Read Time:3 Minute, 55 Second
(ފޮޓޯ ކްރެޑިޓްސް: ރައީސް އޮފީސް)
ދުންފަތުގެ އިސްތިއުމާލު ކުރުމާ ދެކޮޅަށް ރާއްޖެއިން މިހާތަނަށް އަޅާ އެންމެ ބޮޑު ފިޔަވަޅު ކަމަށްވާ “ޖެނެރޭޝަނަލް ބޭން” އަށް މިއަދުން ފެށިގެން އަމަލުކުރަން ފަށައިފި އެވެ. މި އުސޫލުގެ ދަށުން 2007 ވަނަ އަހަރުން ފެށިގެން އުފަންވެފައިވާ ކުދިންނަށް އަދި ކުރިއަށް އޮތްތަނުގައި އުފަންވާ ކުދިންނަށް ދުންފަތުގެ ބާވަތްތައް ވިއްކުން މަނާވާނެ އެވެ. ދުންފަތް ވިއްކޭނެ އެންމެ ހަގު އުމުރު 18 އަހަރުން 21 އަހަރަށް މަތިކޮށްފައިވީ ނަމަވެސް، މި އާ އިސްލާހުގެ ސަބަބުން 2007 ގައި އުފަންވެފައިވާ ކުއްޖެއްގެ އުމުރުން 21 އަހަރު ފުރުނަސް އެފަދަ ބާވަތްތައް އެކުއްޖާއަށް ވިއްކުމަކީ މަނާކަމެކެވެ.
މި ބިލް ތަސްދީގު ކުރެއްވުމަށްފަހު ރައީސް ޑރ. މުހައްމަދު މުއިއްޒު ވިދާޅުވީ އެ މަނިކުފާނުގެ ސިޔާސަތަކީ ދިވެހި މުޖުތަމައަކީ ސިއްހަތު ރަނގަޅު، ދުޅަހެޔޮ ބަޔަކު ދިރިއުޅޭ ގައުމަކަށް ހެދުން ކަމަށާއި، މިފަދަ ނުރަނގަޅު އާދަތައް އެންމެން ގުޅިގެން ނައްތާލެވިދާނެ ކަމަށެވެ. ކަސްޓަމްސް އިން ހިއްސާކޮށްފައިވާ މައުލޫމާތުތަކަށް ބަލާއިރު، ރާއްޖެއަށް އަހަރަކު އެވްރެޖުކޮށް 500 މިލިއަނެއްހާ ސިނގިރޭޓް އެތެރެކުރުމަށް ބިލިއަނަކަށް ވުރެ ގިނަ ރުފިޔާ ހޭދަކުރެ އެވެ. އަދި ސިއްހީ ހިދުމަތްތައް ދެމެހެއްޓުމަށް ޖީޑީޕީގެ 9.7 ޕަސެންޓު ނުވަތަ ބަޖެޓުގެ 19 ޕަސެންޓް ހޭދަކުރެ އެވެ. ހެލްތު މިނިސްޓްރީން ފާހަގަކުރާ ގޮތުގައި ދުންފަތުން މީހުން ރައްކާތެރިކޮށް ދުންފަތާ ދުރު ޖީލެއް ބިނާކުރެވިއްޖެނަމަ ބަލިތަކަށް ކުރާ ހޭދަ ކުޑަވެ، އާއްމުންގެ ދުޅަހެޔޮކަން އިތުރުވާނެ އެވެ.
ހަތަރު އަހަރު ކުރިން ނެގި ސްޓެޕްސް ސާވޭ އިން ދައްކާ ގޮތުގައި ރާއްޖޭގެ ކޮންމެ ހަތަރު މީހަކުން އެކަކު ދުންފަތުގެ އިސްތިއުމާލު ކުރެ އެވެ. އަދި 2019 ވަނަ އަހަރު ހެދި ގްލޯބަލް ޔޫތު ޓޮބޭކޯ ސާވޭއިން ދައްކާ ގޮތުގައި ސްކޫލު އުމުރުގެ ގާތްގަނޑަކަށް 45 ޕަސެންޓް ކުދިން ދުންފަތުގެ ކޮންމެވެސް ބާވަތެއް ބޭނުންކުރެ އެވެ. ދުޅަހެޔޮ ޖީލެއް ބިނާކުރުމަށް ކުރާ މަސައްކަތުގެ ތެރެއިން ވޭޕާއި އީ-ސިނގިރޭޓު އެތެރެކުރުން ވެސް ވަނީ މިދިޔަ އަހަރުގެ ނޮވެމްބަރު 15 އިން ފެށިގެން މަނާކޮށްފަ އެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0