Read Time:5 Minute, 47 Second
(ފޮޓޯ ކްރެޑިޓްސް: ރައީސް އޮފީސް)
ހަނިމާދޫ އިންޓަނޭޝަނަލް އެއާޕޯޓް ބޭރުގެ ބަޔަކަށް ވިއްކާލަން އުޅޭ ދެކެވޭ ވާހަކަތައް އިކޮނޮމިކް މިނިސްޓަރު މުހައްމަދު ސައީދު ދޮގުކުރައްވައިފިއެވެ. ޕީއެންއެފުން މިދިޔަ ބުރާސްފަތި ދުވަހު ބޭއްވި ޖަލްސާގައި ވާހަކަފުޅު ދައްކަވަމުން ކުރީގެ ރައީސް އަބްދުﷲ ޔާމީން ވިދާޅުވީ ހަނިމާދޫ އިންޓަނޭޝަނަލް އެއާޕޯޓު އިންޑިއާގެ އަދާނީ ގުރޫޕަށް ވިއްކަން ސަރުކާރުން މަސައްކަތް ކުރަމުންދާ ކަމަށެވެ. އަދި ސިންގަޕޫރުގައި ބޭއްވި ބައްދަލުވުމެއްގައި އަދާނީ ގުރޫޕުގެ ޗެއާމަންއާ ބައްދަލުކުރައްވައި މި އެއާޕޯޓް އެ ކުންފުންޏަށް ވިއްކަން ސަރުކާރުން ވާހަކަދެއްކި ކަމަށްވެސް ޔާމީން ވަނީ ތުހުމަތު ކުރައްވައިފައެވެ.
މި ތުހުމަތުތަކާއި ގުޅިގެން ސައީދު ކުރެއްވި ޕޯސްޓެއްގައި ވިދާޅުވީ ހަނިމާދޫ އެއާޕޯޓު އެއްވެސް ފަރާތަކަށް ވިއްކާލަން ނޫޅޭ ކަމަށެވެ. އަދި ސިންގަޕޫރުގައި ބަޔަކާ ބައްދަލުކުރި ކަމަށް ބުނެ ފަތުރަމުން ދަނީ ދޮގު ވާހަކަތަކެއް ކަމަށް ވެސް ސައީދު ވިދާޅުވިއެވެ.
“ހަނިމާދޫ އެއާޕޯޓް ބޭރުގެ ފަރާތަކަށް ވިއްކާލަން ނުވަތަ ކުއްޔަށްދޭން އުޅޭ ކަމަށް ބުނެ ފަތުރަމުންދާ ވާހަކަ އާއި، މިކަމާބެހޭގޮތުން ސިންގަޕޫރުގައި ބަޔަކާ ބައްދަލުކުރި ކަމަށް ބުނެ ފަތުރަމުންދާ ވާހަކަތަކަކީ ބުހުތާނު ދޮގެއް.” ސައީދު ވިދާޅުވިއެވެ.
ހަނިމާދޫ އިންޓަނޭޝަނަލް އެއާޕޯޓް ތަރައްގީކުރުމުގެ މަޝްރޫއުގެ 88.7 އިންސައްތަ މަސައްކަތް ނިމި، ޝެޑިއުލާ އެއްގޮތަށް މިއަހަރުގެ ސެޕްޓެމްބަރަށް އެއްކޮށް ނިމޭނެ ކަމަށް މީގެ ތިން ދުވަސް ކުރިން ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓަރު، އަހުމަދު މުއްތަލިބް ވަނީ ވިދާޅުވެފައެވެ. ހަނިމާދޫ އެއާޕޯޓު ތަރައްގީކުރުމުގެ މަޝްރޫއަކީ އުތުރުގެ އެންމެ ބޮޑު ތަރައްގީގެ މަޝްރޫއެވެ. މިއީ އިންޑިއާގެ އެގްޒިމް ބޭންކުގެ ލޯނު އެހީގެ ދަށުން ކުރިއަށްދާ މަޝްރޫއެކެވެ. މި މަޝްރޫއުގެ ޖުމްލަ 88.7 އިންސައްތަ ނިމިފައިވާއިރު، ޕެސެންޖާ ޓާމިނަލްގެ 83 އިންސައްތަ ނިމިފައިވެއެވެ. އަދި އެއާ ޓްރެފިކް ކޮންޓްރޯލް ޓަވަރު، ހޭންގަރާއި ކާގޯ އިމާރާތުގެ 96 އިންސައްތަ ނިމިފައިވާކަމަށް މުއްތަލިބު ވަނީ ވިދާޅުވެފައެވެ.
މި މަޝްރޫއުގެ ދަށުން ހަނިމާދޫގައި 2,464 މީޓަރުގެ އާ ރަންވޭއެއް އެޅިއިރު، އަހަރަކު 1.3 މިލިއަން ފަސިންޖަރުންނަށް ހިދުމަތްދެވޭނެ ޖާގައިގެ ޓާމިނަލެއް އިމާރާތް ކުރެވެއެވެ. ބައިނަލްއަގްވާމީ ދަތުރުތައް ފުޅާކުރުމަށް ބޭނުންވާ ވަސީލަތްތައް ގާއިމުކުރެވޭނެއެވެ. މަޝްރޫއު ނިމުމުން، އެއާބަސް A320 އާއި ބޯއިން 737 މަރުކާގެ ބޯޓުފަހަރަށް ހަނިމާދޫ އެއާޕޯޓުން ހިދުމަތް ދެވޭނެއެވެ. މި މަޝްރޫއުގައި ފްލައިޓަށް އެރުމަށް އެއިރޯ ބްރިޖްތައް ވެސް ހިމެނެއެވެ.
މި މަޝްރޫއާއެކު، މެދުއިރުމައްޗާއި، ދެކުނު އޭޝިއާއާއި، ދެކުނު އިރުމަތީ އޭޝިއާއާއި އިރުމަތީ އެފްރިކާގެ ގައުމުތަކުން ސީދާ ފްލައިޓްތައް ހަނިމާދޫއަށް އޮޕަރޭޓް ކުރުމުގެ ގާބިލުކަން ލިބިގެންދާނެއެވެ. މި މަޝްރޫއަށް 136 މިލިއަން ޑޮލަރު (ދެ ބިލިއަން ރުފިޔާ) ހަރަދުކުރެއެވެ. މި ފައިސާ ހަރަދުކުރެވެނީ އިންޑިއާގެ އެގްޒިމް ބޭންކުން ދިން 800 މިލިއަން ޑޮލަރުގެ ލައިން އޮފް ކްރެޑިޓްގެ ދަށުންނެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0