މެސީ އާއި އަލްބާ ސަސްޕެންޑް ކޮށްފި

Read Time:3 Minute, 32 Second

އެމެރިކާގެ އިންޓަ މިއާމީ އަށް ކުޅެމުން އަންނަ އާޖެންޓީނާގެ ކެޕްޓަން ލަޔޮނަލް މެސީ އާއި ސްޕޭނުގެ ޑިފެންޑަރު ޖޯޑީ އަލްބާ ސަސްޕެންޑްކޮށްފި އެވެ. މި ސަސްޕެންޝަނުގެ ސަބަބުން އެމެރިކާ ލީގުގައި މިއާމީ ކުޅޭ އެއް މެޗު މި ދެ ކުޅުންތެރިންނަށް ވެސް ގެއްލޭނެ އެވެ. އެމެރިކާ ލީގުން މި ދެ ކުޅުންތެރިން ސަސްޕެންޑް ކުރީ އެ ކުޅުންތެރިން މޭޖަ ސޮކާ ލީގުން އިންތިޒާމް ކުރާ އޯލް ސްޓާ ޓީމުގެ މެޗުގައި ކުޅެން ދެ ކޮޅު ހެދުމުންނެވެ. ލީގުން ނިންމީ މި ދެ ކުޅުންތެރިން މެޗުގައި ކުޅެން ނިންމިއިރު އެކަށީގެންވާ ސަބަބެއް ނެތް ކަމަށެވެ.

ނަމަވެސް މިއާމީގެ ކޯޗު ހާވިއާ މަޝެރާނޯ ވަނީ މި ކަމާ ވަރަށް ބޮޑަށް ނުރުހުން ފާޅުކޮށްފަ އެވެ. އޭނާ ބުނީ އޯލް ސްޓާ ޓީމުގެ މެޗެއް ކުޅުމަކީ ގޯސް ކަމެއް ނޫން ކަމަށެވެ. ނަމަވެސް ސީޒަނުގެ މެދުތެރެއިން ޓީމުތަކުގެ ތައްޔާރީތަކަށް ނޭދެވޭ އަސަރު ކުރާ ގޮތަށް މި މެޗު ކުޅުން ރަނގަޅު ނޫން ކަމަށެވެ. “މެސީ މި މެޗުގައި ކުޅެން ނިންމީ އޭނާ އަށް އުނދަގޫތަކެއް ހުރުމުން. ކޮންމެ ތިން ދުވަހަކުން މެޗު ކުޅޭއިރު ކުޅުންތެރިންނަށް ހާނިއްކަވާނެ. ނަސީބަކުން އޭނާ އަދި ބަރާބަރަށް އެ ދަނީ މެޗުތައް ކުޅެމުން. އެކަމަކު އޭނާ އަށް ހާނިއްކައިގެ މައްސަލަތަކެއް ހުރުމާއެކު މި މެޗުގައި ނުކުޅެން ނިންމީ،” މަޝެރާނޯ ބުންޏެވެ.

ނަމަވެސް ލީގުން ބުނީ ކުޅުންތެރިން ސަސްޕެންޑް ކުރީ ލީގުގެ ގަވާއިދުގައި މި މެޗަށް ނަގައިފިނަމަ ސަބަބެއް ނެތި މެޗު ނުކުޅެ ހުރެގެން ނުވާނެ ކަމަށް ބުނެފައިވާ މާއްދާގެ ދަށުން ކަމަށެވެ. އިންޓަ މިއާމީން ބުނީ މި ސަސްޕެންޝަނުގެ ސަބަބުން އެ ކުލަބުން މެސީ ލައްވައި އާ ކޮންޓްރެކްޓެއްގައި ސޮއި ކުރުވަން ކުރާ މަސައްކަތަކަށް ހުރަސް ނޭޅޭނެ ކަމަށް ވަރަށް ބޮޑަށް އުއްމީދު ކުރާ ކަމަށެވެ. އުމުރުން މިހާރު 39 އަހަރުގެ މެސީ މިހާރު ކުޅެމުންދަނީ ބޮޑު އަނިޔާއެއް ނުވެ ހުރެވޭނެ ގޮތަށެވެ. ސަބަބަކީ އަންނަ އަހަރު އެމެރިކާގައި ބާއްވާ ވޯލްޑް ކަޕުގައި ކުޅެން އޭނާ ބޭނުންވާތީ އެވެ.