ރޮހިންޔާ ރެފިއުޖީންނަށް ދޭނެ އެހީއެއް ނެތް، މައްސަލަ ޙައްލު ކުރަން ބައިނަލްއަޤްވާމީ އެއްބާރުލުން ބޭނުން: ބަންގްލަދޭޝް

Read Time:6 Minute, 15 Second

(ފޮޓޯ ކްރެޑިޓްސް: ރޮއިޓާރސް)

ބަންގްލަދޭޝްގެ ކޮކްސް ބާޒާރުގައި ދިރިއުޅެމުންދާ ރޮހިންޔާ ދަރިކޮޅުގެ ރެފިއުޖީންނަށް ކާބޯތަކެއްޗާއި އިންސާނީ އެހީތެރިކަން ފޯރުކޮށްދެވޭނެ މިންވަރު ނެތް ކަމުގައި ބުނެ، ބައިނަލްއަޤްވާމީ މުޖުތަމަޢުގެ އެހީތެރިކަމާއި އެއްބާރުލުމަށް ބަންގްލަދޭޝް ސަރުކާރުން ގޮވައިލައިފިއެވެ. ރޮހިންޔާއިންނަކީ، މިޔަންމާގެ އަސްކަރީ ސަރުކާރާއި ހައްދުފަހަނަ އެޅި ސިފައިން ހިންގަމުންދާ ޤަތުލުޢާންމުން ސަލާމަތްވުމަށް ބަންގްލަދޭޝަށް ހިޖުރަ ކޮށްފައިވާ މުސްލިމުންގެ ދަރިކޮޅެކެވެ. ކޮކްސް ބާޒާރުގައި ޤާއިމު ކޮށްފައިވާ ރެފިއުޖީ ކޭމްޕުގައި 1.3 މިލިޔަނަށްވުރެ ގިނަ ރޮހިންޔާއިން ދިރިއުޅޭ ކަން ތަފާސްހިސާބުތަކުން ސާފުވެއެވެ. ރޮހިންޔާ ދަރިކޮޅުގެ އެތަކެއް ސަތޭކަ ހާސް ބަޔަކު ބަންގްލަދޭޝަށް ހިޖުރަ ކޮށްފައި ވަނީ 2017ވަނަ އަހަރުއެވެ. މި ވަގުތު ކޮކްސް ބާޒާރުގައި ދިރިއުޅޭ 1.3 މިލިޔަނެއްހާ ރޮހިންޔާއިންގެ ތެރެއިން ދެބައިކުޅަ އެއް ބަޔަކީ ކުޑަކުދިންނެވެ.

ކޮކްސް ބާޒާރުގައި ދިރިއުޅޭ ރޮހިންޔާއިންގެ ހާލަތާ ގުޅޭ ގޮތުން ވާހަކަފުޅު ދައްކަވަމުން ބަންގްލަދޭޝްގައި ވެރިކަން ކުރާ ވަގުތީ ސަރުކާރުގެ އިސް މުޝީރު މުޙައްމަދު ޔޫނުސް ވިދާޅުވީ، އެ މީހުންނަށް ކާބޯތައްޗާއި އިންސާނީ އެހީތެރިކަން ފޯރުކޮށްދެވޭނެ މިންވަރު އެ ޤައުމުގެ ސަރުކާރުގެ ކިބައިގައި ނެތް ކަމުގައެވެ. އަދި، އެ މީހުންނަށް އިންސާނީ އެހީތެރިކަން ފޯރުކޮށްދިނުމަށް ބަންގްލަދޭޝްގެ ސަރުކާރުން ކުރަމުންދާ މަސައްކަތްތަކުގެ ސަބަބުން އެ ޤައުމަށް އިޤުތިޞާދީ ގޮތުންނާއި ތިމާވެށީގެ ގޮތުން ބޮޑެތި ބުރަތަކެއް އުފުލަން ޖެހިފައިވާ ކަމުގައެވެ. “މި ވަގުތު ކުރިމަތީގައި އޮތް ގޮންޖެހުންތަކަށް ބަލާއިރު، ކުރިއަށް އޮތް ތަނުގައި [ރޮހިންޔާ ރެފިއުޖީންނަށް] އެހީތެރިކަން ފޯރުކޮށްދިނުމަށް އެތެރޭގެ ވަސީލަތްތައް ބޭނުން ކުރެވޭނެ ކަމުގެ އުންމީދެއް ނެތް. ރޮހިންޔާއިންގެ މައްސަލަ، އަދި އެ މައްސަލައަށް ދާއިމީ ޙައްލެއް ހޯދުމަކީ ބައިނަލްއަޤްވާމީ މައިދާނުގެ ސުރުޚީތަކުން ފޮހެލައިގެން ވާނެ ކަމެއް ނޫން،” ޔޫނުސް ވިދާޅުވިއެވެ. އެ މީހުންނަށް އެހީތެރިކަން ފޯރުކޮށްދީ، އަނބުރާ ވަޒަނަށް ދަތުރު ކުރުމުގެ ފުރުޞަތު އެ މީހުންނަށް ހޯދައިދިނުމަށް ބައިނަލްއަޤްވާމީ މުޖުތަމަޢުން އެހީތެރިކަން ފޯރުކޮށްދިނުމަށް ވެސް އޭނާ ވަނީ ގޮވައިލައްވާފައެވެ.

ޔޫނުސް މި މޭރުމުން ވާހަކަފުޅު ދައްކަވާފައި މި ވަނީ، އެތަކެއް ސަތޭކަ ހާސް ރޮހިންޔާއިންނެއް ބަންގްލަދޭޝަށް ހިޖުރަކުރި ހާދިސާއަށް އަށް އަހަރު ފުރުން ފާހަގަ ކުރުމުގެ ގޮތުންނެވެ. 2017ވަނަ އަހަރު 700,000އަށްވުރެ ގިނަ ރޮހިންޔާއިން ބަންގްލަދޭޝަށް ހިޖުރަ ކުރިއެވެ. އެ މީހުންނަށް ހިޔާވަހިކަން ފޯރުކޮށްދިނުމަށް ބަންގްލަދޭޝް ސަރުކާރުން ކޮކްސް ބާޒާރުގައި ބޮޑު ރެފިއުޖީ ކޭމްޕެއް ޤާއިމު ކޮށްފައިވާއިރު، އެއީ މި ވަގުތު ދުނިޔޭގައި އޮތް އެ ފަދަ އެންމެ ބޮޑު ކޭމްޕެވެ. މިޔަންމާގެ ރާކައިން ސްޓޭޓްގައި ދިރިއުޅޭ ރޮހިންޔާ ދަރިކޮޅުގެ މުސްލިމުންނާ ދެކޮޅަށް މިޔަންމާގެ އަސްކަރީ ސަރުކާރާއި ބުދު ދީނުގެ ހައްދުފަހަނަ އެޅި ސިފައިން އަދިވެސް ދަނީ ޤަތުލުޢާންމު ހިންގަމުންނެވެ. އެ އަނިޔާވެރި ކަމުން ސަލާމަތްވުމަށް ފާއިތުވި އަހަރެއްހާ ދުވަހުުގެ ތެރޭގައި އިތުރު 150,000އެއްހާ ރޮހިންޔާއިން ބަންގްލަދޭޝަށް ހިޖުރަ ކޮށްފައިވެއެވެ. ބަންގްލަދޭޝްގެ އިތުރުން އިރުމަތީ އޭޝިޔާގެ ބައެއް ޤައުމުތަކަށް ވެސް ރޮހިންޔާ ދަރިކޮޅުގެ މީހުން ދަނީ ހިޖުރަ ކުރަމުންނެވެ.