ވޯލްޑް ކަޕް ބޯޅަ “ޓްރައިއޮންޑާ” ދައްކާލައިފި

Read Time:3 Minute, 17 Second

އަންނަ އަހަރު ބާއްވާ ފީފާ ވޯލްޑް ކަޕް ފުޓްބޯޅަ މުބާރާތުގެ ރަސްމީ ބޯޅަ ދައްކާލައިފިއެވެ. އެމެރިކާ އާއި މެކްސިކޯ އަދި ކެނެޑާ ގުޅިގެން ބާއްވާ މުބާރާތުގެ ރަސްމީ ބޯޅަ ދައްކާލީ އެމެރިކާގެ ނިއު ޔޯކުގައެވެ. ތިން ގައުމެއްގައި މުބާރާތް ބޭއްވި ނަމަވެސް މުބާރާތުގެ މައިގަނޑު ހަރަކާތްތައް ކުރިއަށް ދަނީ ދުނިޔޭގެ އެންމެ ބާރުގަދަ ގައުމު ކަމަށްވާ އެމެރިކާގައެވެ. މި ފަހަރުގެ ބޯޅަ ތައްޔާރުކޮށްފައިވަނީ ހަތަރު ފިތް ހިމެނޭ ގޮތަށެވެ. މި ހުރިހާ ފިތްތައް ގުޅުވާލާއިރު ބޯޅައިގެ މެދަށް ޓްރައިއެންގަލެއްގެ ސިފަ ގެނެސްދެ އެވެ. ބޯޅައިގައިވާ ތިން ކުލަ އަކީ މެކްސިކޯގެ ފެހި ކުލަ އާއި ކެނެޑާގެ ރަތް ކުލަ އާއި އެމެރިކާގެ ނޫކުލަ އެވެ. މެކްސިކޯ ދިދާގައިވާ ފެހިކަމާއި ކެނެޑާގެ ދިދައިގައިވާ ފަތާއި އެމެރިކާގެ ދިދާގައި ހުންނަ ތަރިތައްވެސް ބޯޅައިގައި އެ ގައުމަކަށް ހާއްސަކޮށްފައިވާ ބައިގައި ހިމަނާފައިވެ އެވެ.

މި ބޯޅައަށް “ޓްރައިއޮންޑާ” ކިޔާފައިވަނީ ތިން ގައުމެއްގައި މުބާރާތް ބާއްވާތީ އެވެ. އިނގިރޭސި ބަހުން ޓްރައިގެ މާނައަކީ ތިނެކެވެ. ސްޕޭން ބަހުން އޮންޑާގެ މާނައަކީ ރާޅެވެ. ބޯޅަ ތައްޔާރުކޮށްފައިވަނީ ވާރެ އާއި އަވީގައި ބޯޅައިގެ އަސްލަށް ބަދަލު ނާންނަގޮތަށް ގެންގުޅެން ފަސޭހަ ގޮތަކަށެވެ. އަދި ބޯޅައިގެ އެތެރޭގައި ރެފްރީންނަށް ސިގްނަލް ފޯރުކޮށްދިނުމަށާއި މައުލޫމާތު އެއްކުރުމަށް ހާއްސަ ޗިޕެއް ލައްވާނެ އެވެ. މި ބޯޅަ ތައްޔާރުކޮށްދީފައިވަނީ މަޝްހޫރު އެޑިޑާސް ކުންފުނިންނެވެ. އެއީ 1970 ވަނަ އަހަރުން ފެށިގެން ވޯލްޑް ކކަޕުގެ ބޯޅަ ތައްޔާރުކޮށްދޭ ކުންފުންޏެވެ. އެމެރިކާގައި ބާއްވާ މުބާރާތަކީ ތާރީހީ މުބާރާތެކެވެ. މިއީ ތިން ގައުމެއް ކުޅިގެން މުބާރާތް ބާއްވާ ފުރަތަމަ ފަހަރެވެ. އަދި މިއީ 48 ގައުމު ބައިވެރިކޮށްގެން މުބާރާތް ކުޅޭ ފުރަތަމަ ފަހަރެވެ.