Read Time:4 Minute, 56 Second
(ފޮޓޯ ކްރެޑިޓްސް: ރޮއިޓާރސް)
ހޮލީވުޑްގެ 1،800އަށްވުރެ ގިނަ ފަންނާނުން ޔަހޫދީންގެ ފިލްމީ މުއައްސަސާތަކާއެކު މަސައްކަތް ނުކުރާނެ ކަމަށް ޢަޙްދުވެއްޖެއެވެ. ފިލްމީ ތަރިންނާއި ޕްރޮޑިއުސަރުން ހިމެނޭ ގޮތަށް ގިނަ ޢަދަދެއްގެ ފަންނާނުން ސޮއިކޮށްފައިވާ ޢަޙްދުގައި ބުނީ 2023ވަނަ އަހަރުގެ އޮކްޓޯބަރު މަހުގެ 7ވަނަ ދުވަހުން ފެށިގެން ޔަހޫދީން ފަލަސްޠީނުގެ ޣައްޒާއަށް ދެމުންދާ ޢުދުވާނީ ހަމަލާތަކުގައި އެ ބައެއްގެ އަތެއް ވާ ކަމަށް ބެލެވޭ އެއްވެސް ފިލްމީ މުއައްސަސާއެކު މަސައްކަތް ނުކުރާނެ ކަމަށެވެ. ޣައްޒާއަށް ޔަހޫދީން ދެމުންދާ ޙަމަލާތަކުގައި މިހާތަނަށް 64،000އަށްވުރެ ގިނަ މީހުން ޝަހީދުކޮށްލާފައިވާއިރު، އޭގެ ތެރޭގައި ގިނައީ ކުށެއް ނެތް އަންހެނުންނާއި މައުސޫމް ކުޑަކުދިންނެވެ. ޔަހޫދީން ވަނީ ޣައްޒާގެ ރައްޔިތުންނަށް ކާބޯތަކެއްޗާއި އެހީގެ ސާމާނު ލިބޭނެ މަގުތައް ބަންދުކޮށް، ޣައްޒާގެ ރައްޔިތުން ގަސްތުގައި ބަނޑަށް ޖައްސަމުންނެވެ. ޢުދުވާން ފެށިފަހުން ދެ އަހަރުވާން ގާތްވެފައި ވާއިރު، ޔަހޫދީ ސަރުކާރާއެކު އޮންނަ ގުޅުމުގެ ސަބަބުން ބައެއް ކުންފުނިތައް ބޮއިކޮޓު ކުރުމަށް ގޮވާލައި އަޑުތައް މިހާރު ވަނީ ގަދަވެފައެވެ.
ފަންާނުންގެ ޢަޙްދުގައި ބުނީ ދެކުނު އެފްރިކާގައި ނަސްލީ ތަފާތުކުރުންތަކާ ދެކޮޅަށް މަސައްކަތްކުރި ފިލްމްމޭކާސް ޔުނައިޓެޑް އަގެއިންސްޓް އަޕާތޭޑުން ފިލާވަޅާއި ހިތްވަރު ލިބިގަނެ، ޔަހުދީންނާ ގުޅުންހުރި ފިލްމީ ކުންފުނިތަކާއެކު މަސައްކަތް ނުކުރުމަށް ނިންމާފައިވާ ކަމަށެވެ. ޔަހޫދީން އިންސާނީ ހައްޤުތަކާ ޚިލާފުވަމުންދާއިރު، އެ ފަދަ ޢަމަލުތަކާ ގުޅުންހުރި ފަރާތްތަކާއެކު މަސައްކަތް ނުކުރުމަށް ފަންނާނުން ވަނީ ގޮވާލައިފައެވެ. ފަލަސްޠީނުގެ ރައްޔިތުންނަށް ދެމުންދާ އަނިޔާއަކީ ބޮޑު ކަމެއް ނޫން ކަމަށް ދެއްކުމަށް ޔަހޫދީންގެ ފިލްމީ ކުންފުނިތަކުން މަސައްކަތް ކުރާ ކަމަށް ވެސް އެ ޢަޙްދުގައި ބުނެފައިވެއެވެ. އޭގެ އިތުރުން ފަލަސްޠީނުގެ ބިންތައް ޔަހުދީން ފޭރިގަންނަމުން ދަނީ ބައިނަލްއަޤްވާމީ ޤާނޫނުތަކާއި ޤަވާއިދުތަކާ ޚިލާފަށް ކަމަށް މިދިޔަ އަހަރުގެ ތެރޭގައި ބައިނަލްއަޤްވާމީ ޢަދުލްއިންސާފާ ބެހޭ ކޯޓު، އައިސީޖޭއިން ނިންމާފައިވާ ނިންމުމަށް ވެސް އެ ޢަޙުދުގައި އަލިއަޅުވާލާފައިވެއެވެ. އަދި ޣައްޒާގައި ހިންގަމުންދާ ޢުދުވާނަކީ ބަޔަކު ނަސްލުހޭދު ކުރުމަށް ދެމުންދާ ޙަމަލާތަކެއް ކަމަށް ތަޖުރިބާކާރުން ވިދާޅުވާ ވިދާޅުވުމަށް ވެސް އަލިއަޅުވާލާފައިވެއެވެ. ޢަޙުދުގައި ސޮއިކޮށްފައިވާ މަޝްހޫރު ފަންނާނުންގެ ތެރޭގައި އޮލިވިއާ ކޯލްމަންއާއި އެމާ ސްޓޯންއާއި މަރކް ރަފަލޯއާއި ޓިލްޑާ ސްވިންޓަންއާއި ރިޒް އަޙްމަދުގެ އިތުރުން ހަވިޔާ ބާޑެމްއާއި ސިންތިޔާ ނިކްސަން ވެސް ހިމެނެއެވެ.
Happy
67 %
Sad
0 %
Excited
0 %
Sleepy
0 %
Angry
0 %
Surprise
33 %
0
0