Read Time:6 Minute, 41 Second
ދުނިޔޭގޭ އެންމެ ބޮޑު ޖެޓް ހޭންޑްލިން ކުންފުނި ޖެޓްއެކްސް ކުންފުންނިން ދިވެހި ސަރުކާރަށް ހުށައަޅާފައިވާ ޕްރޮޕޯސަލުން 6000 ޖެޓަށް ހިދުމަތްދީ އަހަރަކު 100 މިލިއަން ދިވެހި ރުފިޔާގެ އާމްދަނީއެއް އެމްއޭސީއެލަށް ދިނުމަށް ހުށައަޅާފައިވެއެވެ. ޖެޓްއެކްސް ކުންފުނިން ވީއައިއޭގެ ޖެޓް ޓާމިނަލް ހިންގުމަށް ހުށައަޅާފައިވަނީ އެކުންފުނިން އަމިއްލައަށް އެދިގެންނެވެ. ޖެޓް ޓާމިނަލް ވިއްކާލަނީއޭ ބުނެ އިދިކޮޅު ފަރާތްތަކުން ދައްކަމުންދަނީ ދޮގު ވާހަކައެއްކަން މި ނޫހަށް ލިބިފައިވާ ޕްރޮޕޯސަލުގެ މައުލޫމާތުން އެނގެއެވެ.
ދުނިޔޭގެ އެންމެ ފުރިހަމަ އަދި ފަހުގެ ޓެކްނޮލޮޖީ ބޭނުންކޮށްގެން ދެވޭ ޚިދުމަތްތައް ދިވެހިރާއްޖޭގައި ތަޢާރަފުކުރުމަށް ހުށަހެޅި ޕްރޮޕޯސަލްގައި، މިހާރު ހުރި އެއްވެސް ވަސީލަތެއް ނުވަތަ އިމާރާތެއް އަމިއްލައަށް ހިންގުމުގެ ޚިޔާލެއް ހިމެނިފައެއް ނުވެއެވެ މީގެ ބަދަލުގައި، ޖެޓްއެކްސްގެ އަމިއްލަ އިންވެސްޓްމަންޓެއްގެ ގޮތުގައި، ދިވެހިރާއްޖޭގައި 50 މިލިއަން އެމެރިކާ ޑޮލަރު ޚަރަދުކޮށްގެން އައު ޕްރައިވެޓް ޖެޓް ޓާމިނަލްއެއް ޢިމާރާތްކުރުމަށް ވަނީ ހުށަހަޅާފައެވެ. މީގެ އިތުރުން، މި ޓާމިނަލްއަށް ބޭނުންވާ އެންމެހައި އާލާތްތައް ހޯދުމަކީވެސް ޖެޓްއެކްސް ކުންފުނީގެ ޒިންމާއެކެވެ. މި އައު ޓާމިނަލް ޢިމާރާތްކުރުމަށް ހަމަޖެހިފައިވަނީ ވެލާނާ އިންޓަރނޭޝަނަލް އެއަރޕޯޓުގެ އިރުމަތީ ސަރަޙައްދުގައެވެ. މި ބޮޑު އިންވެސްޓްމަންޓް ކުރުމަށްފަހު، 25 އަހަރުގެ މުއްދަތަށް ޚިދުމަތް ދިނުމަށް ހަމަޖެހިފައިވަނީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އާ ގުޅިގެން ހިންގާ މޮޑެލްއަކަށެވެ.
މި އޮޕަރޭޝަންގެ މުޅި ބާރު އޮންނާނީ އެމްއޭސީއެލްގެ އަތްމަތީގައެވެ. ވެލާނާ އިންޓަރނޭޝަނަލް އެއަރޕޯޓުގެ ވީއައިޕީ ޓާމިނަލްގެ ޚިދުމަތްތައް ފޯރުކޮށްދޭނީ އެމްއޭސީއެލްއިންނެވެ. ޖެޓްއެކްސްގެ ދައުރު މި އޮޕަރޭޝަންގައި ބިނާވެގެންވަނީ ހަމައެކަނި ފަސިންޖަރުން ހޭންޑްލްކުރުމުގެ މައްޗަށެވެ. އެ ކުންފުނީގެ އާމްދަނީ ލިބޭނީ މި ޚިދުމަތުގެ މައްޗަށް ބިނާކޮށެވެ. އެއަރޕޯޓުން އެންމެ ބޮޑު އާމްދަނީއެއް ލިބޭ ޖެޓް ފިއުލް ވިއްކުމުގެ މަސައްކަތް ކުރާނީވެސް އެމްއޭސީއެލްއިންނެވެ. ޖެޓްއެކްސްގެ އޮޕަރޭޝަނަށް ތެޔޮ ފޯރުކޮށްދޭނީ އެމްއޭސީއެލްއިންނެވެ. އެހެންކަމުން، ތެލުގެ ވިޔަފާރިން ލިބޭ އާމްދަނީވެސް ލިބޭނީ އެމްއޭސީއެލްއަށެވެ. ޖެޓެކްސްއާ މި މަޝްރޫޢު ހަވާލުކުރުމާ ގުޅިގެން، 25 އަހަރުގެ ތެރޭގައި ދައުލަތަށް 125 މިލިއަން އެމެރިކާ ޑޮލަރު (ގާތްގަނޑަކަށް 1.925 ބިލިއަން ދިވެހި ރުފިޔާ) ގެ އާމްދަނީއެއް ލިބޭނެކަމަށް ލަފާކުރެވެއެވެ.
މީގެ އިތުރުން، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އަށް އަހަރަކު 100 މިލިއަން ދިވެހި ރުފިޔާގެ ފާހަގަކޮށްލެވޭ އާމްދަނީއެއް ލިބޭނެކަމަށް ބެލެވެއެވެ. ޖެޓެކްސްގެ ހުށަހެޅުމުގައި، ދިވެހިރާއްޖޭގެ ޕްރައިވެޓް ޖެޓް ވިޔަފާރި ބައިނަލްއަޤްވާމީ ފެންވަރުގައި ކުރިއެރުވުމަށް ތަފްސީލީ މަގުޗާޓެއް ހިމަނާފައިވެއެވެ. މި ކުންފުނިން ދުބާއީގައި އެކަނި އަހަރަކު 12,000 އަށްވުރެ ގިނަ ޕްރައިވެޓް ޖެޓް ހޭންޑްލްކުރާއިރު، ދިވެހިރާއްޖޭގައި މިހާތަނަށް އެންމެ ގިނައިން ރެކޯޑުކުރެވިފައިވަނީ އަހަރަކު 3,000 ޕްރައިވެޓް ޖެޓެވެ.
މިހާރު ރާއްޖެއަށް އަންނަ ޕްރައިވެޓް ޖެޓުގެ އަދަދަށް ބަލާއިރު، ޖެޓެކްސްގެ ހުށަހެޅުމުގައި އަންދާޒާކޮށްފައިވާ އާމްދަނީއަކީ ވަރަށް ބޮޑުތަނުން އިތުރުވާނެ އަދަދެއްކަމަށް ލަފާކުރެވެއެވެ. މި މަޝްރޫޢުގެ ސަބަބުން ދިވެހިރާއްޖޭގެ ޕްރައިވެޓް ޖެޓް ވިޔަފާރި އިތުރަށް ފުޅާވެ، ރާއްޖޭގެ އިޤްތިޞާދަށް ފާހަގަކޮށްލެވޭ ކުރިއެރުމެއް ލިބޭނެކަމަށް އުންމީދުކުރެވެއެވެ.
Happy
25 %
Sad
25 %
Excited
0 %
Sleepy
0 %
Angry
25 %
Surprise
25 %
1
0