Read Time:4 Minute, 15 Second
އިނގިރޭސި ލީގު ކަޕް ނުވަތަ ކަރަބާއޯ ކަޕުގެ ދެވަނަ ބުރުގައި ހަތަރުވަނަ ޑިވިޝަނުގެ ގްރިމްސްބީ އަތުން ޕެނަލްޓީ ޖަހައިގެން 12-11 ގެ ނަތީޖާއަކުން ބަލިވެ، މެންޗެސްޓާ ޔުނައިޓެޑް މުބާރާތުން ކަޓައިފިއެވެ. ގްރިމްސްބީގެ ދަނޑުގައި ކުޅުނު މި މެޗަށް ނިކުތް މެންޗެސްޓަރ ޔުނައިޓެޑްގެ ފުރަތަމަ ޓީމަށް ރުބެން އަމޮރިމް ބަދަލުތަކެއް ގެނެސްފައިވާއިރު އޭނާ ވަނީ ކީޕަރަކަށް އެންޑްރޭ އޮނާނާ ހިމަނާފަ އެވެ. އަދި ފޯވަޑް އެމްބުއެމޯ އާއި މޭސަން މައުންޓް އާއި ބްރޫނޯ ފެނާންޑޭޒްގެ އިތުރުން ކަސެމީރޯ ފަދަ ކުޅުންތެރިން ތިބީ ބެންޗުގަ އެވެ. ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެން ގޮސްފައިވާ މި މެޗުގެ 22 ވަނަ މިނިޓުގައި ގްރިމްސްބީގެ ޗާލްސް ވާރނަމް ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ. އަދި އޭގެ އަށް މިނިޓު ފަހުން ޔުނައިޓެޑްގެ ކީޕަރު އެންޑްރޭ އޮނާނާ އަށް ހެދުނު ގޯހެއްގެ ފައިދާ ނަގާ ޓައިރެން ވޮރެލް ވަނީ ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ.
މެޗުގެ ދެވަނަ ހާފުގައި އަމޮރިމް ވަނީ ޓީމަށް ބަދަލުތަކެއް ގެނެސްފަ އެވެ. އަދި މެޗުގެ 75 ވަނަ މިނިޓުގައި ބްރަޔަން އެމްބުއޭމޯ ވަނީ ލަނޑެއް ޖަހާ އެ ޓީމުގެ އުންމީދުތައް އައު ކޮށްދީފަ އެވެ. މި މެޗުގެ ނަތީޖާ ޔުނައިޓެޑަށް އެއްވަރުކޮށްދީފައިވަނީ މެޗުގެ ފުރިހަމަ ވަގުތު ހަމަވާން މިނިޓަކަށް ވެފައިވަނިކޮށް ހެރީ މެގުއާ ކާމިޔާބުކޮށްދިން ލަނޑުންނެވެ. މެޗުގެ ފުރިހަމަ ވަގުތު ހަމަވިއިރު 2-2 ގެ ނަތީޖާއަކުން ދެ ޓީމު އެއްވަރުވެފައިވާތީ ނަތީޖާ ނެރުމަށް ވަނީ ޕެނަލްޓީ ޖަހައިފަ އެވެ. އަދި މެޗުގެ ފުރަތަމަ ފަސް ޕެނަލްޓީ ޖެހިއިރުވެސް ދެ ޓީމު އެއްވަރުވެފައިވާތީ ކޮންމެ ޓީމެއް އިތުރު ޕެނަލްޓީ އެއް ޖަހަމުންގޮސް މެޗުގެ ނަތީޖާ ނެރެވިފައިވަނީ 12-11 އިންނެވެ. މި މެޗުން ޔުނައިޓެޑް ބަލިވެފައިވަނީ އެމްބުއޭމޯ ޖެހި ދެވަނަ ޕެނަލްޓީ ނާކާމިޔާބުވުމާއި ގުޅިގެންނެވެ.
މެންޗެސްޓަރ ޔުނައިޓެޑް މި މެޗުން ބަލިވެ މުބާރާތުން ކަޓާފައިވާއިރު މީގެ ކުރިން އެ ކްލަބު އިނގިރޭސި ހަތަރުވަނަ ޑިވިޝަނުގެ ކްލަބެއްގެ އަތުން ބަލިވެފައެއް ނުވެއެވެ. 1948 ވަނަ އަހަރަށްފަހު ފުރަތަމަ ފަހަރަށް މި ދެ ޓީމު ބައްދަލުކުރިއިރު, މި މެޗުން ގްރިމްސްބީ މޮޅުވުމާއިއެކު މިއީ އެ ކްލަބުގެ ތާރީޚުގައި ހޯދުނު އެންމެ ބޮޑު އެއް ކާމިޔާބީގެ ގޮތުގައި އެ ކްލަބުންވަނީ ފާހަގަކޮށްފަ އެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0