ލަންކާ އާއި ރާއްޖެ މެޗުން މޮޅުވާ ބަޔަކަށް ތައްޓެއް ދޭނެ: ޖަސްވަރު

Read Time:3 Minute, 15 Second

ސްރީލަންކާ އާއި ރާއްޖެ ބައްދަލުކުރާ އެކުވެރި ކަމުގެ ދެމެޗު ކުޅޭނީ ސުޕަކަޕެއްގެ ގޮތުގައި ކަމަށް ލަންކާ ފުޓްބޯޅަ ފެޑަރޭޝަނުން ބުނެފި އެވެ. އެ ޖަމާއަތުގެ ރައީސް ޖަސްވަރު އުމަރު ވިދާޅުވީ މި މެޗުންމޮޅުވާ ބަޔަކަށް ތައްޓެއް ދޭނެ ކަމަށެވެ. މިހެންވެ މި ދެ މެޗަށް ދީފައިވާ ނަމަކީ ދެކުނު އޭޝިޔާގެ ސުޕަކަޕް އެވެ. މި ގޮތަށް ހެދީ ކުރިން ބާއްވަން އުޅުނު މުބާރާތްކެންސަލްވި ނަމަވެސް މެޗުގެ ފޯރިގަދަކޮށް ވާދަވެރިކަން ބޮޑުކުރުމަށެވެ. ލަންކާ އާއި ރާއްޖެ ކުޅޭ އެކުވެރިކަމުގެ ފުރަތަމަ މެޗު އޮންނާނީ އަންނަ ހުކުރު ދުވަހު ލަންކާގެ ރޭސް ކޯސް ފުޓްބޯޅަ ދަނޑުގަ އެވެ. ދެ ވަނަ މެޗުކުލޭނީ އަންނަ އަންގާރަ ދުވަހު އެވެ. ޖަސްވަރު ވިދާޅުވީ ލަންކާގެ އަމާޒަކީ މި ދެ މެޗުން ވެސް މޮޅުވުން ކަމަށެވެ.

“ރާއްޖެ އަތުން ލަންކާ މޮޅުނުވެ ހިނގައްޖެ އެންމެފަހުން ކުޅުނު ގިނަ މެޗުތަކުގައި. އެކަމަކު އެއީ ވެސް އަހަރުމެންނަށް ކާމިޔާބު ކުރެވޭނެ މެޗުތަކެއް. މި ފަހަރު އަހަރުމެން ތައްޔާރު މި ވަނީ ވޯލްޑް ކަޕްކޮލިފައިން އަށް. އެހެންވީމާ މި ދެ މެޗުން މޮޅުވުން ބޭނުންވެ އެ ދެ މެޗަށް ރަނގަޅަށް ތައްޔާރުވުން ބޭނުމަކީ،” ޖަސްވަރު ވިދާޅުވި އެވެ. ލަންކާއިން އެންމެ ފުރަތަމަ މަސައްކަތް ކުރީ ކޮލިފައިންއަށް ތައްޔާރުވުމަށް ހަތަރު ގައުމުގެ މުބާރާތެއް ކުޅުމަށެވެ. ނަމަވެސް ފަހުން އެ އަދަދު ތިނަކަށް ބަދަލުކުރި އެވެ. އެންމެ ފަހުން ރާއްޖެ އާއި ލަންކާ އެކަނިމެޗުތަކެއް ކުޅެން ޖެހުނީ އެންމެ ފަހު ވަގުތު ބޫޓާނަށް ލަންކާގައި ބާއްވަން އުޅުނު މުބާރާތަށް ދެވޭ ގޮތް ނުވުމުންނެވެ.

މި މެޗަށް ލަންކާ ޓީމު ވެސް މިހާރު ވަނީ ފަރިތަކުރަންފަށައިފަ އެވެ. އަދި ރާއްޖޭގެ ގައުމީ ޓީމު ވެސް ވަނީ ޒުވާން ޓީމަކާއެކު ތައްޔާރުވާން ފަށައިފަ އެވެ. ޓީމުގެ އައު ކޯޗަކީ މުހައްމަދު ޝިޔާޒް (މޯހަން) އެވެ.