Read Time:4 Minute, 12 Second
އަންނަ މަހުގެ 3 ވަނަ ދުވަހު އިދިކޮޅު އެމްޑީޕީން ސަރުކާރާ ދެކޮޅަށް ބާއްވަން ރާވާފައިވާ “ލޫޓުވައިފި” މުޒާހަރާއަށް މެމްބަރުންގެ ތަރުޙީބު ކުޑަވެފައިވާކަން ފާހަގަކުރެވެއެވެ. މިކަމުގެ މައިގަނޑު ސަބަބަކީ، އޯޑިޓް ރިޕޯޓުން އެމްޑީޕީގެ ވެރިކަމުގައި ފެނަކައިގައި ހިނގާފައިވާ ބޮޑު ޚިޔާނާތެއް ފަޅާއެރުމެވެ. މި ރިޕޯޓާއެކު ރައްޔިތުންގެ އިތުބާރު ގެއްލި، “ލޫޓުވައިލީ” ކޮން ބަޔެއްތޯ މިހާރު ސާފުވެއްޖެ ކަމަށް ބެލެވެއެވެ. އެމްޑީޕީގެ ވެރިކަމުގެ ފަސް އަހަރު ދުވަހުގެ ތެރޭގައި ދައުލަތުގެ މާލީ ހާލަތު ދަށްވެ، ނޮވެންބަރު 2018 އިން ފެށިގެން އެމްޑީޕީގެ އިސްވެރިންގެ މަސްލަހަތު އޮތް ކުންފުނިތައް ކަމަށްވާ ބިގް، ދީބާޖާ، އަދި ނޫމަޑި ފަދަ ކުންފުނިތަކަށް ބަދަލުގެ ގޮތުގައި ބިލިއަނަކަށްވުރެ ގިނަ ރުފިޔާ ދޫކުރިއެވެ. ކޮވިޑް-19ގެ ދަތިތަކާ ގުޅިގެން ވެސް އުސޫލެއް ނެތި އިތުރު ފައިސާ ދޫކުރިއިރު، އޮޑިޓަރ ޖެނެރަލް އޮފީހުން ކަންބޮޑުވުން ފާޅުކުރުމުން ވެސް 1 ބިލިއަނަށްވުރެ ގިނަ ރުފިޔާގެ އެސެޓު ބަހާލައި، ޓޫރިސްޓު ރަށްރަށުގެ ކުއްޔާއި ޖޫރިމަނާގެ ބޮޑު ބައެއް މައާފުކޮށްދިނެވެ.
މީގެ އިތުރުން، 2021 ވަނަ އަހަރުގެ ފަހުކޮޅުން ފެށިގެން ގިނަ މަޝްރޫއުތަކެއް ކުންފުނިތަކާ ހަވާލުކުރިއިރު، ގިނަ މަޝްރޫއުތަކުގެ ބޮޑު ބައި ނުނިމި ހުރިތަން ފެނެއެވެ. ލީކުވި ލިޔެކިޔުންތަކުން ދައްކާ ގޮތުގައި، ހެޔޮ އަގުގައި މަސައްކަތް ނިންމަން ހުށަހެޅި ކުންފުނިތައް އެކަހެރިކޮށް، ދައުލަތަށް ގެއްލުންވާ ގޮތަށް، ބޮޑު އަގުގައި ދިގު މުއްދަތުން މަސައްކަތް ހަވާލުކުރިއެވެ. އެމްޓީސީސީ ފަދަ ޤާބިލު ދައުލަތުގެ ކުންފުނިތަކަށް ފުރުސަތު ނުދިނެވެ. މާލީ ގޮތުން، އެމްޑީޕީގެ ފަސް އަހަރަކީ ރާއްޖޭގެ ތާރީޚުގައި އެންމެ ގިނަ ފައިސާ (8 ބިލިއަން ރުފިޔާ) ޗާޕުކުރި އަދި އެންމެ ގިނަ ދަރަނި (57 ބިލިއަން ރުފިޔާ) އިތުރުކުރި ދައުރެވެ. ނަމަވެސް، މި ދަރަނި ނަގަން ޖެހުނު ސަބަބަކަށް ކޮވިޑް-19 ދެއްކި ނަމަވެސް، ނެގި 39 ލޯނުގެ ތެރެއިން ކޮވިޑާ ގުޅުންހުރީ އެންމެ ދިހަ ލޯނެވެ (2.4 ބިލިއަން ރުފިޔާ). މިހާ ބޮޑު އަދަދެއްގެ ފައިސާއަށް ކުރެވުނު ކަމެއް ރައްޔިތުންނަށް ފެންނަން ނެތުމުން، މިހާރު ރައްޔިތުން ބޭނުންވަނީ މި ހުރިހާ ކަމަކަށް ޖަވާބުދާރީވުމެވެ. ވުމާއެކު، އެމްޑީޕީގެ “ލޫޓުވައިފި” މުޒާހަރާއަށް ބޮޑު ތަރުޙީބެއް ނުލިބޭނެ ކަމަށް ގަބޫލުކުރެވެއެވެ.
Happy
50 %
Sad
0 %
Excited
50 %
Sleepy
0 %
Angry
0 %
Surprise
0 %
0
0