އަމޮރިމްއަށް ތިން އަހަރު ދޭންޖެހޭ ކަމަށް ރެޓްކްލިފް ބުނެފި

Read Time:3 Minute, 29 Second

މެންޗެސްޓާ ޔުނައިޓެޑުގެ ކޯޗު ރުބެން އަމޮރިމްއަކީ މޮޅު ކޯޗެއްކަން ސާބިތުކޮށްދިނުމަށް އޭނާއަށް ތިން އަހަރު ދުވަސް ދޭންޖެހޭނެ ކަމަށް އެ ޓީމުގެ ކޯ-އޯނަރ ސަރ ޖިމް ރެޓްކްލިފް ބުނެފިއެވެ. މިދިޔަ އަހަރުގެ ނޮވެމްބަރ މަހު މެންޗެސްޓަރ ޔުނައިޓެޑްގެ ކޯޗު ކަމާއި ހަވާލުވި އަމޮރިމް އެ ޓީމާއިއެކު މަސައްކަތް ކުރާތާ އަންނަ މަހަށް އެއް އަހަރު ފުރޭނެ އެވެ. ޕޯޗުގަލްގެ ސްޕޯޓިން ގައި ގިނަ ކާމިޔާބީތަކެއް ހޯދުމަށްފަހު މެންޗެސްޓަރ ޔުނައިޓެޑާއި ގުޅުނު ފަހުން އޭނާއަށް ވަނީ އެދެވޭ ނަތީޖާތަކެއް ނުހޯދިފަ އެވެ. މިދިޔަ ސީޒަނުގައި 15 ވަނައިގައި އޮވެ ޕްރިމިއާ ލީގު ނިންމާލިއިރު މިއީ 74-1973 ވަނަ އަހަރުގެ ސީޒަނުގައި މެންޗެސްޓަރ ޔުނައިޓެޑް ޕްރިމިއާ ލީގުން ރެލިގޭޓްވި ފަހުން އެ ކްލަބަށް ލިބިފައިވާ އެންމެ ދަށް ނަތީޖާ އެވެ.

ނިމިގެންދިޔަ ހޫނު މޫސުމުގައި 200 މިލިއަން ޕައުންޑް ޚަރަދުކޮށް ގިނަ ކުޅުންތެރިންތަކެއް އެ ކްލަބަށް ގެނައި ނަމަވެސް މި ސީޒަނުގައިވެސް މިހާތަނަށް ހަތް މެޗު ކުޅެފައިވާއިރު ޔުނައިޓެޑަށް ވަނީ އެދެވޭ ނަތީޖާތަކެއް ނުހޯދިފަ އެވެ. ޕްރިމިއާ ލީގުގެ ތިން މެޗުން ބަލިވެފައިވާއިރު އިނގިރޭސި ލީގު ކަޕްގައި ވަނީ ދެވަނަ ޑިވިޝަނުގެ ޓީމެއްގެ އަތުން ބަލިވެ މުބާރާތުން ކަޓާފަ އެވެ. ޓައިމްސް އަށް ދިން އިންޓަވިއުއެއްގައި ރެޓްކްލިފް ބުނެފައިވަނީ އަމޮރިމް އަށް މިއީ އުނދަގޫ ދުވަސްތަކެއް ކަމަށާއި ނަމަވެސް އޭނާއަށް އިތުރު ވަގުތު ބޭނުންވާ ކަމަށެވެ.

“މިއީ އޭނާއަށް އަދި އެންމެ ރަގަޅު ސީޒަނެއް ނޫން. އަހަރެން ގަބޫލުކުރާ ގޮތުގައި އޭނާއަށް ތިން އަހަރުގެ ތެރޭގައި އެއީ މޮޅު ކޯޗެއްކަން ސާބިތުކޮށްދެވޭނެ.” ރެޓްކްލިފް ބުންޏެވެ. މެންޗެސްޓަރ ޔުނައިޓެޑްގެ މެޗުތައް ދިރާސާ ކުރާ ގިނަ ފަރާތްތަކަކުން ބުނެފައިވަނީ އެ ކްލަބުގައި އަމޮރިމް ކުޅުވަން މަސައްކަތް ކުރާ ގޮތަށް އޭނާއަށް އެ ކްލަބުގައި އެކަށީގެންވާ ނަތީޖާ ނުހޯދޭނެ ކަމަށެވެ.