Read Time:3 Minute, 39 Second
(ފޮޓޯ ކްރެޑިޓްސް: ވަގުތު)
ޖަލުގައި ތިބޭއިރު މަސައްކަތް ކުރާ ގައިދީންގެ އެލަވަންސް 25 އަހަރަށްފަހު ބޮޑުކޮށްފިއެވެ. ގައިދީން މަސައްކަތްކުރާ ކޮންމެ ދުވަހަކަށް 30ރ. ދޭ ގޮތަށް 2000 ވަނަ އަހަރު ހަމަޖެއްސި ފަހުން މިދިޔަ 25 އަހަރު ހުރިހާ ގައިދީންނަށް ވެސް އުޖޫރަ ދެމުން އައީ އެ މިންގަނޑުންނެވެ. މޯލްޑިވްސް ކަރެކްޝަނަލް ސާވިސްގެ މީޑިއާ އޮފިޝަލް އާމިނަތު ޔުސްރީން އަހުމަދު މިރޭ “ވަގުތު” އަށް ވިދާޅުވީ ގައިދީންނާއި ބަންދުގައި ތިބޭ މީހުން ކުރާ މަސައްކަތަށް ދޭ އެލަވަންސް މިހާރު ބޮޑުކޮށްފައިވާ ކަަމަށެވެ.
އެގޮތުން އެލަވަންސް ދިނުމުގައި އެކި ބާވަތުގެ މަސައްކަތަށް ބަލައި އަށް ގްރޭޑެއް ކަނޑައަޅާފައިވާއިރު 50ރ. އަކީ ގްރޭޑް 1 ނުވަތަ އެންމެ ދަށް މިންގަނޑު ކަމަށް ވިދާޅުވިއެވެ. މި މިންގަނޑު ކޮންމެ ގްރޭޑަކަށް 10ރ. ބޮޑުވާނެ ކަމަށާއި އެހެންވެ ގްރޭޑް 8 ގެ ކެޓަގަރީއާ ހިސާބަށް ދުވާލަކަށް 120ރ. ލިބޭނެ ކަމަށް ވިދާޅުވިއެވެ. ޖަލުގައި ތިބޭއިރު މަސައްކަތް ކުރާ ގައިދީންގެ އެލަވަންސް 25 އަހަރަށްފަހު ބޮޑުކޮށްފައިވާއިރު ރިހެބިލިޓޭޝަން ޕްރޮގްރާމުގެ ތެރެއިން މަސައްކަތް ކުރާ ކޮންމެ ދުވަހަކީ ޖަލު ހުކުމުން އުނިވާ ދުވަހެއް ކަމުގައި ހަދަން ނިންމާފައިވާ ކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިޙްސާން ވަނީ މިދިޔަ އަަހަރު ވިދާޅުވެފައެވެ.
އިހްސާން ވިދާޅުވީ ޖަލުގައި ގައިދީން މަސައްކަތެއް ދަސްކުރަން ހޭދަ ކުރާ ކޮންމެ ދުވަހަކީ އެމީހެއްގެ މައްޗަށް އިއްވާފައިވާ ޖަލު ހުކުމުން އުނިވާނެ ދުވަހެއްގެ ގޮތުގައި ހަމަޖެއްސުމަށްޓަކައި ކަމާ ގުޅޭ ގާނޫނުތައް އިސްލާހު ކުރެއްވުމަށް ރައީސް ޑރ. މުހައްމަދު މުއިއްޒު ނިންމަވާފައިވާ ކަމަށެވެ. ވަޒީރު ވިދާޅުވީ ގައިދީން ޖަލުގައި ގިނަ ދުވަސްތަކަކު ގެންގުޅުމަކީ ސަރުކާރުގެ ވިސްނުމެއް ނޫން ކަމަށެވެ. ރައީސް މުއިއްޒު ބޭނުންފުޅުވަނީ ޖަލުން ނިކުންނަ ކޮންމެ ގައިދީއަކީ ވެސް މުޖުތަމައަށް ބޭނުން ހިފޭ ކޮންމެވެސް މަސައްކަތެއް ކުރާ ބަޔަކަށް ހެދުމަށް ކަމަށްވެސް ވިދާޅުވިއެވެ.
Happy
80 %
Sad
10 %
Excited
0 %
Sleepy
0 %
Angry
10 %
Surprise
0 %
1
0