10 އަހަރަށްފަހު ސޮން ޓޮޓްނަމް ދޫކޮށްލަނީ

Read Time:4 Minute, 45 Second

އިނގިރޭސި ޕްރިމިއާ ލީގުގެ ކްލަބް ޓޮޓްނަމް ހޮޓްސްޕަރ އަށް ކުޅެމުންދާ ސައުތު ކޮރެއާގެ މިޑްފީލްޑަރ ސޮން ހިއުން މިން 10 އަހަރަށްފަހު އެ ކްލަބު ދޫކޮށްލާކަން އިއުލާން ކޮށްފި އެވެ. ޓޮޓްނަމް ހޮޓްސްޕަރ އިން ސޮން އާއިއެކު ހަދާފައިވާ އެއްބަސްވުމުގެ މުއްދަތު 2026 ވަނަ އަހަރުގެ ނިޔަލަށް އޮތް ނަމަވެސް ސޮން އިއްޔެ ބުނެފައިވަނީ ޓޮޓްނަމް އާއިއެކު އޭނާ ހޭދަކުރަމުން އައި ދުވަސްތަކަށް މިހާރު ނިމުން އައިސްފައިވާ ކަމަށާއި އަންނަ ސީޒަނުގައި އޭނާ އެ ކްލަބުން ނުފެންނާނެ ކަމަށެވެ. ޖަރުމަނުގެ ބަޔާ ލެވަކޫސަން އިން 2015 ވަނަ އަހަރު ޓޮޓްނަމް އާއި ގުޅުނު ސޮން ވަނީ ނިމިގެންދިޔަ ސީޒަނުގައި ޔޫރޮޕާ ލީގުގެ ޗެމްޕިއަންކަން ޓޮޓްނަމް ހޮޓްސްޕަރ އަށް ހޯދަދީ 17 އަހަރަށްފަހު ފުރަތަމަ ފަހަރަށް އެ ޓީމަށް މުބާރާތެއް ކާމިޔާބުކޮށްދިނުމުގައި މުހިންމު ދައުރެއް އަދާކޮށްފަ އެވެ.

އަންނަ ސީޒަނުގައި ސޮން ފެނިގެންދާނެ ކްލަބެއް އޭނާ ހާމަކޮށްފައިނުވި ނަމަވެސް އިނގިރޭސި މީޑިޔާ ތަކުން ރިޕޯޓް ކޮށްފައިވާ ގޮތުގައި 33 އަހަރުގެ ސޮން ދެން ފެނިގެންދާނީ އެމެރިކާގެ މޭޖަރ ލީގުގެ ކްލަބް ލޮސް އެންޖެލެސް އެފްސީ އިންނެވެ. ކުރިއަށް އޮތް ފުޓްބޯޅަ ސީޒަނަށް ތައްޔާރުވުމުގެ ގޮތުން ޓޮޓްނަމް އިން އޭޝިޔާއަށް މިހާރު ކުރަމުންދާ ދަތުރުގައި ސޮންގެ އުފަން ގައުމު ކަމުގައިވާ ސައުތު ކޮރެއާގެ ސޯލްގައި މާދަމާ ނިއުކާސަލް އާއި ދެކޮޅަށް ކުޅޭ މެޗުގެ ކުރިން ނޫސްވެރިންނާ ވާހަކަ ދައްކަމުން ސޮން ބުނެފައިވަނީ މިއީ އޭނާ ޓޮޓްނަމް އިން ފެންނާނެ ފަހު މެޗުތައް ކަމަށެވެ.

“މިއީ އަހަރެން މި ކްލަބުން ފެންނާނެ އެންމެ ފަހު މެޗުތައް. މި ދަތުރަށްފަހު އަހަރެން ޓޮޓްނަމް ދޫކޮށްލަން ވަނީ ނިންމާފައި އަދި މިއީ އަހަރެންގެ ފުޓްބޯޅަ ހަޔާތުގައި ނިންމި އެންމެ އުނދަގޫ ނިންމުން.” ސޮން ބުންޏެވެ. ޓޮޓްނަމް ހޮޓްސްޕަރ ގައި ހޭދަކުރި ދިހަ އަހަރުގެ ތެރޭގައި ސޮން ވަނީ އެ ކްލަބަށް 454 މެޗު ކުޅެދީ 173 ލަނޑު އެ ކްލަބަށް ޖަހައިދީފަ އެވެ. އަދި 22-2021 ވަނަ އަހަރުގެ ސީޒަނުގައި ސޮން ވަނީ ޕްރިމިއާ ލީގުގެ ރަން ބޫޓްވެސް ހޯދާފަ އެވެ. ޓޮޓްނަމް ހޮޓްސްޕަރ އިން އޭޝިޔާއަށް ކުރަމުންދާ ދަތުރުގެ ކުރިންވެސް ސޮން އަންނަ ސީޒަނުގައި ޓޮޓްނަމް އިން ނުފެންނާނެކަމަށް މީޑިޔާ ރިޕޯޓްތައް ވަނީ ބުނެފަ އެވެ. އަދި އޭނާ މި ދަތުރުތަކުގައި ބައިވެރިވެފައިވަނީ މާކުރިން ހަމަޖެހިފައިވާ ދަތުރުތަކަކަށް ވާތީ އަދި ވަކިން ޙާއްސަކޮށް ސައުތު ކޮރެއާއަށް ޓޮޓްނަމް އިން ދާން ނިންމިއިރު މި މެޗުތައް ސްޕޮންސަރ ކޮށްފައިވާ ފަރާތްތަކުގެ ޝަރުތެއްގެ ގޮތުގައި ސޮން ޓީމާއިއެކު ދިއުން ހިމެނިފައިވާކަމަށްވެސް ރިޕޯޓްތައް ވަނީ ބުނެފަ އެވެ.