ހިއްކާ ބިންތައް ބޭނުންކޮށްގެން ބޭރު ފައިސާ އާއި އިންވެސްޓްމަންޓް ހޯދޭނެ: ޖާބިރު

Read Time:4 Minute, 12 Second

ފޮޓޯ ކްރެޑިޓްސް: ސަން

ރާއްޖޭގެ އެކިކަންކޮޅުތަކުގައި ބިން ކުއްޔަށް ދީގެންނާއި އެ ބިންތައް ބޭނުންކޮށްގެން ރާއްޖެއަށް އިންވެސްޓްމަންޓާއި ބޭރު ފައިސާ ހޯދިދާނެ ކަމަށް މަޝްހޫރު ވިޔަފާރިވެރިޔާ އަބްދުﷲ ޖާބިރު ވިދާޅުވެއްޖެއެވެ. އަންނަ އަހަރަށް ސަރުކާރުން ހުށަހެޅި 64.2 ބިލިއަން ރުފިޔާގެ ބަޖެޓަކީ ގައުމަށް ފައިދާކުރާނެ ރަނގަޅު ބަޖެޓެއް ކަމަށް ވިދާޅުވެ، ރައީސް ޑރ. މުހައްމަދު މުއިއްޒަށް ޝުކުރުއަދާކުރެއްވިއެވެ. ޖާބިރު ވިދާޅުވީ، މިހާރު ރާއްޖޭގެ އާމްދަނީ މައިގަނޑު ގޮތެއްގައި ބަރޯސާވެފައިވަނީ ފަތުރުވެރިކަމަށް ކަމަށާއި، އާމްދަނީގެ މަގުތައް ފުޅާކުރުމަށް ސަރުކާރުން ވިސްނުންތަކެއް ގެންގުޅެން ޖެހޭ ކަމަށެވެ. އެގޮތުން، ހިއްކާފައިވާ ބިންތަކާއި ހުއްޓިފައިވާ ރިސޯޓްތައް ތަރައްގީކޮށް ބޭނުންކޮށްގެން ބޭރުގެ އިންވެސްޓްމަންޓްތައް ގެނެވިދާނެ ކަމަށާއި، ބޭރު ފަރާތްތަކަށް ދިގު މުއްދަތަކަށް ބިން ކުއްޔަށް ދިނުމުން އެ ބިންތަކަށް އިންވެސްޓްކޮށް ބޭރު ފައިސާ ރާއްޖެއަށް ވަންނާނެ ކަމަށް އޭނާ ފާހަގަކުރެއްވިއެވެ.

ފައިނޭންސް ނުލިބުމުގެ ސަބަބުން ގިނަ ރަށްތަކެއް ހުއްޓިފައިވާތީ، މިފަދަ ރަށްތައް ސަރުކާރުން ނުވަތަ ބައިނަލްއަގްވާމީ ކުންފުނިތަކާ ހަވާލުކޮށް މެނޭޖްކުރުމަކީ އާމްދަނީ އިތުރުކުރެވޭނެ ގޮތެއް ކަމަށް ޖާބިރު ގޮވާލެއްވިއެވެ. މީގެ އިތުރުން ހިއްކާފައިވާ ބިންތަކުގެ ބޭނުން ނުކުރާ ބައި ނުވަތަ އިތުރު ވެފައިވާ ބައި ކޮމާޝަލީ ކުއްޔަށް ދޫކޮށްގެން ދައުލަތަށް ފައިދާ ނަގަން ޖެހޭ ކަމަށް ވެސް އޭނާ ހުށަހެޅުއްވިއެވެ.

ރާއްޖޭގައި އުފައްދާ އެއްޗެއް ނެތުމުން، ގައުމަށް ލިބެން އޮންނަ ފައިދާ ދައުލަތުން ނަގަން ޖެހޭ ކަމަށާއި، ބޭރުގެ ފަރާތްތަކަށް ވެސް ބިން ގަނެގެން ނުވަތަ ކުއްޔަށް ނަގައިގެން ބިންތައް ތަރައްގީކުރުމުގެ ފުރުސަތު ދޭންވީ ކަމަށް ޖާބިރު ވިދާޅުވިއެވެ. ބޭރުގެ ބޭންކުތަކުން ރަށްރަށުގެ މިލްކުވެރިކަން ސަރުކާރަށް އޮންނާތީ މޯގޭޖް ގަބޫލުނުކުރާ މައްސަލައަށް ހައްލެއް ހޯދައި، ސަރުކާރުގެ ބޭންކުތަކުން ނުވަތަ ފިނޭންސް މިނިސްޓްރީއިން އުސޫލުތަކެއްގެ ދަށުން ލޯނު ދެވިދާނެ ކަމަށް އޭނާ ވިދާޅުވިއެވެ. މިފަދަ ކަންކަން ކޮށްގެން ފޮރިން އިންވެސްޓްމަންޓްތައް ރާއްޖެއަށް ގެނެސް، ގައުމަށް ޑޮލަރު ވަންނަން ފަށާނެ ކަމަށް ޖާބިރު ހާމަކުރެއްވިއެވެ.