ރަޝްފޯޑް ބާސެލޯނާ އަށް

Read Time:4 Minute, 21 Second

މެންޗެސްޓާ ޔުނައިޓެޑުން ބޭނުން ނެތިގެން އުޅުނު ފޯވަޑް މާކަސް ރަޝްފޯޑް ބާސެލޯނާ އަށް ގެންދަން ނިންމައިފި އެވެ. ސްޕޭނުގެ މީޑިއާ ރިޕޯޓްތައް ބުނާ ގޮތުން ރަޝްފޯޑް ލައްވައި ސޮއި ކުރުވުމަށް ބާސެލޯނާ އިން ހުށަހެޅުމުން އެކަމަށް ޔުނައިޓެޑް ވަނީ އެއްބަސްވެފަ އެވެ. ރަޝްފޯޑް ބާސެލޯނާ އަށް ގެންދަނީ ލޯނު އެއްބަސްވުމެއްގެ ދަށުންނެވެ. ނަމަވެސް އޭނާ ރަނގަޅު ކުޅުމެއް ދައްކައިފިނަމަ ބާސެލޯނާ އަށް ކުޅުންތެރިޔާ ގަނެވޭނެ ގޮތް ވަނީ ހަދައިފަ އެވެ. އުމުރުން 27 އަހަރުގެ ރަޝްފޯޑް ބާސެލޯނާ އަށް ގެންދަނީ އެ ކުލަބުގެ ވާތު ވިންގުން ކުޅޭނެ ކުޅުންތެރިއަކު ހޯދަން ކުރި މަސައްކަތް ނާކާމިޔާބު ވުމުންނެވެ. މި ގޮތުން ބާސެލޯނާއިން އެންމެ ފުރަތަމް ގެންދަން މަސައްކަތް ކުރީ ސްޕޭނުގެ އެތްލެޓިކް ބިލްބާއޯގެ ނިކޯ ވިލިއަމްސް އެވެ. ނަމަވެސް އޭނާ ދިގު މުއްދަތުގެ ކޮންޓްރެކްޓެއްގައި ސޮއި ކުރުމާއެކު ދެން ބެލީ ލިވަޕޫލްގެ ކޮލަމްބިއާ ފޯވަޑް ލުއިސް ޑިއާޒް ގަތުމަށެވެ. ނަމަވެސް ކުޅުންތެރިޔާ ނުވިއްކަން ލިވަޕޫލުން ވަނީ ނިންމާފަ އެވެ.

ރަޝްފޯޑް ހުސްވި ސީޒަނުގެ ފަހު ބައިގައި ކުޅުނީ އެސްޓަން ވިލާ އަށެވެ. އޭނާ އޭނާ އަލުން ޔުނައިޓެޑަށް ދާން ޖެހުނުއިރު ކޯޗު ރުބެން އަމޮރިމްއާ ވަނީ ވަރަށް ބޮޑަށް މައްސަލަ ޖެހިފަ އެވެ. ލޯނު އުސޫލުން އެސްޓަން ވިލާ އަށް ރަޝްފޯޑް ކުޅެން ޖެހުނީ ވެސް ކޯޗާ މައްސަލަ ޖެހުމުން ޔުނައިޓެޑުން އޭނާ ދޫކޮށްލުމުންނެވެ. އެސްޓަން ވިލާ އަށް ރަޝްފޯޑް ދާއިމީ ކުރުމުގެ ފުރުސަތު އޮތެވެ. ނަމަވެސް 40 މިލިއަން ޕައުންޑް ދީފައި އޭނާ ލައްވައި ދާއިމީ ކޮންޓްރެކްޓްގައި ސޮއިކުރުވާ ވަރުގެ ކުޅުމެއް ރަޝްފޯޑަށް ނުދެއްކުނެވެ. ކުޅުނު 10 މެޗުގައި އޭނާ އަށް ޖެހުނީ އެންމެ ދެ ލަނޑެވެ. ރަޝްފޯޑް ވަނީ ޔުނައިޓެޑަށް 287 މެޗުން 87 ގޯލު ޖަހައިދީފަ އެވެ. އެއީ 10 އަހަރުންނެވެ.

ރަޝްފޯޑް ލައްވައި ސޮއި ކުރުވަން ބާސެލޯނާއިން އެންމެ ފުރަތަމަ ފަސް ޖެހުނެވެ. ސަބަބަކީ އޭނާގެ މުސާރަ ބޮޑު ވުމާއި އޭނާ ލައްވައި ކުޅުވަން ކުރަން ޖެހޭ ހޭދައާ އަޅާ ބަލާއިރު ރަޝްފޯޑަށް އެކަށީގެންވާ ކުޅުމެއް ނުދެއްކޭތީ އެވެ. މެންޗެސްޓާ ޔުނައިޓެޑާއެކު ރަޝްފޯޑް ހަދާފައިވާ ކޮންޓްރެކްޓްގައި ބާކީ އަދި ތިން އަހަރު އެބައޮތެވެ. މި ކޮންޓްރެކްޓްގައިވާ ގޮތުން މުސާރައިގެ ގޮތުގައި ހަފުތާއެކު ތިން ލައްކަ އަށްވުރެ ބޮޑު އަދަދެއް ދޭން ޖެހެ އެވެ. ނަމަވެސް ބާސެލޯނާއިން މި އަދަދު ވަރަށް ބޮޑަށް ކުޑަކުރާނެ އެވެ.