ވިލާތުގެ ބާރުތަކުން އަލުން ދަތި ކުރުމުގެ ފިޔަވަޅުތައް އަޅައިފި ނަމަ ނަތީޖާ ގޯސްވާނެ: އީރާން

Read Time:6 Minute, 45 Second

(ފޮޓޯ ކްރެޑިޓްސް: ރޮއިޓާރސް)

ވިލާތުގެ ބާރުތަކުން އީރާނާ ދެކޮޅަށް ދަތި ކުރުމުގެ ފިޔަވަޅުތައް އެޅުމަށް އަލުން ނިންމައިފި ނަމަ ނަތީޖާ ވަރަށް ހިތިވާނެ ކަމުގައި ބުނެ، އީރާނުން ވަރުގަދަ އިންޒާރެއް ދީފިއެވެ. އީރާންގެ ޚާރިޖީ ވުޒާރާގެ ތަރުޖަމާނު އިސްމާޢީލް ބަޣާއީ ވިދާޅުވީ، އެކުވެރި ދައުލަތްތައް (އދ) މެދުވެރިކޮށް އީރާނާ ދެކޮޅަށް ދަތި ކުރުމުގެ ފިޔަވަޅުތައް އެޅުމަށް ވިލާތުގެ މައި ތިންބާރުގެ ގޮތުގައި ބެލެވޭ ޤައުމުތަކުން މަސައްކަތް ކުރަމުންދާ ކަމުގައެވެ. އަދި، އެ ގޮތަށް އަމަލު ކޮށްފި ނަމަ، އެ ކަމުގެ ނަތީޖާ ހިތިވާނެ ކަމުގައި ބުނެ އީރާނުން އިންޒާރު ދީފައިވާނެ ކަމުގައެވެ. އީރާންގެ ނިއުކްލިޔަރ ޕުރޮގުރާމާ ގުޅޭ ގޮތުން އެ ޤައުމުން މިހާރު ވެސް ދަނީ ވިލާތުގެ ތިން ބާރުގެ ގޮތުގައި ބެލެވޭ އިނގިރޭސިވިލާތާއި، ފަރަންސޭސިވިލާތުގެ އިތުރުން ޖަރުމަނުވިލާތާ އެކު މަޝްވަރާތައް ބާއްވަމުންނެވެ. ‘އީ3’ގެ ނަމުން މުޚާޠަބު ކުރެވޭ އެ ތިން ޤައުމުގެ އިސް އޮފިޝަލުންނާ އެކު އީރާންގެ އޮފިޝަލުން ދާދި ފަހުން ވަނީ ސްވިޓްޒަލެންޑްގެ ޖެނީވާގައި މުހިންމު ބައްދަލުވުންތަކެއް ބާއްވާފައެވެ. އީ3ގެ ޤައުމުތަކުން މަސައްކަތް ކުރަމުން ދަނީ އީރާނާ ދެކޮޅަށް އދ މެދުވެރިކޮށް އަލުން ދަތި ކުރުމުގެ ފިޔަވަޅުތައް އެޅުމަށެވެ. ނަމަވެސް، ބަޣާއީ ވިދާޅުވީ އެ ކަން ކުރުމުގެ ޙައްޤު އެ ޤައުމުތަކަށް ލިބިގެން ނުވާ ކަމަށާއި، އެ ކަން އެ ޤައުމުތަކަށް އަންގާފައިވާނެ ކަމުގައެވެ. އަދި، އިތުރު މަޝްވަރާތަކާ އެކު ކުރިއަށް ދިޔުމަށް ހަތަރު ޤައުމުން ނިންމާފައިވާ ކަމުގައި ވެސް އޭނާ ވިދާޅުވިއެވެ.

އީރާނާއި ހުޅަނގާ ދެމެދު ޚިޔާލު ތަފާތުވުން އުފެދިފައި ވަނީ އީރާންގެ ނިއުކްލިޔަރ ޕުރޮގުރާމާ ގުޅޭ ގޮތުންނެވެ. އީރާނުން ބޭނުން ވަނީ ސުލްޙަވެރި ނިއުކްލިޔަރ ޕުރޮގުރާމެއް ހިންގުމަށެވެ. ނަމަވެސް، އެއީ ނިއުކްލިޔަރ ހަތިޔާރު އުފެއްދުމަށް ހިންގާ ޕުރޮގުރާމެއް ކަމުގައި އެމެރިކާގެ އިތުރުން ހުޅަނގުގެ ބާރުތަކާއި ޔަހޫދީން ދަނީ ތުހުމަތު ކުރަމުންނެވެ. އެމެރިކާއަކީ ޔަހޫދީންގެ އެންމެ ބޮޑު މަދަދުގާރެވެ. އީރާންގެ ނިއުކްލިޔަރ ޕުރޮގުރާމަކީ ޒަޔަނިސްޓު ދައުލަތުގެ ސަލާމަތާއި ރައްކާތެރިކަމަށް، އަދި ކުރިމަގާއި ދެމިއޮތުމަށް އޮތް އެންމެ ބޮޑު ނުރައްކަލުގެ ގޮތުގައި އެމެރިކާގެ ރައީސް ޑޮނަލްޑް ޓްރަމްޕާއި ޔަހޫދީން ސިފަ ކުރެއެވެ. އެމެރިކާއިން ދެމުންދާ އިންޒާރުތަކަށް ނުސިހޭނެ ކަމަށާއި، އެމެރިކާގެ އަމުރުތަކަށް ބޯނުލަނބާނެ ކަމުގައި ވިދާޅުވެ، އީރާންގެ ރޫހީ އެންމެ މަތީ ވެރިޔާ އާޔަތުالله ޢަލީ އަލް-ޚާމަނާއީ ވެސް ދާދިފަހުން ވަނީ ރައީސް ޓްރަމްޕަށް އިންޒާރު ދެއްވާފައިވެއެވެ. ޚާމަނާއީ ވިދާޅުވެފައި ވަނީ، ތަހްރާނާއި ވޮޝިންގްޓަނާ ދެމެދު އުފެދިފައި އޮތް ދެބަސްވުންތަކަކީ ޙައްލު ކުރެވޭނެ ފަދަ މައްސަލައެއް ނޫން ކަމުގައެވެ.

އީރާންގެ ނިއުކްލިޔަރ ޕުރޮގުރާމަށް ބާރާއި ނުފޫޒު ފޯރުވައި، އެ ޕުރޮގުރާމު ކޮންޓުރޯލު ކުރުމަށް ޓްރަމްޕް އިސްނަންގަވައިގެން ދާދި ފަހުން ދެ ޤައުމުގެ ދެމެދުގައި މުހިންމު މަޝްވަރާތަކެއް ފެށިއެވެ. ނަމަވެސް، އެ ކަން ބަލައިނުގަނެވިގެން ޔަހޫދީން ވަނީ އިސްވެ އީރާނަށް ނިރުބަވެރި ޙަމަލާތަކެއް ދީފައެވެ. 12 ދުވަހަށް އެ ޙަމަލާތައް ދެމިގެން ދިޔައެވެ. ޔަހޫދީންގެ ޙަމަލާތައް އަމާޒު ކޮށްފައި ވަނީ އީރާންގެ ނިއުކްލިިޔަރ ޕުރޮގުރާމު ހިންގާ މައި މަރުކަޒުތަކަށެވެ. އަދި، ޖޫން 22ވަނަ ދުވަހު، އެމެރިކާއިން ވެސް ވަނީ ޔަހޫދީންނާ ބައިވެރިވެފައެވެ. އަދި، އީރާންގެ ތިން ނިއުކްލިޔަރ މަރުކަޒަކަށް ނުރައްކާތެރި ހަތިޔާރުތަކެއް ބޭނުން ކޮށްގެން ވަރުގަދަ ޙަމަލާތަކެއް ދީފައެވެ. ޔަހޫދީންނާއި ޓްރަމްޕް ގުޅިގެން އީރާނަށް ދީފައިވާ ޙަމަލާތަކާ އެކު އީރާނުން ވަނީ އެމެރިކާއާ އެކު ކުރަމުން ދިޔަ މަޝްވަރާތައް މެދުކަނޑައިލާފައެވެ.