Read Time:3 Minute, 7 Second
އަންނަ ހޯމަ ދުވަހު ސްރީލަންކާގެ ރައީސް އަނޫރާ ކުމާރާ ޑިސަނަޔަކަ ރާއްޖެ ވަޑައިގަތުމަށް ހަމަޖެހިއްޖެއެވެ. އެމަނިކުފާނު ރާއްޖެއަށް ވަޑައިގަންނަވަނީ ރާއްޖޭގެ ރައީސް ޑރ. މުހައްމަދު މުއިއްޒުގެ ހާއްސަ ދައުވަތަކެވެ. ރައީސް އޮފީހުން ވިދާޅުވީ ލަންކާގެ ރައީސް ރާއްޖެއަށް ވަޑައިގަތުމަށް ހަމަޖެހިފައިވަނީ ހޯމަ ދުވަހުން ފެށިގެން ބުދަ ދުވަހުގެ ނިޔަލަށް ކަމަށެވެ. ލަންކާ ރައީސްގެ މި ދަތުރުފުޅުގައި ރާއްޖެ އާއި ލަންކާއާއި ދެމެދު ރަސްމީ ވާހަކަތައް ބޭއްވުމަށް ހަމަޖެހިފައިވެއެވެ. އަދި ދެ ގައުމުގެ ދެމެދުގައި މުހިންމު ބައެއް އެއްބަސްވުންތަކުގައި ވެސް ސޮއިކުރުމަށް ހަމަޖެހިފައިވާ ކަން އެނގިފައިވެއެވެ. މިއީ ލަންކާގެ ވެރިކަމާއި ހަވާލުވެވަޑައިގެންފަހުން ޑިސަނަޔަކަ ރާއްޖެއަށް ކުރައްވާ ފުރަތަމަ ދަތުރުފުޅެވެ.
ރާއްޖެއާއި ލަންކާއާއި ދެމެދު ހާރިޖީ ގުޅުން ގާއިމްކޮށްފައިވަނީ ޖުލައި 26،1965 ގައެވެ. އެހެންކަމުން މި އަހަރު ދެ ގައުމުގެ ގުޅުމަށް ވެސް 60 އަހަރު ފުރިގެންދާނެއެވެ. ރައީސް ޑރ. މުއިއްޒުގެ ދައުވަތަކަށް އިންޑިއާގެ ބޮޑުވަޒީރު ނަރެންދުރަ މޯދީ މިއަދު ހެނދުނު ވަނީ ރާއްޖެ ވަޑައިގެންފައެވެ. މޯދީ އަށް ރަސްމީކޮށް މަރުހަބާ ދެންނެވުން އޮންނާނީ މިއަދު މެންދުރު ފަހު ޖުމްހޫރީ މައިދާނުގައެވެ. އޭގެ ފަހުން ދެ ގައުމުގެ ދެމެދުގައި ބާއްވާ ރަސްމީ މަޝްވަރާތައް ރައީސް އޮފީހުގައި ކުރިއަށްދާނެއެވެ. އެއަށް ފަހު، ދެ ގައުމުގެ ދެމެދުގައި އެއްބަސްވުންތަކެއްގައި ސޮއިކުރުމަށް ހަމަޖެހިފައިވާ ކަން އެނގިފައިވެއެވެ. ރާއްޖޭގެ މިނިވަންކަމަށް 60 އަހަރު ފުރުމުގެ މުނާސަބަތުގައި މާދަމާ ހަވީރު ޖުމްހޫރީ މައިދާނުގައި ބާއްވާ ކުޅިވަރުތައް މޯދީ ބައްލަވާލައްވާނެއެވެ.
Happy
0 %
Sad
50 %
Excited
50 %
Sleepy
0 %
Angry
0 %
Surprise
0 %
1
0