ސެސްކޯ ހޯދުމަށް ޔުނައިޓެޑް އިން ބިޑް ކޮށްފި

Read Time:3 Minute, 43 Second

ޖަރުމަން ބުންޑެސްލީގާގެ ކްލަބް އާރުބީ ލެޕްޒިގްގެ ފޯވަޑް ބެންޖަމިން ސެސްކޯ ހޯދުމަށް މެންޗެސްޓަރ ޔުނައިޓެޑް އިން 85 މިލިއަން ޔޫރޯގެ ބިޑެއް ހުށައަޅައިފި އެވެ. ސްލޮވޭނިޔާއަށް އުފަން އުމުރުން 22 އަހަރުގެ ސެސްކޯ ހޯދުމަށް ޔުނައިޓެޑް އިން ބިޑް ކުރި ކަމަށް އިނގިރޭސި މީޑިޔާއިން ރިޕޯޓް ކުރި ނަމަވެސް މެންޗެސްޓަރ ޔުނައިޓެޑް އިން ރަސްމީކޮށް އަދި މިކަމާއި ގުޅޭ ގޮތުން ކޮމެންޓެއް ކޮށްފައެއް ނުވެއެވެ. މީޑިޔާ ރިޕޯޓްތައް ބުނާ ގޮތުގައި ސެސްކޯ ހޯދުމަށް ޔުނައިޓެޑް އިން ހުށައެޅި ބިޑްގައި 75 މިލިއަން ޔޫރޯ ފުރަތަމަ ދިނުމަށް ހަމަޖެހިފައިވާއިރު އެޑްއޮންގެ ގޮތުގައި އިތުރު 10 މިލިއަން ޔޫރޯ ވަނީ ހިމަނާފަ އެވެ.

ސެސްކޯ ހޯދުމަށް މީގެ ކުރިން ޕްރިމިއާ ލީގުގެ ކްލަބް ނިއުކާސަލް ޔުނައިޓެޑް އިން ވެސް ވަނީ ބިޑު ކޮށްފަ އެވެ. ނިއުކާސަލް އިން 80 މިލިއަން ޔޫރޯގެ ހުށައެޅުމެއް ލެޕްޒިގް އަށް ހުށައަޅާ އެ ކަމާއި ގުޅޭ ގޮތުން ދެ ކްލަބުން ވަނީ މަޝްވަރާކޮށްފަ އެވެ. މީޑިޔާ ރިޕޯޓްތައް ބުނާ ގޮތުގައި ލެޕްޒިގް އިން ސެސްކޯ ވިއްކާލަން ބޭނުންނުވި ނަމަވެސް އޭނާ ހުރީ މެންޗެސްޓަރ ޔުނައިޓެޑާއި ގުޅެން ތައްޔާރަށެވެ. އެހެންކަމުން އޭނާ ޔުނައިޓެޑަށް ވިއްކާލުމަކީ ވަރަށް ކައިރި ކަމެކެވެ. އިސްކޮޅުގައި ހަ ފޫޓް ފަސް އިންޗި ހުންނަ ސެސްކޯ ވަނީ ލެޕްޒިގް އަށް މިހާތަނަށް ކުޅެދިން 87 މެޗުގައި ޖުމްލަ 39 ލަނޑު އެ ކްލަބަށް ޖަހައިދީފަ އެވެ.

މެންޗެސްޓަރ ޔުނައިޓެޑް އިން އިތުރު ފޯވަޑެއް ހޯދުމުގެ މަސައްކަތް ކުރަމުންދާއިރު ރުބެން އަމޮރިމް ވަނީ ރަސްމުސް ހޮއިލަންޑް އާއި އަލެހަންދްރޯ ގަރްނާޗޯ ވިއްކާލުމަށް ނިންމާފަ އެވެ. އަދި ލޯނު އެއްބަސްވުމެއްގެ ދަށުން މާކަސް ރަޝްފޯޑް ވަނީ ސްޕެއިންގެ ބާސެލޯނާއަށް ދޫކޮށްލާފަ އެވެ. މެންޗެސްޓަރ ޔުނައިޓެޑް އިން ވަނީ ކުރިއަށް އޮތް ސީޒަނަށް އެ ޓީމު އިތުރަށް ވަރުގަދަ ކުރުމުގެ ގޮތުން މެތިއުސް ކޫނިއާ އާއި ބްރަޔަން އެމްބުއޭމޯ އެ ކްލަބަށް ގެންގޮސްފަ އެވެ. މި ދެ ކުޅުންތެރިން ހޯދުމަށް އެ ކްލަބުން ވަނީ 130 މިލިއަން ޕައުންޑް ހޭދަކޮށްފަ އެވެ.