އެފްއައިޔޫގެ ކުރީގެ ވެރިޔާގެ މަގާމު ބަދަލުވުމާއި ޝުޖާއުގެ ރިޕޯޓާ ގުޅުމެއް ނެތް!

Read Time:3 Minute, 57 Second

ރައްޔިތުންގެ މަޖިލީހުގެ ބާރަށު ދާއިރާގެ މެމްބަރު އިބްރާހިމް ޝުޖާއުގެ ހިއްސާ އޮންނަ ކުންފުނިތަކަކަށް ނާޖާއިޒު މަންފާ ލިބޭ ގޮތަށް ހިންގާފައިވާ ބައެއް މުއާމަލާތްތަކަކާ ގުޅޭ ގޮތުން މަރުކަޒީ ބޭންކު އެމްއެމްއޭގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) އިން ތައްޔާރުކުރި ކަމަށް ބުނާ ރިޕޯޓާއި އެފްއައިޔޫގެ ކުރީގެ ވެރިޔާ އަބްދުﷲ އަޝްރަފް އެ މަގާމުން އެހެން މަގާމަކަށް ބަދަލުވުމާ ގުޅުމެއް ނެތްކަމަށް ހާމަވެއްޖެއެވެ. އެފްއައިޔޫ ކުރީގެ ވެރިޔާ އަބްދުﷲ އަޝްރަފް ވަނީ އެމްއެމްއޭގެ ހެޑް އޮފް ރިސްކް އެންޑް ކޮމްޕަޔަލަންސް ޑިޕާޓްމަންޓަށް ބަދަލުކޮށްފައެވެ.

ފައިނޭންޝިއަލް އިންޓެލިޖެންސް ޔުނިޓު (އެފްއައިޔޫ) ގެ ވެރިއަކަށް އިސްމާއިލް ސާޖިދު އައްޔަން ކުރައްވަން އެމްއޭއިން ނިންމެވީ ޖުލައި މަހުގެ 31 ވަނަ ދުވަހުއެވެ. އޭނާ އެ މަގާމަށް އައްޔަން ކުރައްވަން ނިންމެވީ މާދަމާއިން ފެށިގެންނެވެ. މިއީ އެމްއެމްއޭއިން މީގެ ކުރިން ވެސް ގެންނެވުމަށް ނިންމަވާފައިވާ ބަދަލަކަށް ވާއިރު ރިޕޯޓް މީސްމީޑިއާގައި އާންމުވީ އޮގަސްޓް 2 ވަނަ ދުވަހުއެވެ. އެމްއެމްއޭއިން ވިދާޅުވި ގޮތުގައި އެ ބަދަލު ގެނައީ އެމްއެމްއޭގެ ހިންގުން އިތުރަށް ހަރުދަނާ ކުރުމަށް ގެންނަމުންދާ ސްޓްރަކްޗަރަލް ބަދަލުތަކުގެ ތެރެއިންނެވެ.

ދައުލަތުގެ ހަރަދު ކުޑަކުރުމަށް ސަރުކާރުން ގެންގުޅޭ ސިޔާސަތްތަކަށް އެމްއެމްއޭއިން ވެސް ވަނީ މަރުހަބާ ކިޔައިފައެވެ. އަދި އެ އޮތޯރިޓީގެ ހިންގުން ހަރުދަނާކޮށް އެތެރޭގެ އޮނިގަނޑަށް ވެސް އަންނަނީ ބަދަލުތައް ގެންނަމުންނެވެ. މި ބަދަލުތަކާއެކު، އެމްއެމްއޭގެ ފައިނޭންޝިއަލް އިންޓެލިޖެންސް ޔުނިޓުގެ މަސައްކަތްތައް އިތުރަށް ހަރުދަނާވެ، މާލީ ކުށްތަކާ ދެކޮޅަށް ކުރަމުންދާ މަސައްކަތްތަކަށް އިތުރު ކުރިއެރުމެއް ލިބިގެންދާނެއެވެ. އެފްއައިޔޫއަކީ މަނީ ލޯންޑްރިން އަދި ނިރުބަވެރިކަމަށް ފައިނޭންސް ކުރުން ހުއްޓުވުމުގެ ގާނޫނުގެ ދަށުން މާލީ މުއާމަލާތްތަކަށް ފާރަވެރިވުމަށް އެމްއެމްއޭގައި އޮންނަ ޔުނިޓެކެވެ. އެތަނުގެ އިސްވެރިއަކަށް ބޭފުޅުން އައްޔަންކޮށް، ވަކިކުރުމުގެ ބާރު އޮންނަނީ އެމްއެމްއޭގެ ގަވަނަރުނަރަށެވެ.