ޕުޓިންނަށް ފަހު ޒެލެންސްކީ ވެސް އެމެރިކާއަށް، ވިލާތުގެ ވެރިންނާ ޓްރަމްޕް އަނެއްކާވެސް މަޝްވަރާކުރައްވައިފި

Read Time:6 Minute, 6 Second

(ފޮޓޯ ކްރެޑިޓްްސް: ރޮއިޓާރސް)

އެމެރިކާގެ ރައީސް ޑޮނަލްޑް ޓްރަމްޕްއާ ބައްދަލުކުރެއްވުމަށް ޔޫކްރެއިންގެ ރައީސް ވޮލޮޑިމީރު ޒެލެންސްކީ އޮގަސްޓު މަހުގެ 18ވަނަ ދުވަހު ވޮޝިންޓަނަށް ވަޑައިގަންނަވާނެ ކަމަށް ވިދާޅުވެއްޖެއެވެ. ޓްރަމްޕްއާއި ރަޝިޔާގެ ރައީސް ވްލަޑްމީރު ޕުޓިން ވަނީ އޮގަސްޓު މަހުގެ 15ވަނަ ދުވަހު އެމެރިކާގެ އަލަސްކާގައި ބައްދަލުކުރައްވައިފައެވެ. އެ ބައްދަލުވުމުގައި ރަޝިޔާއާއި ޔޫކްރެއިނާ ދެމެދު ކުރަމުންދާ ހަނގުރާމަ ހުއްޓައިލުމާ ގުޅޭ މަޝްވަރާތައް ކޮށްފައިވެއެވެ. އެ މަޝްވަރާތަކުގައި ހަނގުރާމަ ހުއްޓާލުމަށް އެއްބަސްވުމެއް އެކުލަވާލާފައި ނުވި ނަމަވެސް އެ ބައްދަލުވުމަކީ ކާމިޔާބު މަޝްވަރާތަކެއްގެ ގޮތުގައި ދެ ބޭފުޅުން ވެސް ވަނީ ސިފަކުރައްވައިފައެވެ.

ތިން ގަޑިއިރެއްހާ އިރަށް ދެމިގެން ދިޔަ މި ބައްދަލުވުމަށް ފަހު ޓްރަމްޕް ވަނީ ޒެލެންސްކީއާއި ވިލާތުގެ އަސްކަރީ އިއްތިޙާދާއި ނޭޓޯއާއި ވިލާތުގެ އިސްވެރިންނާ ވާހަކަދައްކަވައިފައެވެ. އެ ކޯލުގައި ޔޫރަޕިއަން ކޮމިޝަންގެ ރައީސް އުރްސަލާ ވޮން ޑަރ ލެޔެންއާއި ނޭޓޯގެ ސެކެޓްރީ ޖެނެރަލް މާކް ރުހްތޭއާއި ފަރަންސޭސިވިލާތުގެ ރައީސް އެމަނުއެލް މެޚްރޮންއާއި ޖަރުމަނުވިލާތާއި ފިންލެންޑާއި ޕޮލެންޑާއި އިޓަލީވިލާތާއި އިނގިރޭސިވިލާތުގެ އިސްވެރިން ބައިވެެރިވެވަޑައިގެންފައިވެއެވެ. ޓްރަމްޕް އެ ބޭފުޅުންނާ ވާހަކަ ދައްކަވާފައި ވަނީ އަލަސްކާއިން އެނބުރި ވޮޝިންޓަނަށް ވަޑައިގެންނެވި މަގުމަތީގައެވެ. ޒެލެންސްކީ ވިދާޅުވީ 90 މިނެޓަށް ދެމިގެންދިޔަ އެ ފޯނު ކޯލަކީ ދިގު އަދި އޮށްޓަރު ހުރި މަޝްވަރާތައް ކުރިއަށް ދިޔަ ކޯލެއް ކަމަށެވެ. ޒެލެންސްކީ ވިދާޅުވީ އެމެރިކާއާއި ރަޝިޔާއާއި ޔޫކްރެއިން އެއް މޭޒެއްގެ ދޮށުގައި ތިބެ މަޝްވަރާ ކުރުމަށް ޓްރަމްޕް ހުށަހަޅުއްވާފައިވާ ހުށަހެޅުމަށް އޭނާ ތާއީދުކުރައްވާ ކަމަށެވެ. ޔޫކްރެއިންގެ ސަލާމަތީ ކަންކަން ކަށަވަރުކުރުމުގައި ބައިވެރިވުމާ ގުޅޭގޮތުން އެމެރިކާއިން ކޮށްފައިވާ އިޝާރާތްތަކާ ގުޅޭގޮތުން ޓްރަމްޕްއާއެކު މަޝްވަރާކުުރެއްވި ކަމަށް ވެސް އޭނާ ވިދާޅުވިއެވެ.

އެކްސްގައި ކުރެއްވި ޕޯސްޓެއްގައި ޒެލެންސްކީ އިތުރަށް ވިދާޅުވީ ޔޫކްރެއިނުން ބާރުއަޅަނީ މުހިންމު މައްސަލަތަކާ މެދު ތިން ޤައުމުގެ ލީޑަރުންގެ ފެންވަރުގައި މަޝްވަރާތައް ކުރުމަށް ކަމަށާއި، ތިން ޤައުމުން އެކުގައި ކުރާ މަޝްވަރާތަކުގައި އެ މައްސަލަތަކާ ގުޅޭގޮތުން ވާހަކަ ދެއްކުމަކީ އެ މަޝްވަރާތައް ކުރުމަށް އެންމެ އެކަށީގެންވާ ގޮތް ކަމަށެވެ. އަންނަ ހޯމަ ދުވަހު ޓްރަމްޕްއާ ބައްދަލުކުރައްވާނެ ކަމަށާއި ލޭއޮޮރުވުންތަކާއި ހަނގުރާމަ ހުއްޓުމާ ގުޅޭ ތަފްސީލީ މަޝްވަރާތައް އެ ބައްދަލުވުމުގައި ކުރިއަށް ގެންދަވާނެ ކަމަށް ވެސް އޭނާ ވިދާޅުވެފައިވެއެވެ.

އެނގިފައިވާ ގޮތުގައި ޒެލެންސްކީއާއި ވިލާތުގެ އިސްވެރިންނާއެކު ޓްރަމްޕް ކުރެއްވި ފޯނު ކޯލުގައި ޙަމަލާތައް ހުއްޓައިލުމަށް ޕުޓިންގެ ޝައުޤުވެރިކަމެއް ނެތް ކަމަށާއި ޕުޓިން ބޭނުންވެވަޑައިގަންނަވަނީ ހަނގުރާމަ ހުއްޓައިލުމާ ގުޅޭ ވަށާޖެހޭ އެއްބަސްވުމެއް ޤާއިމް ކުރުމަށް ކަމަށް ޓްރަމްޕް ވިދާޅުވެފައިވެއެވެ. އަދި އަވަސް ގޮތަކަށް ޤާއިމް ކުރެވޭ ސުލްޙައިގެ އެއްބަސްވުމެއް ވަގުތީ ގޮތުން ޙަމަލާ ބަދަލުކުރުން ހުއްޓައިލުމަށްވުރެ ރަނގަޅު ކަމަށް ދެކިވަޑައިގަންނަވާ ކަމަށް ވެސް ޓްރަމްޕް ވިދާޅުވެފައިވާ ކަމަށްވެއެވެ.