މަސްވެރިންގެ އަޑުއައްސަވައި މަސްވެރިން ބޭނުންވާ ކަންކަން ކޮށްދެއްވާނެކަމުގެ ޔަޤީންކަން ރައީސް ދެއްވައިފި

Read Time:4 Minute, 17 Second

(ފޮޓޯ ކްރެޑީޓްސް: ރައީސް އޮފީސް)

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މަސްވެރިންގެ ކަންބޮޑުވުންތައް އަޑުއައްސަވައި، އެފަރާތްތައް ބޭނުންވާ ކަންކަން ކޮށްދެއްވާނެކަމުގެ ޔަޤީންކަން ކެއުޅުންނާ ބައްދަލުކުރައްވައި ދެއްވައިފިއެވެ. މިއީ އެމަނިކުފާނު ކެޔޮޅުންނާ ބައްދަލުކުރެއްވި ތިންވަނަ ފަހަރެވެ. މި ބައްދަލުކުރެއްވުމުގައި ކެޔޮޅުންވަނީ މަސްވެރިކަމުގެ ސިނާޢަތު ރަނގަޅުކުރުމަށް ބޭނުންވާ އެތައް ކަމެއް ރައީސްއާ ހިއްސާކުރައްވާފައެވެ. އޭގެތެރެއިން އެންމެ ބޮޑު ކަމަކަށްވީ މަސްކިލޯއެއްގެ އަގު ވިހި ރުފިޔާއަށް ބޮޑުކުރާނެ ތާރީޚެއް ސާފުކުރުމެވެ. މީގެ އިތުރުން ރާއްޖޭގެ އެންވެރިކަން ދަށްވުމާއި، ބޭންކް އޮފް މޯލްޑިވްސް (ބީއެމްއެލް) މެދުވެރިކޮށް ލޯނަށް އެދުމުގައި ހުރި ދަތިތަކާއި، މަސްވެރިކަމުގެ ލައިސަންސް ހޯދުމުގައި ދިމާވާ ދަތިތައް ވެސް ފާހަގަކުރެވުނެވެ. އަދި މިފްކޯގައި މަސްކިރުވުމަށް ބޭނުންކުރާ ކައްޓާތައް ޑިޖިޓަލް ކައްޓާތަކަށް ބަދަލުކުރުމަށް ވެސް ކެއުޅުން އެދިވަޑައިގަތެވެ.

(ފޮޓޯ ކްރެޑިޓްސް: ރައީސް އޮފީސް)

މި ކަންބޮޑުވުންތަކަށް ރައްދު ދެއްވަމުން ރައީސުލްޖުމްހޫރިއްޔާ ވިދާޅުވީ މަސްގަންނަ އަގު ބޮޑުކުރެވޭނީ، މަސްކިރާތާ ސާޅީސްއަށް ގަޑިއިރު ތެރޭ ފައިސާ ދިނުމުގެ ކަންކަން މެދުނުކެނޑި ހަމަޖެހުމުން ކަމަށެވެ. ނަމަވެސް މަހުގެ އަގު ބޮޑުކޮށްދެއްވާނެ ކަމުގެ ޔަޤީންކަން ދެއްވިއެވެ. މަސްވެރިންނަށް ބީއެމްއެލްއިން ލޯނަށް އެދޭނެ ގޮތް ފަސޭހަކޮށް، ހުށަހަޅަންޖެހޭ ލިޔެކިޔުން މަދުކުރުމަށް ބޭންކަށް އަންގަވާނެ ކަމަށް ވެސް އެމަނިކުފާނު ވިދާޅުވިއެވެ. މީގެއިތުރުން ވ. އަތޮޅުގައި ހިންގާ ބިންހިއްކުމުގެ މަޝްރޫޢުތައް ކުރިއަށްގެންދަވާނީ މަސްވެރިންނާ މަޝްވަރާކޮށްގެން ކަމަށް ރައީސް ވިދާޅުވިއެވެ. އެސްޓީއޯއިން ތެޔޮވިއްކާ އަގު ރާއްޖޭގެ ކޮންމެ އަތޮޅެއްގައި އެއްގޮތް ކުރުމުގެ މަސައްކަތް އަންނަ އަހަރުގެ މާރިޗް މަހަށް ނިންމުމަށް މަސައްކަތް ކުރައްވަމުން ގެންދަވާ ކަމަށާއި، މިފްކޯއިން ވެސް ތެޔޮވިއްކަން ފަށާނެ ކަމުގެ މަޢުލޫމާތު ދެއްވިއެވެ.

ރައީސުލްޖުމްހޫރިއްޔާ ވިދާޅުވީ ސަރުކާރުން މަސްވެރިންނާއި ކެއުޅުންގެ ކަންކަމަށް ވަރަށް ގާތުން ބައްލަވައި، އެފަރާތްތަކުގެ ކަންބޮޑުވުންތަކަށް ވީހާވެސް އަވަހަށް ޙައްލު ހޯއްދަވައިދެއްވާނެ ކަމުގެ ޔަޤީންކަމެވެ.