އިނގިރޭސި ޕްރިމިއަރ ލީގުގެ އައު ސީޒަނުގައިވެސް ދުނިޔޭގެ ސަމާލުކަމަށް ރާއްޖެ އަންނާނެ

Read Time:3 Minute, 30 Second

2025 އޮގަސްޓް 15 ގައި ފަށާ އިނގިރޭސި ޕްރިމިއާ ލީގުގެ އައު ސީޒަންގައި، ދިވެހިރާއްޖޭގެ ބްރޭންޑް ލިވަޕޫލް އެފްސީގެ އެންފީލްޑް ސްޓޭޑިއަމްގައި އަނެއްކާވެސް ދައްކާލާނެ ކަމަށް ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން ބުނެފިއެވެ. ވީއެމްސީން ބުނި ގޮތުގައި، މިކަމުގެ ސަބަބުން މިލިއަނަށްވުރެ ގިނަ ބެލުންތެރިންނަށް ރާއްޖޭގެ ބްރޭންޑް ފެންނާނެ ކަމަށާއި، ލައިވް މެޗުތަކާއި ޑިޖިޓަލް ޕްލެޓްފޯމްތައް މެދުވެރިކޮށް 600 މިލިއަން ބެލުންތެރިންނަށް ރާއްޖެ އިސްތިހާރުވާނެއެވެ. އައު ސީޒަނަށް ތައްޔާރުވުމުގެ ގޮތުން، ލިވަޕޫލް އެފްސީގެ ޕްރީ-ސީޒަން ހަރަކާތްތަކުގައި ވިޒިޓް މޯލްޑިވްސް ބައިވެރިވެފައިވާއިރު، ވީއެމްސީގެ ވެބްސައިޓަށް ޒިޔާރަތްކުރި މީހުންގެ އަދަދު 400 އިންސައްތަ އިތުރުވެފައިވެއެވެ.

މާރޗް 13، 2025 ގައި ވެވުނު އެއްބަސްވުމުގެ ދަށުން، 2025-2028 އަށް ރާއްޖެއަކީ ލިވަޕޫލް އެފްސީގެ ރަސްމީ ޓުއަރިސްޓް ޑެސްޓިނޭޝަން ޕާޓްނަރެވެ. މި އެއްބަސްވުމާއެކު 200 މިލިއަނަށްވުރެ ގިނަ ސަޕޯޓަރުންގެ ކުރިމަތީގައި ރާއްޖެ އިސްތިހާރުވާނެއެވެ. ވީއެމްސީން ބުނީ މި ކެމްޕެއިން ފެށިތާ 24 ގަޑިއިރުގެ ތެރޭގައި 400 މިލިއަނަށްވުރެ ގިނަ މީހުންނަށް ޑިޖިޓަލް ޗެނަލްތައް މެދުވެރިކޮށް ވާސިލްވެފައިވާކަމަށާއި، މިއީ ރާއްޖެއަށް މިހާތަނަށް ލިބިފައިނުވާ ވަރުގެ ގްލޯބަލް އެކްސްޕޯޝަރއެއް ކަމަށެވެ. ކެމްޕެއިންގެ ތެރެއިން ލަންޑަންގެ ދެ ބުރި ބަސްތަކާއި ދުބާއީގެ ޓެކްސީތަކުގައިވެސް ރާއްޖޭގެ ބްރޭންޑިންގ ހަރުކުރެވުނެވެ.

މިއީ ހަމައެކަނި ފަތުރުވެރިންނަށް އަމާޒުކުރި ކެމްޕެއިނެއް ނޫން ކަމަށާއި، ފުޓްބޯޅައާއި ޤައުމީ ފަޚުރާއި ޤައުމީވަންތަކަމާ ގުޅިފައިވާ ކަމެއް ކަމަށް ވީއެމްސީން ބުނެއެވެ. މިގޮތުން، ރާއްޖޭގައިވެސް އެލްއެފްސީ ފޭން ޒޯންތައް ތަޢާރަފުކޮށް، ހުޅުމާލޭގައި ބޭއްވި މޯލްޑިވްސް ފުޑް ކާނިވަލުގައި ލިވަޕޫލްގެ ލެޖެންޑް ޑެރކް ކައުޓް ބައިވެރިވެފައިވެއެވެ.