Read Time:3 Minute, 26 Second
މެންޗެސްޓާ ޔުނައިޓެޑުގެ ކުޅުންތެރިން ދެކެ ބައެއް ފަހަރު ރުޅިއަންނަ ކަމަށާއި، މަގާމުން އިސްތިއުފާދިނުމަށްވެސް ބައެއް ފަހަރު ބޭނުންވާ ކަމަށް އެ ޓީމުގެ ކޯޗު ރުބެން އަމޮރިމް ބުނެފިއެވެ. އިނގިރޭސި ލީގު ކަޕްގައި ހަތަރުވަނަ ޑިވިޝަނުގެ ޓިމެއްގެ އަތުން ބަލިވެ އެ މުބާރާތުން ކެޓި މެޗަށްފަހު ނޫސްވެރިންނާ ވާހަކަ ދައްކަމުން އަމޮރިމް ބުނެފައިވަނީ އެއީ ކޮންމެ މެޗެއް ނަމަވެސް މެޗަކުން ބަލިވެއްޖެނަމަ ތަފާތު ހިޔާލުތަކެއް އަންނަ ކަމަށެވެ. “ބައެއް ފަހަރު އަހަރެން ކުޅުންތެރިން ދެކެ ވަރަށް ބޮޑަށް ރުޅި އާދޭ އަދި ބައެއް ފަހަރު އެމީހުންދެކެ ލޯބިވެސްވޭ. ހަމަ އެގޮތަށް ކޯޗު ކަމުން އިސްތިއުފާ ދިނުމަށްވެސް ހިތަށް އަރާ އަދި ބައެއް ފަހަރު މި މަގާމުގައި 20 އަހަރު ހުންނަންވެސް ބޭނުންވޭ.” އަމޮރިމް ބުންޏެވެ.
މިދިޔަ ސީޒަނުގެ މެދުތެރޭގައި މެންޗެސްޓަރ ޔުނައިޓެޑްގެ ކޯޗު ކަމާއި ހަވާލުވި އަމޮރިމްގެ އިރުޝާދުގެ ދަށުން އެ ޓީމަށް އަދި އެދެވޭ ނަތީޖާތަކެއް ހޯދިފައިނުވާއިރު މި ސީޒަނުގެ ޕްރިމިއާ ލީގުގައި މިހާތަނަށް ކުޅުނު ދެ މެޗުގެ ތެރެއިން އެއް މެޗުން ބަލިވެ އެއް މެޗުން އެއްވަރުވެފައިވާއިރު ލީގު ކަޕުން ވަނީ ކަޓާފަ އެވެ. އަދި ކުރިއަށް މިދާ ސީޒަނުގައި ޔޫރަޕްގެ އެއްވެސް ފުޓްބޯޅަ މުބާރާތެއްގައި އެ ޓީމު ވާދައެއް ނުކުރާނެ އެވެ. އަމޮރިމް ބުނެފައިވަނީ އޭނާ އަކީ އަދިވެސް މެންޗެސްޓަރ ޔުނައިޓެޑްގެ ކޯޗު ކަމަށާއި އެހެންކަމުން މިހާރު ހުރިހާވެސް ވިސްނުމެއް ހުރީ ލީގުގައި ކުރިއަށް އޮތް މެޗަށް ކަމަށާއި އެ މެޗުން ރަގަޅު ނަތީޖާއެއް ހޯދުމަށް މަސައްކަތް ކުރާނެ ކަމަށެވެ.
މެންޗެސްޓަރ ޔުނައިޓެޑް އިން އަމޮރިމްގެ މުސްތަގުބަލާއި ގުޅޭ ގޮތުން މިހާތަނަށް އެއްޗެއް ބުނެފައިނުވާއިރު ބައެއް މީޑިޔާ ރިޕޯޓްތައް ބުނެފައިވާ ގޮތުގައި އަމޮރިމް މަގާމުން ދުރު ކުރުމާއި ގުޅޭ ގޮތުން އެ ކްލަބުން ގޮތެއް ނިންމާފައެއް ނުވެއެވެ.
Happy
0 %
Sad
100 %
Excited
0 %
Sleepy
0 %
Angry
0 %
Surprise
0 %
0
0