Read Time:3 Minute, 25 Second
(ފޮޓޯ ކްރެޑިޓްސް: މިހާރު)
ފެނަކަ ކުންފުނީގެ ކުރީގެ މެނޭޖިން ޑިރެކްޓަރު އަހްމަދު ސައީދު، ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށް ސާބިތުވެ ހަތަރު އަހަރުގެ ޖަލު ހުކުމެއް ކްރިމިނަލް ކޯޓުން އިއްވައިފި އެވެ. މި ހުކުމް އިއްވީ ފެނަކަ އާއި ބްލޭޒަން އިންކް ކުންފުންޏާ ދެމެދު ހެދި އެއްބަސްވުންތަކެއްގެ ދަށުން މަސައްކަތް ފުރިހަމަ ނުކޮށް ފައިސާ ދިން މައްސަލައިގަ އެވެ. މިކަމުގެ ސަބަބުން ދައުލަތަށް 805،600ރ. ގެ ގެއްލުމެއް ވެފައިވެ އެވެ. ސައީދުގެ މައްޗަށް ކުރެވުނު ދައުވާ ޝައްކެއް ނެތް މިންވަރަށް ސާބިތުވުމުން، ދައުލަތުން އެދުނީ ކުށުގެ އަސާސީ އަދަބު (1 އަހަރާއި 7 މަހާއި 6 ދުވަސް) ކަނޑައެޅުމަށެވެ. ނަމަވެސް ސައީދު އެދުނީ، މީގެ ކުރިން ކުށެއް ސާބިތުވެފައި ނުވާތީ އަދި ގާނޫނީ ލަފަޔެއްގެ މައްޗަށް އަމަލުކޮށްފައިވާ ކަމަށް ބުނެ އަދަބު ދަށްކޮށް، ޖަލު އަދަބުގެ ބައެއް ޖޫރިމަނާއަށް ބަދަލުކުރުމަށެވެ.
ނަމަވެސް، އިސް ގާޒީ އާދަމް މުހައްމަދު ހުކުމް އިއްވަމުން ވިދާޅުވީ، ރައްޔިތުންނަށް ހިދުމަތް ދޭ ކުންފުނިތަކުގެ ވެރިން ކޮރަޕްޝަން ހިންގުމަކީ ކަންބޮޑުވާންޖެހޭ ކަމެއް ކަމަށާއި، މިފަދަ އަމަލުތަކުގެ ސަބަބުން ކުންފުނިތަކުގެ ހަރަދު ބޮޑުވެ، އެ ބުރަ އުފުލަންޖެހެނީ ރައްޔިތުންނަށް ކަމަށެވެ. އަދި ކޮރަޕްޝަންގެ މައްސަލަތަކުގައި އަދަބު ލިބޭތަން ނުހަނު މަދުން ފެންނައިރު، ލިބޭ އަދަބު ވެސް ކުޑަވުމުން، މިފަދަ އަމަލުތައް ހިންގާ މީހުންނަށް ހިތްވަރު ލިބޭ ކަމަށް ވިދާޅުވެ އެވެ. މި ސަބަބުތަކަށްޓަކައި، ކުށާ ގުޅިގެން ގާނޫނުގައި ކަނޑައަޅާފައިވާ އެންމެ ހަރުކަށި އަދަބު ކަމަށްވާ ހަތަރު އަހަރުގެ ޖަލު ހުކުމް ސައީދުގެ މައްޗަށް އިސް ގާޒީ ވަނީ އިއްވާފަ އެވެ. މި މައްސަލައިގައި ދައުވާ ކުރެވުނު މަރްޔަމް ދީނާ ސާލިހްގެ މައްޗަށް ހުކުމް އިއްވުން، އޭނާގެ ބަލި ހާލަތުގެ ސަބަބުން ފަސް ދުވަހަށް ފަސްކޮށްފައިވެ އެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0