ކެނެޑާއާއި މަލްޓާއިން ވެސް ފަލަސްޠީން ބަލައިގަންނަން ތައްޔާރު

Read Time:7 Minute, 11 Second

(ފޮޓޯ ކްރެޑިޓްސް: ރޮއިޓާރސް)

ފަލަސްޠީނުގެ ޣައްޒާގައި ދިރިއުޅޭ ރައްޔިތުން ބަނޑަށް ޖައްސައިގެން، ޔަހޫދީން ހިނގަމުންދާ ނަސްލު ހޭދަ ކުރުމަށް ހިންގަމުންދާ ޖަރީމާތައް ހުއްޓުވުމަށް ޔަހޫދީންގެ ދަޢުލަތަށް އިތުރަށް ޕްރެޝަރު ކުރުމަށް، ކެނެޑާއިން ވެސް ފަލަސްޠީނަކީ މިނިވަން ދައުލަތެއްގެ ގޮތުގައި ބަލައިގަންނާނެ ކަމަށް އެ ޤައުމުގެ ބޮޑުވަޒީރު މާކް ކާނޭ އިޢުލާނުކުރައްވައިފިއެވެ. އަންނަ ސެޕްޓެމްބަރު މަހު އޮންނަ އދ.ގެ އާންމު މަޖިލީހުގައި އެ ކަން ރަސްމީކޮށް އިޢުލާނުކުރައްވާނެކަމަށް ކެނެޑާގެ ބޮޑުވަޒީރު ވިދާޅުވެފައިމިވަނީ، އެ ބައްދަލުވުމުގެ ކުރިން ޣައްޒާއަށް ދެމުންދާ ޢުދުވާނުތައް ނުހުއްޓައިފިނަމަ، ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަންނާނެ ކަމަށް ފަރަންސޭސިވިލާތާއި އިނގިރޭސިވިލާތުން ވެސް ބުނެފައިވަނިކޮށެވެ. ކާނީ ނޫސްވެރިންނަށް ވިދާޅުވީ، ޣައްޒާގެ ރައްޔިތުން ބަނޑަށް ޖައްސައިގެން އިސްރާއީލުން ހިންގަމުންދާ ޖަރީމާތަކުގެ ސަބަބުން، ފަލަސްޠީނުގެ މިނިވަން ދަޢުލަތެއް ޤާއިމުކުރުމުގެ ފުރުޞަތު، ދުނިޔެ ބަލަހައްޓައިގެން ތިއްބާ ގެއްލެމުންދާ ކަމަށެވެ.

އަދި ޣައްޒާ މި ނިކަމެތިކަމުގެ ތެރެއަށް ވެއްޓެމުގެ ޒިންމާ، ޔަހޫދީންގެ ދަޢުލަތުން ސީދާ ނަގަންޖެހޭކަމަށް ކެނެޑާއިން ޤަބޫލުކުރާ ކަމަށް ވެސް ކާނޭ ވިދާޅުވިއެވެ. މި ނިންމުން ބިނާވެފައިވަނީ، އޭނާ ވިދާޅުވި ގޮތުގައި، ޣައްޒާގެ ވެރިކަން ކުރާ ޙަމާސް ޖަމާޢަތުގެ ބައިވެރިވުން ނޯންނަ ގޮތަށް، ފަލަސްޠީނުގައި އަންނަ އަހަރު އާންމު އިންތިޚާބެއް ބާއްވާނެކަމަށް ޕަލަސްޓިނިއަން އޮތޯރިޓީން ދީފައިވާ ޔަޤީންކަމުގެ މައްޗަށެވެ. ކެނެޑާގެ ފަހަތުން، އދ.ގެ އާންމު މަޖިލީހުގައި، ފަލަސްޠީނަކީ މިނިވަން ދަޢުލަތެއް ކަމަށް މަލްޓާއިން ވެސް ބަލައިގަންނާނެކަމަށް އެ ޤައުމުގެ ބޮޑުވަޒީރު ރޮބަރޓް އަބެލާ ވަނީ އިޢުލާނުކުރައްވައިފައެވެ. ޣައްޒާއަށް ކުރިމަތިވެފައިވާ ބަނޑުހައިހޫނުކަމުގެ ޙާލަތުގެ ސަބަބުން ޔަހޫދީންނަށް މިހާރު ވެސް ދަނީ ބައިނަލްއަޤްވާމީ ފިއްތުންތައް ކުރިމަތިވަމުންނެވެ. ޔަހޫދީންނަށް އަމާޒުވަމުންދިޔަ ފާޑުކިޔުންތަކުގެ ސަބަބުން ބައެެއް ވަގުތުތަކުގައި ޣައްޒާއަށް ޙަމަލާ ދިނުން މެދުކަނޑައިލައި އެހީގެ ސާމާނު އެތެރެކުރުމަށް ފުރުޞަތު ދިނުމަށް ވަނީ މަޖުބޫރުވެފައެވެ. ޖުލައި މަހުގެ 27ވަނަ ދުވަހުން ފެށިގެން އެ ފުރުޞަތު ދޭނެ ކަމަށް ޔަހޫދީން ބުނި ނަމަވެސް ދުނިޔޭގެ ކާބޯތަކެއްޗާބެހޭ ޖަމުޢިއްޔާ، ޑަބްލިޔުއެފްޕީން ވަނީ ޣައްޒާއަށް އެހީގެ ސާމާނު އެތެރެކުރުމަށް ބޭނުންވާ ޙުއްދަތަޢް އެ ޖަމުޢިއްޔާއަށް ނުލިބޭ ކަމަށް ބުނެފައެވެ.

ޣައްޒާގައި ބަނޑުހައިހޫނުކަމުގެ ސަބަބުން ބަނޑަށްޖެހޭ މީހުންނާއި މެލްނިއުޓްރިޝަން ޙާލަތު ކުރިމަތިވެފައިވާ މީހުންނާއި ބަނޑުހައިހޫނުކަމާ ގުޅުންހުރި އެހެނިހެން ބަލިތައް ޖެހޭ މީހުންގެ ޢަދަދު އިތުރުވަމުންދާތީ ބަނޑުހައިހޫނުކަމުގެ ސަބަބުން މަރުވަމުންދާ މީހުންގެ ޢަދަދު ވެސް ބޮޑުތަނުން އިތުރުވެފައިވާ ކަމަށް އެހީދޭ ޖަމުޢިއްޔާތަކުން ދަނީ ބުނަމުންނެވެ.

ޔަހޫދީންގެ ޢުދުވާންތަކަށް ކެތް ނުކުރެވިގެން 2023ވަނަ އަހަރުގެ އޮކްޓޯބަރު މަހުގެ 7ވަނަ ދުވަހު ޣައްޒާގައި ވެރިކަންކުރާ ޙަމާސް ޖަމާޢަތުން ޔަހޫދީންނަށް އަމާޒު ކޮށް ދިން ޖިހާދީ ޙަމަލާއަކާ ގުޅިގެން، އެ ޙަމަލާތަކުގެ ބަދަލު ހިފުމުގެ ގޮތުން ޔަހޫދީ ފައުޖުން ވަނީ ޣައްޒާގެ ރައްޔިތުންގެ ނަސްލުހޭދު ކުރުމަށް ޤަތުލުޢާންމެއް ފަށާފައެވެ. ޙަމާސް ޖަމާޢަތާއި ޔަހޫދީންނާ ދެމެދު ޖަނަވަރީ 19ވަނަ ދުވަހު ޢަމަލު ކުރަން ފެށި ޢުދުވާން ހުއްޓާލުމުގެ އެއްބަސްވުމެއްގެ ދަށުން ޙަމަލާ ބަދަލު ކުރުން ދުވަސްކޮޅަކަށް މެދުކަނޑައިލި ނަމަވެސް، އެ އެއްބަސްވުމާ ޚިލާފުވެ މާރިޗު 18ވަނަ ދުވަހު ޔަހޫދީ ފައުޖުން ވަނީ އަލުން ޣައްޒާއަށް ޙަމަލާ ދޭން ފަށާފައެވެ.

ޢުދުވާން ފެށުނު ފަހުން ޣައްޒާގައި ޝަހީދުވި މީހުންގެ ޖުމްލަ ޢަދަދު މިހާރު ވަނީ 60،000އަށްވުރެ އިތުރުވެފައެވެ. ޙަމަލާތަކުގެ ސަބަބުން މުޅި ޣައްޒާ ވަނީ ސުންނާފަތިވެފައެވެ.