Read Time:3 Minute, 43 Second
ފެނަކައިގެ ކުރީގެ މެނޭޖިން ޑިރެކްޓަރު އަހްމަދު ސައީދަށް ދައުވާކުރާ ކޮރަޕްޝަންގެ މައްސަލައާ ގުޅިގެން، އަމިއްލަ ފަރުދެއްގެ ނަމުގައި ރަޖިސްޓްރީކޮށްފައިވާ ކައިޒާން އިންވެސްޓްމަންޓަށް 30 ދުވަހުގެ ތެރޭގައި 7.2 މިލިއަން ރުފިޔާ ދައްކަން ސިވިލް ކޯޓުން އިއްޔެ ހުކުމްކޮށްފި އެވެ. މި މައްސަލަ ގުޅިފައިވަނީ ލ. މާމެންދޫގައި ކައިޒާން އިންވެސްޓްމަންޓުން ހަދާފައި ހުރި އައިސްޕްލާންޓެއް ފެނަކައިން ގަތުމުގައި ކޮރަޕްޝަންގެ އަމަލުތަކެއް ހިންގާފައިވާ ކަމަށް ތުހުމަތުކުރެވޭ މައްސަލައާއެވެ. މި މައްސަލައިގައި ސައީދުގެ އިތުރުން ފެނަކައިގެ ކުރީގެ ޗީފް އެކައުންޓަންޓް މުހައްމަދު މަސްއޫދުގެ މައްޗަށް ވަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާ އުފުލާފައެވެ.
ކައިޒާން އިންވެސްޓްމަންޓުން ދައުވާކޮށްފައިވަނީ، އައިސްޕްލާންޓް ގަތުމަށް ހެދި އެއްބަސްވުމުގެ ދަށުން ލިބެންޖެހޭ 7.2 މިލިއަން ރުފިޔާ އާއި، ގެއްލުމުގެ ގޮތުގައި 580،155ރ. އަދި ޝަރީއަތުގެ ހަރަދުގެ ގޮތުގައި 100،000ރ. ހޯދުމަށެވެ. ފެނަކައިން އެއްބަސްވެފައިވަނީ 7.2 މިލިއަން ރުފިޔާ ނުދައްކާކަމަށެވެ. ކޯޓުން ހުކުމްކުރީ ފެނަކައިން އިއުތިރާފުވެފައިވާ 7.2 މިލިއަން ރުފިޔާ 30 ދުވަހުގެ ތެރޭގައި ދެއްކުމަށެވެ. ނަމަވެސް ގެއްލުމުގެ ބަދަލާއި ޝަރީއަތުގެ ހަރަދުގެ ގޮތުގައި އެދިފައިވާ ފައިސާ ނަގައިދެވޭނެ ގޮތެއް ނެތް ކަމަށް ކަނޑައެޅިއެވެ.
ޖިނާއީ ދައުވާގައިވާ ގޮތުން، ފެނަކައިން މާމެންދޫގައި އައިސްޕްލާންޓެއް ހަދަން ނިންމާފައި އޮއްވައި، ޓެންޑާ ކޮމިޓީގެ ބަހެއް ނެތި އަދި ފައިސާގެ ގޮތުން ފައިދާހުރި މަޝްރޫއެއް ނޫން ކަމަށް ބިޒްނަސް ޕްލޭނުގައި އޮއްވައި، ކައިޒާން އިންވެސްޓްމަންޓުން 11.3 މިލިއަން ރުފިޔާއަށް އައިސްޕްލާންޓް ގަތީއެވެ. ސައީދު ވަނީ ބޯޑު ބައްދަލުވުމެއްގައި ބައިވެރިވެ، ފެނަކައިގެ އަމިއްލަ މަސައްކަތުގެ މައުލޫމާތު ހާމަނުކޮށް، މި ގަނެވުނު އައިސްޕްލާންޓްގެ އެއްބަސްވުމުގައި ސޮއިކޮށް، 11.3 މިލިއަން ރުފިޔާ ދެއްކުމަށް މަގުފަހިކޮށްދީފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0