Read Time:5 Minute, 21 Second
(ފޮޓޯ ކްރެޑިޓްސް: ޕީއެސްއެމް ނިއުސް)
ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރު (އެމްޑީ) އަހުމަދު ސައީދު އެމަގާމުގައި ހުންނެވި ދުވަސްވަރު، ކަރަންޓް ކޭބަލާއި ޖެނެރޭޓަރު ސެޓާއި ޓްރާންސްފޯމަރު ގަތުމަށާއި އެނޫން ވެސް ތަކެއްޗާއި ހިދުމަތް ހޯދުމަށް ބީލަމުގެ އުސޫލުން ބޭރު 1 ބިލިއަން ރުފިޔާގެ މަޝްރޫއު ހަވާލުކޮށްފައިވާ ކަމަށް އޮޑިޓް ރިޕޯޓުން ހާމަވެއްޖެއެވެ.
އޮޑިޓާ ޖެނެރަލްގެ އޮފީހުން ނެރުނު ފެނަކައިގެ ހާއްސަ އޮޑިޓް ރިޕޯޓުގައި ބުނާ ގޮތުގައި ފެނަކައަށް ބޭނުންވާ ޖެނެރޭޓަރު ސެޓާއި، ކޭބަލް އަދި ޓްރާންސްފޯމަރު ގަތުމާއި ފެނާއި ނަރުދަމާގެ މަޝްރޫއުތަކުގެ މަސައްކަތަށް ބެނުންވާ ތަކެތި ގަތުމާއި މަސައްކަތް ހަވާލުކުރުމަށް 2021 ވަނަ އަހަރުން ފެށިގެން 2023 ވަނަ އަހަރުގެ ނިޔަލަށް 673 އެއްބަސްވުމެއްގެ ދަށުން 2،237،987،358 ރުފިޔާގެ މަސައްކަތް އެކި ފަރާތްތަކާއި ހަވާލުކޮށްފައިވެއެވެ. އޭގެ ތެރެއިން 438 އެއްބަސްވުމުގެ ދަށުން 1،371،472،896 ރުފިޔާގެ މުދަލާއި ހިދުމަތް ހޯދުމުގެ މަސައްކަތް އެކި ފަރާތްތަކާއި ހަވާލުކޮށްފައިވަނީ އާންމުން ބީލަމުގެ އުސޫލުން ބޭރުން، މުދަލާއި ހިދުމަތް ފޯރުކޮށްދިނުމަށް ޝައުގުވެރިވާ ފަރާތްތައް ހޯދުމަށް އާންމުކޮށް އިއުލާނު ނުކޮށް، މައިގަނޑު ގޮތެއްގައި ދެތިން ފަރާތުން އަގު ހޯދައިގެން ފެނަކައިގެ ޑައިރެކްޓް ޕާޗޭސް ކޮމިޓީޏް މަސައްކަތް ހަވާލުކުރާނެ ފަރާތް ކަނޑައަޅައިގެންކަން އޮޑިޓުގައި ވަނީ ފާހަގަކޮށްފައެވެ.
އޮޑިޓުގައި ބުނީ ފެނަކައަށް ބޭނުންވާ ޖެނެރޭޓަރު ސެޓާއި، ކޭބަލް އަދި ޓްރާންސްފޯމަރު ގަތުމާއި ނަރުދަމާގެ މަޝްރޫއުތަކުގެ މަސައްކަތް ހަވާލުކުރުުމަށް 2021 ވަނަ އަހަރުން ފެށިގެން 2023 ވަނަ އަހަރުގެ ނިޔަލަށް އާންމު ބީލަމުގެ އުސޫލުން ބޭރުން ހަވާލުކުރި 438 އެއްބަސްވުމުގެ ތެރެއިން 384 އެއްބަސްވުމުގެ ދަށުން މުދަލާއި ހިދުމަތް ފޯރުކޮށްދޭނެ ފަރާތްތައް ކަނޑައަޅާފައިވާ ގޮތް އޮޑިޓް ސާމްޕްލިން އުސޫލުން ބެލިއިރު، އޭގެ ތެރެއިން 185 އެއްބަސްވުމުގެ ދަށުން 895،640،937 ރުފިޔާގެ މަސައްކަތް ހަވާލުކޮށްފައިވަނީ އާންމު ބީލަމުގެ އުސޫލުން ބޭރުން އިމަޖެންސީ އުސޫލުން މަސައްކަތް ހަވާލު ކުރަން ޖެހޭ އެކަށީގެންވާ ސަބަބެއް އޮވެގެން ނޫންކަން ފާހަގަވާ ކަމަށެވެ.
ކުންފުންޏަށް ބޭނުންވާ މުދަލާއި ހިދުމަތް ހޯދުމުގެ މަސައްކަތް ހަވާލު ކުރާނެ ފަރާތެއް ކަނޑައެޅުމުގެ ކަންކަން ވާދަވެރި ބީލަމުގެ އުސޫލުން ހާމަކަން ބޮޑު ގޮތެއްގައި ކުރިއަށް ނުގެންދާނަމަ، ހަމަހަމަ ފުރުސަތު ގާބިލު ފަރާތްތަކަށް ނުލިބުމާއި ކުންފުންޏަށް އެންމެ މަންފާ ހުރި ގޮތެއްގައި މުދަލާއި ހިދުމަތް ހޯދުމުގެ ފުރުސަތު ގެއްލި ކުންފުންޏަށް ބޭނުންވާ މުދަލާއި ފައިސާ ހޯދުމުގެ މަސައްކަތުގެ ތެރެއިން ކުންފުނި ހިންގުމާ ހަވާލުވެ ތިބި ފަރާތްތަކެއްގެ އަމިއްލަ މަސްލަހަތަށް އިސްކަންދީގެން ވަކި ފަރާތްތަކަކަށް ނާޖައިޒު މާލީ މަންފާ ހޯދައިދިނުމަށް މަގުފަހިވެގެންދާނެ ކަމަށް އޮޑިޓުގައި ވަނީ ބުނެފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0