއް ފެންވަރެއްގައި އެގޮތުގައި ހިފެހެއްޓުން. މެސީ އަށް މިހާރު ބަލާ. އޭނާ އެދަނީ އެމެރިކާ ލީގުގައި ކޮންމެ ދުވަހަކު ގޯލު ޖަހަމުން. ރޮނާލްޑޯ ވެސް ސައޫދީގައި އެދަނީ އެކަން ކުރަމުން. އަހަރެން ބުނާނީ ހާލަންޑް ވެސް މިހާރު މިތަނުގައި އެކަން ކުރަން ފަށައިފި ކަމަށް. އަހަރެން ކުރިން ވެސް ބުނިން އޭނާ އަށް ކޯޗުކޮށްދިނުމަކީ ލިބޭ އުފަލެކޭ،” ގާޑިއޯލާ ބުންޏެވެ.

މެންޗެސްޓާ ސިޓީ އަށް 100 ގޯލު ހަމަކުރަން ހާލަންޑް ބޭނުންވަނީ މިހާރު އެންމެ ދެ ގޯލެވެ. މި ސީޒަނުގައި ޕްރެމިއާ ލީގުގައި އޭނާ 11 ގޯލު ޖަހާފައިވާއިރު އެންމެ ގާތުން ވާދަ ކުރާ ކުޅުންތެރިން ޖަހާފައިވަނީ 6 ގޯލެވެ. އަދި އޭނާ ކުރިއަށް އޮތް މެޗުގައި 100 ގޯލު ހަމަކޮށްފިނަމަ ހާލަންޑް ވެގެންދާނީ އެންމެ އަވަހަށް ޕްރެމިއާ ލީގުގައި 100 ގޯލު ޖެހި ކުޅުންތެރިޔާ އަށެވެ.