މި ފެށުނީ ފިޓްނަސް ސެންޓަރުތައް މުޅި ރާއްޖޭގައި ގާއިމުކުރުމުގެ ބޮޑު މަޝްރޫއެއް: ވަޒީރު ރާފިޢު

Read Time:6 Minute, 40 Second

(ފޮޓޯ ކްރެޑިޓްސް: ޕީއެސްއެމް ނިއުސް)

މި ދައުރުގެ ތެރޭގައި ރާއްޖޭގައި ކުޅިވަރު ވަސީލަތްތައް ތަރައްގީކުރުމަށް ކުރެވޭ މަސައްކަތުގެ ތެރެއިން މި ފެށުނީ މުޅި ރާއްޖޭގައި ފިޓްނަސް އެންޑް ރެކްރިއޭޝަން ސެންޓަރުތައް ގާއިމުކުރުމުގެ ބޮޑު މަޝްރޫއެއް ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ. ކުޅިވަރު ވަޒީރު މިހެން ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އާއެކު މިލަދުންމަޑުލު ދެކުނުބުރިއަށް ކުރައްވަމުންގެންދަވާ ދަތުރުފުޅުގެ ތެރެއިން ޕީއެސްއެމް ނިއުސްއަށް ދެއްވި ޚާއްސަ އިންޓަވިއުއެއްގައެވެ. ވަޒީރު ވިދާޅުވީ މިފެށުނީ ކުޅިވަރުގެ ބިޔަ ބޮޑު މަޝްރޫޢެއްކަމަށެވެ. މިގޮތުން ރައީސުލްޖުމްހޫރިއްޔާގެ މިދަތުރުފުޅުގެ ތެރެއިން ގިނަ ރަށްތަކެއްގައި މިމަޝްރޫޢު ފައްޓަވައިދެއްވާނެކަމަށް ވަޒިރު ހާމަކުރެއްވިއެވެ.

“މުޅި ރައްޔިތުންގެ ދުޅަހެޔޮކަމަށްޓަކައި މުޅި ރާއްޖެ ޝާމިލްވާގޮތަށް ހުރިހާ ރަށެއްގައިވެސް ފިޓްނެސް އަދި ރެކްރިއޭޝަން ސެންޓަރ ޤާއިމުކުރެވިގެން ދިއުމުގެ ބޮޑު މަޝްރޫޢެއް ފެށިގެން މިހާރު މިދަނީ. މިހާރު ރައީސުލްޖުމްހޫރިއްޔާ ކުރައްވާ ދަތުރުފުޅުތަކުގައި އެމަޝްރޫޢުގެ ފެށުން ހަމަ ގިނަ ރަށްރަށުގައި ފާހަގަކުރެވެމުން މިދަނީ. ބިންގާ އެޅުމުގެ މަޝްރޫޢާ އަދި އައުޓްޑޯރ ޖިމްގެ ކަންކަންވެސް ކުންފުނިތަކާ ޙަވާލުކުރެވިގެން ބިން އެލޮކޭޓްކޮށް އަދި އެތަނުގައި ފައުންޑޭޝަންގެ މަސައްކަތް ކުރެވޭގޮތަށް އިންތިޒާމު ހަމަޖެހިގެން މިދަނީ” ވަޒީރު ރާފިޢު ވިދާޅުވިއެވެ. މިސަރުކާރުން ވެރިކަމާ ޙަވާލުވުމަށްފަހު ދަނީ ކުޅިވަރުގެ ގިނަ މަޝްރޫޢުތަކެއް ކުރިއަށް ގެންދަމުންނެވެ. މިގޮތުން ކުޅިވަރުގެ މުޅިން އައު މަޝްރޫޢުތަކެއް ފެށިގެން ކުރިއަށްދާއިރު، ކުރިން މަސައްކަތްފައްޓާ އެހެންނަމަވެސް ހުއްޓިފައިވާ ގިނަ މަޝްރޫޢުތަކެއް ނިންމުމުގެ މަސައްކަތްވެސް މިސަރުކާރުންވަނީ ފަށާފައެވެ. އެގޮތުން ދަނޑުތަކާއި، ކޯޓުތަކުގެ އާބާތުރަ ފިލުވުމާ މަރާމާތުގެ މަސައްކަތުގެ އިތުރުން އެންމެ ޒަމާނީ ފެންވަރަށް މި ތަންތަން ތަރައްޤީކުރުން ހިމެނެއެވެ.

ޕީއެސްއެމް ނިއުސްއާ ވާހަކަދައްކަވަމުން ވަޒީރު ވިދާޅުވީ މިފަދަ ނުނިމި ހުރި ގިނަ މަޝްރޫޢުތަކެއްގެ އަމަލީ މަސައްކަތް ފެށިފަވާއިރު، ހަލުވި ދުވެލީގައި މިމަސައްކަތްތައް ކުރިއަށްދާކަމަށެވެ. އަދި މި މަޝްރޫޢުތައް ނިމޭ ވަރަކުން އެކަން ފާހަގަކުރަމުންދާކަމަށް ވަޒީރު ވަނީ ހާމަކުއްވާފައެވެ. “އަޅުގަނޑުމެންގެ ސަރުކާރު އައި އިރުގައި ނުނިމިހުރި ބެއް މަޝްރޫޢުތައް ނިންމަމުން އެނިމުންވެސް އަޅުގަނޑުމެން އެބަ ފާހަގަކުރަން. އަދި ހަމަ އެއާއެކު ސްޕެޝަލް ޕްރޮޖެކްޓުން ބޭރުން ކުރީގައި އަދި އަޅުގަނޑުމެންގެ ސަރުކާރުން ފެށި މަޝްރޫޢުތައް އިތުރަށް ބާރަށް ކުރިއަށްގެންދެވޭނެ ގޮތަކަށް ރައްޔިތުންނާ ވާހަކަދައްކައިގެން ބިމުގެ ކުދިކުދި ކަންތައްތައް މައްސަލަޖެހިފައިހުރި ތަންތަން އެކަންތައްތައް ހައްލުކުރަމުން ރައްޔިތުންނަށް ބޭނުންވާ ގޮތަށް ރައްޔިތުންނާ ގާތުން އެމައްސަލަތައް ޙައްލުކޮށް އެކަން ބާރު ސްޕީޑުގައި ކުރިއަށް ގެންދެވޭނެގޮތަށް އިންތިޒާކު ހަމަޖެހިގެން މިދަތުރުފުޅުގައި މިދަނީ” ކުޅިވަރު ވަޒީރު ވިދާޅުވިއެވެ.

މިދައުރުގެ ތެރޭގައި ކުޅިވަރުގެ ދާއިރާއިން ކުރެވިފައިވާ މަސައްކަތާ ގުޅޭގޮތުން ވަޒީރު ދާދި ފަހުން ވިދާޅުވެފަވަނީ މި އަހަރުގެ މިހާތަނަށް 50 އަށްވުރެ ގިނަ ކުޅިވަރުގެ މަޝްރޫއުތައް ނިންމައި ރައްޔިތުންނާ ހަވާލުކުރެވިއްޖެ ކަމަށެވެ. އަދި މިއަހަރަކީ ކުޅިވަރު ވުޒާރާއިން އެންމެ ގިނަ މަޝްރޫޢުތައް ނިންމާ ހަވާލުކުރާނެ އަހަރަށްވެގެންދާނެކަމުގެ ޔަގީންކަންވެސް ވަޒީރު ވަނީ ދެއްވާފައެވެ.