Read Time:2 Minute, 18 Second
ގއ. މާމެންދޫގައި މީގެ ހަތަރު އަހަރު ކުރިން ހިންގި މާރާމާރީއެއްގައި އުމުރުން 17 އަހަރުގެ އަހުމަދު އުދައްޔު މަރާލި މައްސަލައިގައި ދެ މީހަކަށް މަރަން ކްރިމިނަލް ކޯޓުން ހުކުމްކޮށްފިއެވެ. އެ މައްސަލައިގައި މަރަން ހުކުމްކުރީ މާމެންދޫ ރިހިފަރުދާގޭ އަހުމަދު ޝަމީމާއި އެރަށު ގުލްފާމްގޭ މުހައްމަދު މާޒިންގެ މައްޗަށެވެ. މި ދެ މީހުންނަށް މަރަށް ހުކުމްކުރީ، އުދައްޔުގެ ވާރިސުން މަރަށް މަރު ހިފުމަށް އެދިފައިވާތީއެވެ. 2021 ވަނަ އަހަރުގެ ފެބްރުއަރީ 8 ގައި ހިނގި މި މާރާމާރީގައި އުދައްޔުގެ ބޭބެ، ފިރުޝާން ޒާހިރު ވެސް ވަނީ ޒަޚަމުކޮށްފައެވެ.
މި މައްސަލައިގައި ދައުވާ ލިބުނު އެ ރަށު ބިލަތްމާގޭ ޝަރަފް ރަޝީދުގެ މައްޗަށް ގަސްދުގައި މީހަކު މެރުމުގެ ކުށް ސާބިތުނުވި ނަމަވެސް، ތޫނު އެއްޗެއް ބޭނުންކޮށްގެން އެހެން މީހަކަށް ހަމަލާދިނުމުގެ ކުށް ސާބިތުވެ، އޭނާއަށް ވަނީ ހަތް އަހަރުގެ ޖަލު ހުކުމެއް އިއްވާފައެވެ. މި ކުށް މާޒިންގެ މައްޗަށް ވެސް ސާބިތުވެ، އޭނާއަށް 10 އަހަރުގެ ޖަލު ހުކުމެއް ވަނީ އިއްވާފައެވެ. މީގެ އިތުރުން، އުދައްޔުގެ މަރާ ގުޅިގެން އޭރު 17 އަހަރުގެ ކުއްޖެއްގެ މައްޗަށް ޖުވެނައިލް ކޯޓުގައި ކުރިން ކުށް ސާބިތުވެ، އެ ކުއްޖާ 25 އަހަރަށް ޖަލަށްލާން ވަނީ ހުކުމްކޮށްފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0