އަލަށް ފަށާ ކުޅިވަރު މަޝްރޫއުތަކުގެ ތެރޭގައި ހޭންޑްބޯޅަ ކޯޓުތައް އެޅުން އެބައޮތް: ރައީސް

Read Time:6 Minute, 11 Second

(ފޮޓޯ ކްރެޑިޓްސް: ރައީސް އޮފީސް)

އަންނަ އަހަރު އަލަށް ފަށާ ކުޅިވަރު މަޝްރޫއުތަކުގެ ތެރޭގައި ހޭންޑްބޯޅަ ކޯޓު އެޅުން އެބައޮތް ކަމަށާއި، އެ ލިސްޓުގައި ނ. ލަންދޫ ހިމެނޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މިލަދުންމަޑުލު ދެކުނުބުރިއަށް ކުރައްވަމުންގެންދަވާ ދަތުރުފުޅުގެ ތެރެއިން އެ އަތޮޅު ލަންދޫއަށް ކުރެއްވި ޒިޔާރަތުގައި އެރަށުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ. ރައީސް ޑރ. މުޢިއްޒު ލަންދޫގެ ރައްޔިތުންނާ މުޚާޠަބުކުރައްވަމުން ވިދާޅުވެފަވަނީ އެމަނިކުފާނު ވެވަޑައިގެންނެވި ރިޔާސީ ވަޢުދުފުޅުތައް ފުއްދުމުގެ ޢަމަލީ މަސައްކަތް މިފެށުނީ ކަމަށާ، ކުޅިވަރުގެ ދާއިރާއިން ވެވަޑައިގެންނެވި ވަޢުދުފުޅުތައް ވަރަށް ބޮޑު ސަމާލުކަމެއްދެއްވައިގެން ރައްޔިތުން ބޭނުންވާ ފެންވަރަށް ފުރިހަމަކޮށްދެއްވާނެކަމުގެ ޔަޤީންކަން ދެއްވާކަމަށެވެ.

ކުޅިވަރުގެ ގިނަ މަޝްރޫޢުތަކެއް މިއަހަރަށްވެސް ރާވާ ހިންގަމުން އަންނައިރު ކުރިއަށް މިއޮތް 2026 ވަނަ އަހަރު ކުޅިވަރުގެ މުޅިން އައު މަޝްރޫޢުތަކެއް ރާއްޖޭގެ އެކި ހިސާބުތަކުގައި ހިންގާނެކަމަށް ރައީސް ހާމަކުރެއްވިއެވެ. އޭގެ ތެރޭގައި ރާއްޖޭގައި ހަލުވިކަމާއެެކު ކުރިއަރަމުން އަންނަ އެއް ކުޅިވަރުކަމަށްވާ ހޭންޑްބޯލް ކުރިއެރުވުމަށް ޚާއްސަ ވިސްނުންފުޅެއް އެބައޮތްކަމަށް އެމަނިފާނު ފާހަގަކުރެއްވިއެވެ. ރާއްޖޭގެ ހުރިހާ ހިސާބެއްގައިވެސް ވައިގައި ހިފާފައިވާ މިކުޅިވަރު ތަރައްޤީކުރުމުގެ ގޮތުން އަންނަ އަހަރުގެ ބަޖެޓުގައި މިކަމަށް ޚާއްސަ ބައެއް އެކުލަވާލާ އަލަށް ފެށުމަށް ހަމަޖެހިފައިވާ މަޝްރޫޢުތަކުގެ ތެރެއަށް އެކަން އިތުރުކުރެވިފަވާކަމަށް ރައީސް ހާމަކުރެއްވިއެވެ. މިގޮތުން މި މަޝްރޫޢުގެ މަސައްކަތް އަންނަ އަހަރު ރާއްޖޭގެ އެކި ހިސާބުތަކުގައި ފެށިގެންދާނެކަމަށާ އެލިސްޓުގައި ލަންދޫ ހިމެނޭކަމުގެ އުފާވެރި ޚަބަރު އެމަނިކުފާނު ވަނީ އެރަށުގެ ރައްޔިތުންނާ ހިއްސާކުރައްވާފައެވެ.

“އަޅުގަނޑުމެން މިހާރު ޕްލޭންކޮށްފަ އޮތީ މިގޮތަށް ވަރަށް ގިނަ ރަށްތަކުގައި ހޭންޑްބޯލް ކުޅުމަށް ބޭނުންވާތީ އަދި އަޅުގަނޑުމެން ކުރިއަރުވަން ބޭނުންވާ ކުޅިވަރަކަށް ކަނޑައަޅާފަ އޮތް މަޝްރޫޢަކަށްވާތީ. މި މަޝްރޫޢަކީ ވަރަށް ގިނަ ރަށްތަކުގައި ހިންގަންޖެހޭ މަޝްރޫޢެއްވީމަ، މިއަންނަ އަހަރަށް އަޅުގަނޑުމެން ހަދާ ބަޖެޓުގައި ރާއްޖޭގެ އެކި ކަންކޮޅުތަކުގައި ހޭންޑްބޯލް ކޯޓު ހަދަންޖެހޭ ރަށްރަށުގައި އެކަންކުރުމަށް ވަކި ޕްރޮގްރާމެއް ކަނޑައަޅާ ނިއު ޕޮލިސީ އިނިޝިއޭޓިވް ނުވަތަ އަލަށް ފަށާ މަޝްރޫޢުތަކުގެ ލިސްޓަށް ލައިގެން ރާއްޖޭގެ ހޭންޑްބޯލް ކޯޓު ހަދަންޖޭހޭ ރަށްތަކުގައި ހެދުމުގެ މަޝްރޫޢެއް ގެންދިއުން. މާނައަކީ މިރަށް އޭގެ ތެރޭގައި ހިމަނައިގެން އިރާދަކުރެއްވިއްޔާ އަޅުގަނޑުމެން ހޭންޑްބޯލް ކޯޓެއް މިރަށުގައި ހަދައިދޭނަން އިރާދަކުރެއްވިއްޔާ” ލަންދޫ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައި ރައީސް ވިދާޅުވެފަވެއެވެ.

މީގެ އިތުރުންވެސް ކުޅިވަރާ ގުޅުންހުރި ގިނަ މަސައްކަތްތަކެއް ކޮށްދެއްވާނެކަމަށާ އޭގެ ތެރޭގައި ފުޓުބޯޅަ ދަނޑުހެދުމާ، ލައިޓް ޖެހުމުގެ އިތުރުން ފެންސް ޖެހުން ފަދަ ގިނަ މަރާމާތުތަކެއްވެސް ހިމަނައިގެން މި މަޝްރޫޢުތައް ކުރިއަށްދާނެކަމުގެ ޔަޤީންކަން އެމަނިކުފާނު ވަނީ ރާއްޖޭގެ ރައްޔިތުންނަށް ދެއްވާފައެވެ.