ރަނގަޅު ގޮތަކީ މަގާމުތަކުގައި ތިބިއިރު ކޮރަޕްޝަން ހުއްޓުވަން އުޅުން: އިހުސާން

Read Time:4 Minute, 34 Second

(ފޮޓޯ ކްރެޑިޓްސް: މިހާރު)

ކޮރަޕްޝަން ހުއްޓުވަން އެންމެ ރަނގަޅު ގޮތަކީ ޒިންމާދާރު މަގާމުތަކުގައި ތިބޭއިރު އެކަމާ ދެކޮޅަށް މަސައްކަތް ކުރުން ކަމަށް ވިދާޅުވެ ހޯމް މިނިސްޓަރު އަލީ އިހުސާން އިދިކޮޅު ފަރާތްތަކަށް ރައްދު ދެއްވައިފި އެވެ. އެކްސްގައި ކުރެއްވި ޕޯސްޓެއްގައި އިހުސާން މިހެން ވިދާޅުވެފައި މިވަނީ ކޮރަޕްޝަނާ ދެކޮޅަށް އިދިކޮޅު އެމްޑީޕީން އިސްވެ، މާލޭގައި ބޮޑު އެއްވުމެއް ވެސް ބާއްވަން ތައްޔާރުވަމުންދަނިކޮށެވެ. އިހުސާން ވިދާޅުވީ ޒިންމާދާރު މަގާމުތަކުގައި ތިއްބަވާއިރު ކޮރަޕްޝަން ހުއްޓުވަން އަޅަންޖެހޭ ފިޔަވަޅުތައް އެޅުމާ އެކު ކޮރަޕްޝަންގެ އަމަލު ހިންގާ ފަރާތްތަކުގެ މައްޗަށް ގާނޫނު ތަންފީޒުކުރުމަކީ ކޮރަޕްޝަން ހުއްޓުވުމަށް އެޅޭނެ އެންމެ ރަނގަޅު ފިޔަވަޅު ކަމަށެވެ.

މި ސަރުކާރުން މަސައްކަތް ކުރަމުންދަނީ ކޮރަޕްޝަން ހުއްޓުވުމަށް ކަމަށް ވިދާޅުވެ އިހުސާން ވަނީ ފާއިތުވި 15 އަހަރު ސަރުކާރު ހިންގުމަށް ލިބި އެކަން ނުކޮށް ތިބި ފަރާތްތަކުން މަގުތަކަށް މީހުން ނެރެގެން ކުރަން އުޅެނީ ކޮން ކަމެއްތޯ ރައްޔިތުން ވެސް ވިސްނާލަން ޖެހޭ ކަމަށެވެ. މަގާމުތަކުގައި އެ ބޭފުޅުން ތިބިއިރު ކޮރަޕްޝަން ހުއްޓުވަން ކުރެވުނީ ކޮން ކަމެއްތޯ އިހުސާން ސުވާލު އުފެއްދެވި އެވެ.

Corruption huttuvumah emme rangalhu gothaky zimmaadhaaru maqaamuthakugai thibey iru Corruption huttuvumah alhan jehey fiyavalhu elhumaai corruption ge amalu hingaa faraaiyythakuge mahchah qaanoonu thanfeezu kurun. Alhugandumen midhany e masahkaiyy kuramun. Mi fursathu faaithuvi…

— Minister of Homeland Security & Technology (@min_mohst) September 30, 2025

އިހުސާން އެހެން ވިދާޅުވިއިރު އެމްޑީޕީގެ ވެރިކަމުގައި ފެނަކަ ކޯޕަރޭޝަންގެ މެނޭޖިން ޑިރެކްޓަރަކަށް ހުންނެވި އަހުމަދު ސައީދުގެ މައްޗަށް މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދައި ދިނުމުގެ ކުށުގައި ހަތަރު އަހަރުގެ ޖަލު ހުކުމެއް މި ހަފްތާގައި ވަނީ ކްރިމިނަލް ކޯޓުން ހުކުމްކޮށްފަ އެވެ. އަދި ކުރީގެ ރައީސް އަބްދުﷲ ޔާމީންގެ ވެރިކަމުގައި މޯލްޑިވް ގޭސްގެ މެނޭޖިން ޑިރެކްޓަރު އަބްދުﷲ މައުމޫންގެ މައްޗަށް ކުރި ރިޝްވަތުގެ ދެ ދައުވާއެއް ސާބިތުވެ، އޭނާ 12 އަހަރަށް ޖަލަށްލާން އެ ކޯޓުން ހުކުމްކޮށްފައިވެ އެވެ.

އިދިކޮޅުން ދަނީ “ލޫޓުވައިފި ލޫޓުވައިފި” ނަމުގައި ހުކުރު ދުވަހު ހަވީރު މާލޭގައި ބޮޑު އެއްވުމަކަށް ތައްޔާރުވަމުންނެވެ. އެ ހަރަކާތާ ގުޅިގެން އެކްސްގައި ކުރީގެ ރައީސް މުހައްމަދު ނަޝީދު ކުރެއްވި ޓްވީޓުގައި ވަނީ އެއީ ވަކި ޕާޓީއެއްގެ ހަރަކާތެއްގެ ގޮތުގައި ނުދެކުމަށާއި އެ ހަރަކާތަކީ ކޮރަޕްޝަނާ ދެކޮޅު ހުރިހާ އެންމެން ވެސް ބައިވެރިވުން މުހިއްމު މުޒާހަރާއެއް ކަމަށް ވިދާޅުވެ، އެންމެނަށް ދައުވަތު ދެއްވައިފަ އެވެ.