ހިއްކުމަށްފަހު ބޭނުންނުކުރެވި ހުރި ބިންބިމުގައި އަސާސީ ބިނާރު ޤާއިމުކުރުމުގެ ބިޔަ މަޝްރޫޢެއް އަންނަ އަހަރު ފަށަނީ

Read Time:8 Minute, 37 Second

(ފޮޓޯ ކްރެޑިޓްސް: ރައީސް އޮފީސް)

ހިއްކުމަށްފަހު ބޭނުންނުކުރެވި ހުރި ބިންބިމުގައި އަސާސީ ބިނާރު ޤާއިމުކުރުމުގެ ބިޔަ މަޝްރޫޢެއް އަންނަ އަހަރުގެ ބަޖެޓުގައި ހިމަނުއްވާނޭކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ، މާޅޮސްމަޑުލު ދެކުނުބުރީގެ މީހުން ދިރިއުޅޭ ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި، އެ އަތޮޅު އޭދަފުށީ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ. އޭދަފުށީގެ ހިއްކި ސަރަޙައްދަށް ބޭނުންވާ ފެނާއި ނަރުދަމާ އާއި ކަރަންޓުގެ ޚިދުމަތް ޤާއިމުކުރުމުގެ މައްސަލައަށް އިޝާރާތްކުރައްވަމުން އެ މަނިކުފާނު ވިދާޅުވީ، މިއީ ރާއްޖޭގެ އެކި ކަންކޮޅުތަކަށް ކުރިމަތިވެފައިވާ، ދުވަސްވީ މައްސަލައެއް ކަމަށެވެ. ވުމާއެކު، ބޭނުންނުކުރެވި ހުރި ހިއްކި ބިންބިމުގައި އަސާސީ ބިނާރު ޤާއިމުކުރުމުގެ ބިޔަ މަޝްރޫޢެއް ހިންގެވުން، ނިއު ޕޮލިސީ އިނީޝިއަޓިވެއްގެ ގޮތުގައި އަންނަ އަހަރުގެ ބަޖެޓުގައި ހިމަނުއްވައި، ވަކި ތަރުތީބަކުން އެ މައްސަލަ ޙައްލުކުރައްވާނޭ ކަމަށް އެ މަނިކުފާނު ވިދާޅުވިއެވެ.

” އަޅުގަނޑުމެން މިއަންނަ އަހަރަށް ބަޖެޓު މި ހަދަނީ މިކަމަށް ޚާއްސަ ޕްރޮގްރާމެއް ހިމނައިގެން. މިއަންނަ އަހަރުގެ ބަޖެޓު ހަދާއިރުގަ ޚާއްސަ ނިއު ޕޮލިސީ އިނީޝިއޭޓިވް ޕްރޮގްރާމެއް އެބަަ ހިމަނަން. ހިއްކާފަ ހުރި ބިންތަކަށް ބޭނުންވާ ޔޫޓިލިޓީސް ޤާއިމްކޮށްދިނުމާއި، އިންފްރާސްރަކްޗަރ ޤާއިމްކޮށްދިނުމުގެ މަޝްރޫޢު ހިމަނާފަ. އޭގެތެރޭގަ ހަމަ އިސްކަންދޭނީ ހަމަ އާބާދީއާއި ތަރައްޤީ އިސްފަސް ކުރެވޭނެ ރަށްތަކަށް. ދެން ހަމަ އާބާދީ ބޮޑެތި ރަށްތަކަށް. މިގޮތަށްގޮސް ތަރުތީބުކުރެވިގެންދާނެ. އޭގެތެރޭގަ މިރަށްހަމަ އެންމެ އިސްކަމެއްދީގެން މިއަހަރުވެސް ހަމަ މީޣެތެރެއިން ފެށެން އޮތް ބައެއް ފޭސެސް އޮތްތޯ ބަލާފަ ފަށާނަން. ފަށަން މަސައްކަތްކުރާނަން”. ރައީސް ވިދާޅުވިއެވެ. އޭދަފުށީގެ ތަރައްޤީއަށް ވެވަޑައިގަންނަވާފައިވާ ރިޔާސީ ވަޢުދުތަކަށް އިޝާރާތްކުރައްވައި، އެވަޢުދުތަކާ ގުޅުންހުރި ގިނަ ދާއިރާތަކުން ކުރައްވާ މަސައްކަތްތަކުގެ އަދާހަމަ އެ މަނިކުފާނު ވަނީ ހިއްސާކުރައްވާފައެވެ. އެގޮތުން، 1000 ހައުސިންގ ޔުނިޓު ޤާއިމުކުރުމުގެ މަސައްކަތުގެ ޢަމަލީ މަސައްކަތް މި އަހަރު ފައްޓަވައި، މި ދައުރުގެ ތެރޭގައި ނިންމަވާނޭކަމަށް އެ މަނިކުފާނު ވިދާޅުވިއެވެ.

ކުރިއަށް އޮތް ހަ މަސް ދުވަހުގެ ތެރޭގައި ބަނދަރުގެ މަސައްކަތް ނިމޭނޭ ކަމަށް ކަމާބެހޭ ފަރާތްތަކުން އަންދާޒާ ކުރައްވާކަމަށާއި، އިންޑޯ މަލްޓި ސްޕޯޓްސް ކޮމްޕްލެކްސް އެއް ޤާއިމުކުރެއްވުމުގެ ޢަމަލީ މަސައްކަތް މި އަހަރު ފައްޓަވާނޭކަމަށްވެސް އެ މަނިކުފާނު ވިދާޅުވިއެވެ. މީގެ އިތުރުން މި އަހަރުގެ ތެރޭގައި ޔޫ.އެސް ޑޮލަރުގެ ޚިދުމަތް ދޭ އޭ.ޓީ.އެމް އެއް ޤާއިމުކޮށްދެއްވާނޭކަމަށް އެ މަނިކުފާނު ވިދާޅުވިއެވެ. އަދި އަލަށް ގޯތި ދޫކުރާ ސަރަޙައްދަށް އެކްސްޓެންޝަން ހިމެނޭ ގޮތަށް، ރަށުގެ ކަރަންޓާއި ފެން ފަދަ ޔުޓިލިޓީ ޚިދުމަތްތަކުގެ ފެންވަރު މަތިކުރުމަށް، މި އަހަރާއި އަންނަ އަހަރު ވުނަކުރައްވާނޭކަމަށްވެސް އެ މަނިކުފާނު ވިދާޅުވިއެވެ. އޭދަފުށި ވެސް ހިމެނޭހެން، ކޮންވެންޝަން ސެންޓަރުތައް ޤާއިމުކުރައްވާނޭކަމަށް ވަޢުދުވެވަޑައިގެންފައިވާ ރަށްރަށުގައި، އަންނަ އަހަރު އެ މަސައްކަތް ފައްޓަވާނޭކަމަށްވެސް އެ މަނިކުފާނު ވިދާޅުވިއެވެ.

ރައީސުލްޖުމްހޫރިއްޔާގެ މި ދަތުރުފުޅުގެ ތެރޭގައި ހިމެނިގެން އޭދަފުށީގައި މިއަދު ވަނީ އާރް.ޓީ.އެލް ފެރީގެ ޚިދުމަތް ރަސްމީގޮތުން ފައްޓަވައިދެއްވާފައެވެ. އަދި މިރޭގެ ބައްދަލުކުރެއްވުމުގައި ވަނީ، ދިވެހިރާއްޖޭގެ ޤައުމީ ޔުނިވަރސިޓީގެ ކެމްޕަހެއް އޭދަފުށީގައި ޤާއިމުކުރެއްވުމުގެ އެއްބަސްވުމުގައްޔާއި ބ. އަތޮޅު ހޮސްޕިޓަލުގެ އާ ޢިމާރާތުގެ މަސައްކަތް ހަވާލުކުރެއްވުމުގެ އެއްބަސްވުމުގައި ސޮއިކުރައްވާފައެވެ. މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ، މި އަހަރުގެ ރިޔާސީ ބަޔާނުގައި އެ މަނިކުފާނު ތަފްޞީލުދެއްވި، ޤައުމީ ތަރައްޤީގެ ރޭވުންތަކުގެ މައްޗަށް އަލިއަޅުއްވާލައްވައި ވާހަކަފުޅުދައްކަވާފައެވެ. އަދި އެ ކަންކަން ތަންފީޒުކުރެވި ޤާއިމުކުރެވިގެންދިއުމާއެކު، ޚިދުމަތްތައް ލާމަރުކަޒުވެ، ރައްޔިތުންނަށް ޙަޤީޤީ ބާރުވެރިކަން ކަށަވަރުވެގެންދާނޭކަން އެ މަނިކުފާނު ފާހަގަކުރެއްވިއެވެ.

ކައުންސިލްތަކުގެ އިލްތިޒާމަކީ، ސަރުކާރުން ކަނޑައަޅުއްވާ ސިޔާސަތުތައް ތަންފީޒުކުރެއްވުމާއި ރައްޔިތުންނަށް ޚިދުމަތް ކުރެއްވުން ކަންވެސް އެ މަނިކުފާނު ހަނދުމަކޮށްދެއްވިއެވެ. އަދި ސިޔާސީ ވިސްނުން އެއްގޮތް ނުވިކަމުގައިވިޔަސް، ތަރައްޤީގެ ވިސްނުން އެއްގޮތްކުރެއްވުމަށް އެ މަނިކުފާނު ކައުންސިލްތަކަށް އިލްތިމާސްކުރެއްވިއެވެ.