ޔަހޫދީންގެ ޙަމަލާއެއްގައި ޔަމަނުގެ ޙޫޘީ ސަރުކާރުގެ ބޮޑުވަޒީރާއި ބައެއް ވަޒީރުން ޝަހީދުވެއްޖެ

Read Time:5 Minute, 36 Second

(ފޮޓޯ ކްރެޑިޓްސް: ރޮއިޓާރސް)

އޮގަސްޓު މަހުހެ 28ވަނަ ދުވަހު ޔަހޫދީން ދިން ޙަމަލައެއްގައި ޔަމަނުގެ ޙޫޘީ ސަރުކާރުގެ ބޮޑުވަޒީރާއި ބައެއް ވަޒީރުން ޝަހީދުވެފައިވާ ކަމަށް އިޢުލާނުކޮށްފިއެވެ. ޙޫޘީ ސަރުކާރުގެ ފަރާތުން ވަނީ ޔަމަނުގެ ވެރިރަށް، ޞަންޢާގައި ބޮޑުވަޒީރު އަޙްމަދު އަލް-ރަހަވީއާއި އިތުރު ވަޒީރުންތަކެއް ޝަހީދުވެފައިވާކަން ކަށަވަރުކޮށްދީފައެވެ. ޙޫޘީންގެ ބާރު ހިނގާ ސަރަޙައްދުތަކުގައި އޮންނަ ސަރުކާރުގެ ބޮޑުވަޒީރުގެ މަޤާމަށް އަލް-ރަހަވީ ހޮވިވަޑައިގެންފައިވަނީ 2024ވަނަ އަހަރުގެ އޮގަސްޓު މަހުގެ ތެރޭގައެވެ. އޭނާއާއި ސަރުކާރުގެ އިސް ވަޒީރުންނަށް އަމާޒުކޮށް ޔަހޫދީން ޙަމަލާދީފައި ވަނީ ފާއިތުވި އަހަރު ސަރުކާރުގެ މަސައްކަތްތައް ކުރިއަށް ގެންގޮސްފައިވާ ގޮތް ވަޒަންކުރުމަށް ޤަވާއިދުން ބާއްވާ މަސައްކަތު ބައްދަލުވުމެއްގައި ތިއްބަވަނިކޮށެވެ. ޔަހޫދީންގެ ޙަމަލާގައި ޝަހީދުވި މީހުންގެ ޢަދަދު މިހާތަނަށް ހާމަކޮށްފައެއް ނުވެއެވެ.

ފަލަސްޠީނުގެ ޣައްޒާގެ މުސްލިމުން ނަސްލުހޭދު ކުރުމަށް 2023ވަނަ އަހަރުގެ އޮކްޓޯބަރު މަހުގެ 7ވަނަ ދުވަހު ޔަހޫދީން ދޭން ފެށި ލާއިންސާނީ ޢުދުވާނީ ޙަމަލާތަކާ ގުޅިގެން އެ އަހަރުގެ ނޮވެމްބަރު މަހުގެ ތެރޭގައި ޙޫޘީން ވަނީ ޣައްޒާގެ ރައްޔިތުންނާއެކު ވާ ކަމަށް ބުނެ ޔަހޫދީންނާ ދެކޮޅަށް ޙަމަލާތައް ދޭން ފަށައިފައެވެ. އެ ގޮތުން ރަތްކަނޑުގައި ދަތުރުކުރާ ޔަހޫދީންނާ ގުޅުންހުރި އާގުބޯޓު ފަހަރަށް ޙޫޘީން ގިނަ ޙަމަލާތަކެއް ދީފައިވެއެވެ. އެ ޙަމަލާތަކުގައި މިހާތަނަށް ހަތަރު ބޯޓު ފައްތާލާފައިވެއެވެ. މި ޙަމަލާތަކުގެ ސަބަބުން ބައިނަލްއަޤްވާމީ ވިޔަފާރިއަށް ބުރޫ އަރައި ބޯޓުފަހަރު ދަތުރު ކުރާ މަގު ބަދަލު ކުރުމަށް މަޖުބޫރުވިއެވެ. އޭގެ ސަބަބުން ވިޔަފާރި ބޯޓުތައް ދަތުރު ކުރަން ޖެހޭ މަގު ދިގުވެ ދަތުރުތަކަށް ހިނގާ ޚަރަދު ވެސް އިތުރުވެގެން ދިޔައެވެ.

އެ ޙަމަލާތަކާ ގުޅިގެން ޔަހޫދީން ވެސް ދަނީ ޙޫޘީންނަށް އަމާޒުކޮށް ޙަމަލާތައް ދެމުންނެވެ. ނަމަވެސް ޙޫޘީންނަށް އަމާޒުކޮށް ކިތަންމެ ގިނަ ޙަމަލާއެއް ދިން ނަމަވެސް، ފަލަސްޠީނުގެ ދިފާޢުގައި ޙޫޘީން ދެމުންދާ ޙަމަލާތަކަށް ބަދަލެއް ނާންނާނެ ކަމަށް އެ ޖަމާޢަތުން ދަނީ ތަކުރާރުކޮށް ބުނަމުންނެވެ. ޙޫޘީންގެ ސިޔާސީ ގޮފިން ބުނީ ބޮޑުވަޒީރާއި އިތުރު ވަޒީރުންތަކެއް ޝަހީދުވި ނަމަވެސް ސަރުކާރުގެ ޒިންމާތައް ޢަދާ ނުކުރެވޭނެ ޙާލަތެއް ނެތް ކަމަށެވެ. ސަރުކާރުން ނެރުނު ބަޔާނެއްގައި ބުނީ އެ ބޭފުޅުންގެ މަރަކީ ޙޫޘީން ކުރަމުންދާ މަސައްކަތުގައި ދެމިތިބުމަށް ލިބޭ އެންމެ ބޮޑު ހިތްވަރު ކަމަށެވެ. ފަލަސްޠީނުގެ ރައްޔިތުންގެ ދިފާޢުގައި މަސައްކަތްކުރުމުގެ މަތީގަައި ދެމިތިބޭނެކަމާއި ދިފާޢީ ބާރު އިތުރަށް ވަރުގަދަކުރުމަށް މަސައްކަތް ކުރަމުންދާނެ ކަމުގެ ޔަޤީންކަން ވެސް ސަރުކާރުގެ ފަރާތުން ދީފައިވެއެވެ. އެއީ ޤައުމުގެ ރައްޔިތުންގެ ވެސް އެދޭ ގޮތް ކަމަށް ބަޔާނުގައި ބުނެފައިވެއެވެ.

ޔަމަނުގެ ރައީސް މަހްދީ އަލް މަަޝާޠު ވަނީ ބޮޑުވަޒީރުގެ ނައިބު މުޙައްމަދު އަޙްމަދު އަޙްމަދު މުފްތާހަށް ބޮޑުވަޒީރުގެ ޒިންމާތައް ޙަވާލުކުރުމަށް އަންގަވައިފައެވެ.