ރާއްޖޭގެ ކޮންމެ ރަށަކުން ފުޓްބޯޅަ ޝަޚުޞިއްޔަތެއް ހޮވަނީ

Read Time:4 Minute, 50 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ރާއްޖޭގެ މީހުން ދިރިއުޅޭ ކޮންމެ ރަށަކުން ފުޓުބޯޅަ ޝަޚުޞިއްޔަތެއް ހޮވުމަށް ނިންމާފައިވާކަމަށް އެފްއޭއެމުން އެކުލަވާލާފައިވާ ޑައިމަންޓް ޖުބިލީ ކޮމިޓީން ބުނެފިއެވެ. ރާއްޖޭގެ ފުޓުބޯޅައަށް 75 އަހަރުފުރުމާ ގުޅިގެން އެކަން ފާހަގަކުރުމަށް އެފްއޭއެމްއިން އެކުލަވާލާފައިވާ ކޮމިޓީން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެކޮމިޓީގެ ޗެެއާމަން އަލީ ސުޒައިން ވިދާޅުވީ ރާއްޖޭގެ ފުޓުބޯޅައަށް 75 އަހަރުފުރޭ މުނާސަބާއާއި ގުޅުވައިގެން ރާއްޖޭގެ ކޮންމެ ރަށަކުން ފުޓުބޯޅަ ޝަޚުޞިއްޔަތެއް ހޮވުމަށް ނިންމާފައިވާކަމަށެވެ. ކޮންމެ ރަށަކުންވެސް ފުޓުބޯޅަ ޝަޚުޞިއްޔަތު ހޮވުމަށް އެރަށެއްގެ ކައުންސިލާއި ޖަމްޢިއްޔާތަކުގެ އެހީތެރިކަން ހޯއްދަވާނެކަމަށް ސުޒައިން ފާހަގަކުރެއްވިއެވެ. މިކަން ކުރުމަށް އެފްއޭއެމްއިން ޚާއްސަ ކްރައިޓީރިއާއެއް ހަދާނެކަމަށާ، އެފްއޭއެމްގެ ފަރާތުން މިކަމަށް ދޭންވާ އެންމެހާ އެއްބާރުލުމެއް ދެއްވާނެކަމަށް ސުޒައިން ވިދާޅުވިއެވެ.

“އަޅުގަނޑުމެން ދިވެހިރާއްޖޭގެ މީހުން ދިރިއުޅޭ ކޮންމެ ރަށެއްގެ ފުޓުބޯޅަ ޝަޚުޞިއްޔަތު ހޯދާނަން އިރާދަކުރެއްވިއްޔާ. އެކަން ކުރާނީ އެރަށެއްގެ ކައުންސިލާއި އެރަށެއްގައި ހުރި ހުރިހާ ޖަމިއްޔާއެއްވެގެން ކުރާނީ. އަޅުގަނޑުމެން ދެން އޭގަ ދޭންވާ ހުރިހާ ސަޕޯޓެއް ދޭނަން. މިކޮޅުން އަޅުގަނޑުމެން ކްރައިޓީރިއާއެއް ހަދާނަން. މީހުން ދިރިއުޅޭ ކޮންމެ ރަށެއްގެ މި ހަތްދިހަ ފަސް އަހަރުގެ ފުޓުބޯޅައިގެ ޝަޚުޞިއްޔަތު އަޅުގަނޑުމެން ހޮވާނަން” ސުޒައިން ވިދާޅުވިއެވެ. ސުޒައިން ވިދާޅުވީ މިމަސައްކަތުގައި ހުރިހާ ރަށެއް ޝާމިލުވެ އެއްވާރުލުންދެއްވާނެކަމަށް ގަބޫލުކުރައްވާކަމަށެވެ. ފާއިތުވެ ދިޔަ 75 އަހަރުތެރޭގައި ކޮންމެ ރަށަކުންވެސް ފުޓުބޯޅައިގައި ފާހަގަކޮށްލެވޭ ޝަޚުޞިއްޔަތެއް ހުންނާނެކަމަށާ މިކަމަކީ ބައެއް ރަށްރަށުގައި ވާދަވެރިކަން ބޮޑުވާނެކަމެއްކަމަށް ގަބޫލުކުރައްވާކަމަށެވެ. މިގޮތުން ވާދަވެރިކަމަކަށް ނުގޮސްވެސް ބައެއް ރަށްރަށުން މިފަދަ ޝަޚުޞިއްޔަތުން ހޮވާލެވިދާނެކަމަށް ސުޒައިން ވިދާޅުވިއެވެ.

“މިސާލަކަށް ކުޅުންތެރިޔާގެ ކޮމިޓްމަންޓާ އޭނަގެ ފަރާތުން ރަށަށް އެލިބުނު ރީތި ނަމާ އެހުރިހާ އެއްޗަކަށްވުރެ ބޮޑު އެއްޗެއް ގެނެސްދީފަ އޮވެދާނެ މިސާލަކަށް ރެފްރީއެއްވެސް ހުރެދާނެ. ކޮމަންޓޭޓަރެއްވެސް ހުރެދާނެ. ނޫސްވެރިއެއްވެސް ހުރެދާނެ. ފުޓުބޯޅައިން އޭނަ އެރަށަށް ގެނެސްދިން ރީތިނަމަށް ބަލާފަ އެރަށަކުން ނިންމާނީ. އަޅުގަނޑުމެން ހަމައެކަނި އޭތި އަޅުގަނޑުމެންގެ ކްރައިޓީރިއާއަށް ފެތޭތޯ ބަލާނީ” ސުޒައިން ވިދާޅުވިއެވެ.