ޤައުމީ ލޯތްބާއި ކުލުނުވެރިކަމުން ފުރިފައިވާ ހިތްތަކެއް އުފަންކުރަންޖެހޭ!

Read Time:4 Minute, 16 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ޤައުމީ ދުވަހަކީ ޤައުމީ ރޫޙާއި ލޯބި އާލާކޮށް، ތާރީޚީ ޢިބްރަތް ޙާޞިލުކުރާ ދުވަހެކެވެ. 4،000 އަހަރަށްވުރެ ދިގު މިނިވަން ތާރީޚެއް އޮތް ދިވެހިރާއްޖެއަށް، އެކި ދުވަސްވަރުގައި އެކި ބާރުތަކުގެ އަޅުވެތިކަމާއި ޙިމާޔަތުގެ ނުރައްކާތައް ކުރިމަތިވެފައިވެއެވެ. ނަމަވެސް، ކޮންމެ ފަހަރަކުވެސް ޤައުމަށްޓަކައި ޤުރުބާންވި ބަޠަލުންގެ ސަބަބުން މިނިވަންކަން އަބަދުވެސް ރައްކާތެރިވެފައިވެއެވެ. ދިވެހިންނަށް އެންމެ ބޮޑަށް ކުރިމަތިވި އަޅުވެތިކަމަކީ 1558 ވަނަ އަހަރު ޕޯޗުގީޒުން ރާއްޖެ ހިފުމެވެ. މާލެއަށް ތިން ވަނަ ފަހަރު ޙަމަލާދީ، އޭރު ރަސްކަމުގައި ހުންނެވި ސުލްޠާން ޢަލީ (6 ވަނަ) ޝަހީދުކޮށްލުމަށްފަހު، އެމީހުން ދިވެހި ތަޚުތަށް ވެރިވިއެވެ. ޕޯޗުގީޒުން މާލޭގައި މަރުކަޒު ޤާއިމުކޮށް، އަތޮޅުތަކަށް އެމީހުންގެ ވެރިން ފޮނުވިއެވެ. ގާތްގަނޑަކަށް 10 އަހަރު ދިވެހިން އަޅުވެތިކޮށް، ފަހުން ގެތައް ލޫޓުވައި، މީހުންނަށް އަނިޔާކޮށް، އެމީހުންގެ ދީން ދިވެހިންނަށް ހުށަހަޅަން ފެށިއެވެ.

މި ނާމާން ދުވަސްވަރުގައި، ބޮޑުތިލަދުންމަތީ އުތީމަށް ނިސްބަތްވެވަޑައިގަންނަވާ ތިން ބޭފުޅުން ކަމަށްވާ އުތީމު މުޙައްމަދު ތަކުރުފާނާއި ޙަސަން ތަކުރުފާނާއި ޢަލި ތަކުރުފާނު ޤައުމުގެ ދިފާޢުގައި ނުކުމެވަޑައިގަތެވެ. މަލިކާއި ދުވާފަރުން ވެސް ބޭފުޅުން މި ލަޝްކަރާ ގުޅިވަޑައިގަތެވެ. ވަރަށް ފަރުވާތެރިކަމާއި ރޭވުންތެރިކަމާއެކު 5 އަހަރު ދިގު ހަނގުރާމައެއް ކުރައްވައި، ރާއްޖޭގެ އެކި ކަންކޮޅުތަކުގައި ތިބި ޕޯޗުގީޒު ސިފައިން ޤަތުލުކުރައްވައި، ފަހަރަކު ރަށެއް ފަތަޙަ ކުރެއްވިއެވެ. އެންމެ ފަހުން ވެރިރަށް މާލެ ފަތަޙަ ކުރެއްވުމާއެކު 15 އަހަރު ދިގު އަޅުވެތިކަމަކަށް ނިމުން އައެވެ. އުތީމު މުޙައްމަދު ތަކުރުފާނަށް ޕޯޗުގީޒުންގެ އެހީގައި ފަސޭހަ ދިރިއުޅުމެއް އުޅުމުގެ ފުރުޞަތު އޮތް ނަމަވެސް، އެމަނިކުފާނު އިސްކުރެއްވީ އަމިއްލަ ނަފްސުގެ އަރާމަށްވުރެ ޤައުމުގެ މިނިވަންކަމާއި ސިޔާދަތެވެ. އެމަނިކުފާނާއި އެމަނިކުފާނުގެ ލަޝްކަރުގެ ހިތްވަރުގަދަ ޖިހާދުގެ ސަބަބުން، ދިވެހި ޤައުމަށް މިނިވަންކަން އަނބުރާ ލިބުނެވެ.

މިއަދުގެ ޤައުމީ ދުވަހަކީ، މި ބަޠަލުންގެ ހިތްވަރުން ޢިބުރަތް ޙާޞިލުކޮށް، ޤައުމަށް އޮންނަ ލޯތްބާއި ކުލުނުވެރިކަން އަބަދުވެސް ދިރުވައި އާލާކުރުމަށް ހަނދާންކޮށްދޭ ދުވަހެކެވެ.