ފަތުރުވެރިކަން ކުރިއެރުވުމަށް ޢުމަރު މަނިކު ކުރައްވާފައިވަނީ، ތަޢުރީފް ޙައްޤު މަސައްކަތްޕުޅެއް: ރައީސް

Read Time:4 Minute, 40 Second

ރާއްޖޭގެ ފަތުރުވެރިކަން މިއަދާ ހަމައަށް ތަރައްޤީވެ ކުރިއަރައި ދިޔުމުގައި ނިޝާން މުލީގޭ ޝަރަފުގެ ޢިއްޒަތުގެ ވެރިޔާ މުޙައްމަދު ޢުމަރު މަނިކު ކުރައްވާފައިވަނީ، ތަޢުރީފް ޙައްޤު މަސައްކަތްޕުޅުތަކެއްކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ ވިދާޅުވީ ރާއްޖޭގެ ފަތުރުވެރިކަމުގެ އެއްބާނީ މުޙައްމަދު ޢުމަރު މަނިކު އަވަހާރަވި ޚަބަރު އެއްސެވީ ފުން ހިތާމައާއެކުކަމަށެވެ.

ރައީސުލްޖުމްހޫރިއްޔާ ވިދާޅުވީ ދިވެހި ރާއްޖެއަކީ ދުނިޔޭގެ ފެންވަރުގައި ފާހަގަކޮށްލެވޭ ފަތުރުވެރިންގެ ޚާއްޞަ މަންޒިލަކަށް ހެއްދެވުމުގައި އެމަނިކުފާނު ކުރެއްވި ބުރަ މަަސައްކަތްޕުޅުތަކާއި، އަދާކުރެއްވި ދައުރު ނުހަނު ބޮޑުކަމަށެވެ. އެހެންކަމުން މުޙައްމަދު ޢުމަރު މަނިކުގެ ވަކިވެދިއުމަކީ ލިބިލެއްވި ފުން ހިތާމައެއްކަމަށާ، މާތްﷲ، މަރްްޙޫމް މުޙައްމަދު ޢުމަރު މަނިކުގެ ފުރާނައަށް ހެޔޮ ރަޙްމަތް ލައްވައި ސުވަރުގޭގެ ދާއިމީ ނިޢުމަތް މިންވަރު ކުރައްވުމަށް އެދި ވަނީ ދުޢާ ކުރައްވާފައެވެ. އަދި މަރްޙޫމްގެ ޢާއިލާއަށް ކެތްތެރިކަން ދެއްވުމަށްއެދި ދުޢާ ކުރެއްވިއެވެ.

إِنَّا لِلّهِ وَإِنَّـا إِلَيْهِ رَاجِعونَ

ރާއްޖޭގެ ފަތުރުވެރިކަމުގެ އެއްބާނީ ނިޝާން މުލީގޭ ޝަރަފުގެ ޢިއްޒަތުގެ ވެރިޔާ މުޙައްމަދު ޢުމަރު މަނިކު އަވަހާރަވި ޚަބަރު އަޅުގަނޑު އެހީ ވަރަށް ފުން ހިތާމައާއެކުގައި. ރާއްޖޭގެ ފަތުރުވެރިކަން މިއަދާ ހަމައަށް ތަރައްޤީވެ ކުރިއަރައި ދިޔުމުގައި… pic.twitter.com/rL4qn3S20V

— Dr Mohamed Muizzu (@MMuizzu) August 30, 2025

އެމްޔޫ މަނިކު އަވަހާރަވީ ސިއްޙީ ޙާލުކޮޅު ދެރަވެ، ފަރުވާދެމުންދަނިކޮށް ސިންގަޕޫރުގައި، ރޭގެ ވަގުތެއްގައެވެ. ޖަނާޒާ ބޭއްވުމަށް ހަމަޖެހިފަވަނީ މިއަދު އަސުރު، ސިންގަޕޫރުގައެވެ. އަވަހާރަވި އުމުރުފުޅުން 78 އަހަރުފުޅުގައެވެ. އެމަނިކުފާނު ސަރުކާރަށް ޚިދްމަތް ކުރައްވަން ފަށްޓަވާފައިވަނީ، 5 ޖޫން 1971 ގައެވެ. އަދި ރާއްޖޭގައި 1972 ވަނަ އަހަރު، ފަތުރުވެރިކަމުގެ ވިޔަފާރިފެށުމުގައި ކުރީސަފުގައި މަސައްކަތްކުރެއްވި އެއް ބާނީއަކީވެސް މުޙައްމަދު ޢުމަރު މަނިކުއެވެ. މީގެ އިތުރުން މުޙައްމަދު އުމަރު މަނިކު ދިވެހި ދައުލަތަށާއި، ޤައުމާއި ރައްޔިތުންނަށް ކޮށްދެއްވާފައިވާ މަސައްކަތުގެ އަގުވަޒަންކުރައްވައި އޭނާ އަށް ވަނީ 2011 ވަނަ ދިވެހި ނިޝާން މުލީގޭ ޝަރަފުގެ ޢިއްޒަތް (ނ.މ.ޝ.ޢ) އަރުފާފައެވެ.

މުޙައްމަދު ޢުމަރު މަނިކު އެމްޔޫ މަނިކު އަވަހާރަވުމާ ގުޅިގެން ސަރުކާރާއި، ފަތުވެރިކަމުގެ ދާއިރާގެ އިސް ފަރާތްތަކާއި އަދި ގިނަ ބަޔަކު ދަނީ ތަޢުޒިޔާފޮނުއްވަމުންނެވެ.