ކާވާ މެންސް ޗެމްޕިއަންސް ލީގު: ސިފައިން ބަލިވެ ފައިނަލުގެ އުންމީދު ގެއްލިއްޖެ

Read Time:3 Minute, 56 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) މެންސް ޗެމްޕިއަންސް ލީގު 2025 ގައި ސްރީލަންކާގެ ޕޯޓްސް އޮތޯރިޓީ އަތުން ބަލިވެ ދިވެހި ސިފައިންގެ ކުލަބަށް މުބާރާތުގެ ފައިނަލަށް ދިޔުމުގެ އުއްމީދު ގެއްލިއްޖއެވެ. ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު މެޗު ލަންކާ ޕޯޓްސް ގެ ޓީމުން ކާމިޔާބު ކުރީ 3-1 ސެޓުންނެވެ. މިމެޗު ފަށައިގެން ސިފައިންގެ ޓީމުން ދިޔައީ ވަރަށް ގާތުން ވާދަކުރަމުންނެވެ. މެޗުގެ ފުރަތަމަ ސެޓު ލަންކާ ޕޯޓްސް ގެ ޓީމުން ކާމިޔާބުކުރީ 25-20 އިންނެވެ. ޖެހިގެން އައިސެޓް ރަނގަޅު ވާދައެއްކޮށް ސިފައިންގެ ޓީމުން ފަރަގު ކުޑަކުރި ނަމަވެސް ލަންކާ ޓީމުން ކާމިޔާބު ކުރީ 25-23 އިންނެވެ.

މެޗުގެ ތިންވަނަ ސެޓުގައި ސިފައިންގެ ޓީމުން ކުޅުން ރަނގަޅުކޮށް ސެޓު ކާމިޔާބު ކުރި އިރު މި ސެޓުގައި ސިފައިން ކުރި ހޯދީ 25-20 އިންނެވެ. ފޯރިގަދަ ކުޅުމެއް ފެނިގެންދިޔަ މެޗުގެ ހަތަރު ވަނަ ސެޓުގައި ކުރި ހޯދާ ލަންކާ ޓީމުން ވަނީ މެޗު ކާމިޔާބުކޮއްފައެވެ. މި ސެޓު އެޓީމުން ގެންދިޔައީ 25-23 އިންނެވެ. މި މެޗާއެކު ރައުންޑް ރޮބިން އުސޫލުން ކުރިއަށްގެންދާ މި މުބާރާތުގެ ފައިނަލަށް ދިއުމުގެ ހުރިހާ ދޮރެއް ސިފައިންނަށް ވަނީ ބަންދުވެފައެވެ. ކޮންމެ ޓީމަކަށް ބާކީ ދެ މެޗު އޮތްއިރު ސިފައިން މިވަގުތު އޮތީ އެއް ޕޮއިންޓާއެކު ފަސްވަނައިގައެވެ. ހަ ވަނައިގައި އޮތީ ރާއްޖޭގެ ކުލަބު އެޗްޑީސީއެވެ. އެޗްޑީސީއަށް ވެސް ވަނީ ފައިނަލުގެ ދޮރު ބަންދުވެފައެވެ.

ކޮންމެ ޓީމެއް ތިން މެޗު ކުޅެ ނިމުނުއިރު އެއްވަނައިގައި ޒައިކް ވީސީ އޮތީ ނުވަ ޕޮއިންޓާއެކުއެވެ. ދެވަނައިގައި ކިރްގިސްތާނުގެ ބިޝްކެކް އަށް ޕޮއިންޓާއެކު އޮތްއިރު، ތިންވަނައިގައި އޮތް ހެލްޕް ނޭޕާލަށް ވަނީ ހަ ޕޮއިންޓު ލިބިފައެވެ. ރޭންކިންގެ އެއްވަނަ އާއި ދެވަނައަށް ވާދަކުރަނީ މި ތިން ޓީމެވެ. ސިފައިން އަތުން ހޯދި މޮޅާއެކު ލަންކާ ޕޯޓްސްއަށް ތިން ޕޮއިންޓު ވަނީ ލިބިފައެވެ. މުބާރާތުގެ ފައިނަލް ކުޅޭނީ ލީގު ބުރު ނިމޭއިރު އެއްވަނަ އަދި ދެވަނަ ޓީމެވެ. ތިންވަނަ އަދި ހަތަރުވަނަ ރޭންކިން މެޗެއް ކުޅޭއިރު، ފަސްވަނަ އަދި ހަވަނަ ޓީމުގެ މެދުގައި ވެސް ރޭންކިން މެޗު ކުޅޭނެއެވެ.