ފަލަސްޠީނުގެ ޙައްޤުގައި އޮސްޓްރޭލިޔާގައި ބޮޑެތި އެއްވުންތަކެއް

Read Time:8 Minute, 8 Second

(ފޮޓޯ ކްރެޑިޓްސް: ރޮއިޓާރސް)

ފަލަސްޠީނުގެ ރައްޔިތުންގެ ޙައްޤުގައި، އޮސްޓްރޭލިޔާގެ އެކި ސަރަޙައްދުތަކުގައި އެތައް ހާސް މީހުން އެއްވެ، ޔަހޫދީންގެ ނިރުބަވެރި ދަޢުލަތާ ދެކޮޅަށް އަޑުއުފުލައިފިއެވެ. މި އެއްވުންތައް ބާއްވާފައިމިވަނީ، ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަންނަން އޮސްޓްރޭލިޔާއިން ނިންމި ނިންމުމާމެދު ޔަހޫދީން ހިތްހަމަނުޖެހި، ދެ ޤައުމުގެ ގުޅުން ވަރަށް ބޮޑަށް ގޯސްވެފައިވާ ދަނޑިވަޅެއްގައެވެ. މި އެއްވުންތައް އިންތިޒާމުކުރި ޕަލަސްޓީނިއަން އެކްޝަން ގުރޫޕުން ބުނީ، އޮސްޓްރޭލިޔާގެ އެކި ސަރަޙައްދުތަކުގައި 40 އަށް ވުރެ ގިނަ އެއްވުންތައް ކުރިއަށް ގޮސްފައިވާކަމަށެވެ. މިގޮތުން، ސިޑްނީ، މެލްބަން އަދި ބްރިޒްބަންގައި ބޭއްވި އެއްވުންތަކުގައި 350،000 އެއްހާ މީހުން ބައިވެރިވެފައިވާކަމަށް އެ ޖަމުޢިއްޔާއިން ބުންޏެވެ.

މި އެއްވުންތަކުގައި ބައިވެރި މީހުން ވަނީ، ފަލަސްޠީނުގެ ޣައްޒާ ބަނޑަށް ޖައްސައިގެން ޔަހޫދީންގެ ނިރުބަވެރި ދަޢުލަތުން ހިންގާ ނަސްލު ހޭދަކުރުން ވަގުތުން ހުއްޓައިލަން ގޮވާލައިފައެވެ. އަންނަ މަހު އޮންނަ އދ.ގެ އާންމު މަޖިލީހުގެ ބައްދަލުވުމުގައި، ފަލަސްޠީނަކީ މިނިވަން ދަޢުލަތެއްގެ ގޮތުގައި އޮސްޓްރޭލިޔާއިން ރަސްމީކޮށް ބަލައިގަންނާނެ ކަމަށް އޮސްޓްރޭލިޔާގެ ބޮޑުވަޒީރު އެންތަނީ އަލްބަނީސް އިޢުލާނުކުރެއްވީ މި މަހުގެ 11 ވަނަ ދުވަހުއެވެ. އެއީ ފަލަސްޠީނުގެ މިނިވަން ދަޢުލަތެއް ޤާއިމުކުރުމަށް ބާރު އެޅުމުގެ ގޮތުން ނިންމާފައިވާ ނިންމުމެއް ކަމަށް އޭނާ ވިދާޅުވިއެވެ. އޮސްޓްރޭލިޔާގެ ވަޒީރުންގެ މަޖިލީހުގެ މަޝްވަރާގެ މަތިން އެ ނިންމުން ނިންމާފައިވަނީ، ފަލަސްޠީނުގެ މިނިވަން ދަޢުލަތެއް ޤާއިމުވެ، އުފައްދާ ސަރުކާރެއްގައި ޙަމާސް ޖަމާޢަތުގެ ދައުރެއް ނޯންނާނެކަމަށް ޕަލަސްޓީނިއަން އޮތޯރިޓީން ދީފައިވާ ޔަޤީންކަމުގެ މައްޗަށް ކަމަށް ވެސް އޭނާ ހާމަކުރެއްވިއެވެ.

އޭގެފަހުން، ޔަހޫދީންގެ ޖައްބާރު ބޮޑުވަޒީރު ބެންޖަމިން ނަތަންޔާހޫ ވަނީ އަލްބަނީސްއަށް ނިސްބަތް ކުރައްވާ ހޫނު ބަހުގެ ޙަމަލާތަކެއް ދީފައެވެ. އޮސްޓްރޭލިޔާގެ އިތުރުން، އަންނަ ސެޕްޓެމްބަރު މަހު އޮންނަ އދ.ގެ އާންމު މަޖިލީހުގެ ކުރިން ޣައްޒާއަށް ދެމުންދާ ޢުދުވާނުތައް ނުހުއްޓައިފިނަމަ، ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަންނާނެ ކަމަށް ފަރަންސޭސިވިލާތާއި އިނގިރޭސިވިލާތުން ވެސް ވަނީ ބުނެފައެވެ. ޣައްޒާއަށް ކުރިމަތިވެފައިވާ ބަނޑުހައިހޫނުކަމުގެ ޙާލަތުގެ ސަބަބުން ޔަހޫދީންނަށް މިހާރު ވެސް ދަނީ ބައިނަލްއަޤްވާމީ ފިއްތުންތައް ކުރިމަތިވަމުންނެވެ. ޔަހޫދީންނަށް އަމާޒުވަމުންދިޔަ ފާޑުކިޔުންތަކުގެ ސަބަބުން ބައެެއް ވަގުތުތަކުގައި ޣައްޒާއަށް ޙަމަލާ ދިނުން މެދުކަނޑައިލައި އެހީގެ ސާމާނު އެތެރެކުރުމަށް ފުރުޞަތު ދިނުމަށް ވަނީ މަޖުބޫރުވެފައެވެ. ޖުލައި މަހުގެ 27ވަނަ ދުވަހުން ފެށިގެން އެ ފުރުޞަތު ދޭނެ ކަމަށް ޔަހޫދީން ބުނި ނަމަވެސް ދުނިޔޭގެ ކާބޯތަކެއްޗާބެހޭ ޖަމުޢިއްޔާ، ޑަބްލިޔުއެފްޕީން ވަނީ ޣައްޒާއަށް އެހީގެ ސާމާނު އެތެރެކުރުމަށް ބޭނުންވާ ޙުއްދަތަޢް އެ ޖަމުޢިއްޔާއަށް ނުލިބޭ ކަމަށް ބުނެފައެވެ.

ޣައްޒާގައި ބަނޑުހައިހޫނުކަމުގެ ސަބަބުން ބަނޑަށްޖެހޭ މީހުންނާއި މެލްނިއުޓްރިޝަން ޙާލަތު ކުރިމަތިވެފައިވާ މީހުންނާއި ބަނޑުހައިހޫނުކަމާ ގުޅުންހުރި އެހެނިހެން ބަލިތައް ޖެހޭ މީހުންގެ ޢަދަދު އިތުރުވަމުންދާތީ ބަނޑުހައިހޫނުކަމުގެ ސަބަބުން މަރުވަމުންދާ މީހުންގެ ޢަދަދު ވެސް ބޮޑުތަނުން އިތުރުވެފައިވާ ކަމަށް އެހީދޭ ޖަމުޢިއްޔާތަކުން ދަނީ ބުނަމުންނެވެ. ޔަހޫދީންގެ ޢުދުވާންތަކަށް ކެތް ނުކުރެވިގެން 2023ވަނަ އަހަރުގެ އޮކްޓޯބަރު މަހުގެ 7ވަނަ ދުވަހު ޣައްޒާގައި ވެރިކަންކުރާ ޙަމާސް ޖަމާޢަތުން ޔަހޫދީންނަށް އަމާޒު ކޮށް ދިން ޖިހާދީ ޙަމަލާއަކާ ގުޅިގެން، އެ ޙަމަލާތަކުގެ ބަދަލު ހިފުމުގެ ގޮތުން ޔަހޫދީ ފައުޖުން ވަނީ ޣައްޒާގެ ރައްޔިތުންގެ ނަސްލުހޭދު ކުރުމަށް ޤަތުލުޢާންމެއް ފަށާފައެވެ. ޙަމާސް ޖަމާޢަތާއި ޔަހޫދީންނާ ދެމެދު ޖަނަވަރީ 19ވަނަ ދުވަހު ޢަމަލު ކުރަން ފެށި ޢުދުވާން ހުއްޓާލުމުގެ އެއްބަސްވުމެއްގެ ދަށުން ޙަމަލާ ބަދަލު ކުރުން ދުވަސްކޮޅަކަށް މެދުކަނޑައިލި ނަމަވެސް، އެ އެއްބަސްވުމާ ޚިލާފުވެ މާރިޗު 18ވަނަ ދުވަހު ޔަހޫދީ ފައުޖުން ވަނީ އަލުން ޣައްޒާއަށް ޙަމަލާ ދޭން ފަށާފައެވެ.

ޢުދުވާން ފެށުނު ފަހުން ޣައްޒާގައި ޝަހީދުވި މީހުންގެ ޖުމްލަ ޢަދަދު މިހާރު ވަނީ 61،000އަށްވުރެ އިތުރުވެފައެވެ. ޙަމަލާތަކުގެ ސަބަބުން މުޅި ޣައްޒާ ވަނީ ސުންނާފަތިވެފައެވެ.