ފެނަކަ ވައްކަން: އިންޖީނުގެއާއި އޮފީސް އިމާރާތްތަކަށް 61 މިލިއަން ރުފިޔާ، ހަރަދުގެ ތަފްސީލެއް ނެތް!

Read Time:5 Minute, 40 Second

ފެނަކަ ކޯޕަރޭޝަނުން 2021 ވަނަ އަހަރާއި 2023 ވަނަ އަހަރާއި ދެމެދު އިންޖީނުގެއާއި އޮފީސް އިމާރާތްތަކަށް 61 މިލިއަން ރުފިޔާ ހަރަދުކުރި ނަމަވެސް، އެ ފައިސާ ހަރަދު ކުރި ގޮތުގެ ތަފްސީލެއް ނުވަތަ ރެކޯޑެއް ބަލަހައްޓާފައި ނުވާ ކަމަށް އޮޑިޓް ރިޕޯޓުން ހާމަވެއްޖެއެވެ.

އޮޑިޓާ ޖެނެރަލްގެ އޮފީހުން މިދިޔަ ހަފްތާގައި ނެރުނު ފެނަކައިގެ ހާއްސަ އޮޑިޓް ރިޕޯޓުގައި ބުނާ ގޮތުގައި ފެނަކައިން އިން-ހައުސްކޮށް ކުރިއަށް ގެންދިޔަ 57 ޕްރޮޖެކްޓަށް 31 ޑިސެމްބަރު 2024 ގެ ނިޔަލަށް ޖުމްލަ 1،069،248،952 ރުފިޔާގެ ހަރަދު ހިނގާފައިވީ ނަމަވެސް، އެ ތާރީހާ ހަމައަށް މީގެ ތެރެއިން 31 ޕްރޮޖެކްޓުގެ މަސައްކަތުގެ 50 އިންސައްތަ ވެސް ނިމިފައެއް ނުވެއެވެ. އިން-ހައުސްކޮށް ކުރިއަށް ގެންދިޔަ ޕްރޮޖެކްޓްތަކަށް ހިނގި ހަރަދަށް ބަލާއިރު، ކޮންމެ ޕްރޮޖެކްޓަކަށް އެވްރޭޖްކޮށް 18،758،754 ރުފިޔާ 2024 ވަނަ އަހަރުގެ ނިޔަލަށް ހަރަދުވެފައިވާ ކަމަށާއި ނަމަވެސް އެޕްރޮޖެކްޓްތަކުގެ މާކެޓް އަގުތައް ކަމުގައި ބަލާނަމަ، ކޮންމެ ޕްރޮޖެކްޓެއް ނިންމުމަށް ހަރަދުވާނެ ކަމަށް ބެލެވެނީ 9،527،629 ރުފިޔާ ކަމަށް އޮޑިޓުގައި ވަނީ ބުނެފައެވެ.

އޮޑިޓުގައި ބުނީ، އިން-ހައުސް ޕްރޮޖެކްޓްތަކަށް 1 ބިލިއަން ރުފިޔާ ހަރަދުކޮށްފައިވާއިރު، އިންޖީނުގެއާއި އޮފީސް އިމާރާތް ކުރުމުގެ މަޝްރޫއުތައް ކުރިއަށް ގެންދިއުމަށް ފެނަކަ ކޯޕަރޭޝަނުން 2021 ވަނަ އަހަރާއި 2023 ވަނަ އަހަރާ ދެމެދު ކޮށްފައިވާ ހަރަދުތަކުގެ ތެރެއިން 61،575،423 ރުފިޔާގެ ހަރަދުތައް އެއީ ކޮން ޕްރޮޖެކްޓްތަކަށް ކުރި ހަރަދެއްކަން އެނގޭ ގޮތަށް ރެކޯޑް ބަލަހައްޓާފައެއް ނުވާ ކަމަށެވެ. މި ހަރަދުތަކުގެ ތެރޭގައި 1 ޕްރޮޖެކްޓަށްވުރެ ގިނަ ޕްރޮޖެކްޓްތައް ހިންގާފައިވާ ރަށްތަކުގެ މުސާރަ ޝީޓުތަކުން މުވައްޒަފުން މަސައްކަތް ކުރި ޕްރޮޖެކްޓް އެނގެން ނެތުމުން އެ ރަށްރަށުގައި ހިންގި ޕްރޮޖެކްޓްތަކުގައި މަސައްކަތް ކުރި މުވައްޒަފުންނަށް މުސާރައާއި އިނާޔަތްތައް ދިނުމަށް ހަރަދުކޮށްފައިވާ ޖުމްލަ 38،493،823 ރުފިޔާ އާއި ޕެޓީ ކޭޝް ރިޕޯޓުތަކުން ކޮން ޕްރޮޖެކްޓަކަށް ކުރި ހަރަދެއްކަން ވަކި ނުކުރެވޭ 145،718 ރުފިޔާގެ ހަރަދު ހިމެނޭ ކަމަށް އޮޑިޓުގައި ވަނީ ފާހަގަ ކޮށްފައެވެ.

އިން-ހައުސް ޕްރޮޖެކްޓްތަކުގެ ބޭނުމަށް ގަނެފައިވާ 22،935،883 ރުފިޔާގެ ތަކެއްޗާ ގުޅޭ “ޖޮބްކޯޑް” ނުވަތަ ޕްރޮޖެކްޓް ކޯޑު ސިސްޓަމަށް އަޅާފައި ނުވާއިރު، އެ ހަރަދުތަކާއި ގުޅޭ ޕޭމަންޓް ވައުޗާއެއްކޮށް ހިމަނާފައިވާ ލިޔެކިޔުންތަކުން އެ ހަރަދުތައް ހިމަނަންޖެހޭ ޕްރޮޖެކްޓް އެނގެން ނެތް ކަމަށް ވެސް އޮޑިޓުގައި ވަނީ ބުނެފައެވެ. އޮޑިޓުގައި ބުނީ، ޕްރޮޖެކްޓްތައް ހިންގުމަށް ކުރި ހަރަދުތަކުގެ ތެރެއިން ބައެއް ހަރަދުތައް ހިމަނަން ޖެހޭ ވަކިވަކި ޕްރޮޖެކްޓް އެނގޭ ގޮތަށް ރެކޯޑް ބަލަހައްޓަމުން ނުގެންދާނަމަ އިން-ހައުސް ޕްރޮޖެކްޓްތަކުގެ ގޮތުގައި ފެނަކައިން ކުރިއަށް ގެންގޮސްފައިވާ ވަކިވަކި ޕްރޮޖެކްޓްތަކަށް ހިނގާފައިވާ ޖުމްލަ ހަރަދު އެނގެން ނެތުމާއި، ވަކިވަކި ޕްރޮޖެކްޓްތައް ހިންގުމަށް އެކަށީގެން ނުވާވަރުގެ ބޮޑު ހަރަދެއް ހިނގި ނަމަވެސް އެކަން ފާހަގަ ނުކުރެވި ދިއުމުގެ ފުރުސަތު އޮންނާނެ ކަމަށެވެ.